ڈنگہ کی خبریں 13.10.2013
Posted on October 14, 2013 By Tahir Webmaster سٹی نیوز
ڈنگہ : راجہ فاروق حیدر آف ہالینڈ کے والد محترم ڈاکٹر راجہ اللہ دتہ خاں مرحوم کی 46ویں برسی ان کے آبائی شہر ڈنگہ میں20اکتوبر کو نہایت عقیدت و احترام سے منائی جائے گی
ڈنگہ(محمد بلال احمد بٹ)معروف صحافی نمائندہ جنگ ہالینڈ،سیکرٹری پاک نیدر لینڈ فرینڈ شپ ایسوسی ایشن،معروف بزنس مین راجہ فاروق حیدر آف ہالینڈ کے والد محترم ڈاکٹر راجہ اللہ دتہ خاں مرحوم کی 46ویں برسی ان کے آبائی شہر ڈنگہ میں20اکتوبر کو نہایت عقیدت و احترام سے منائی جائے گی۔مرحوم بہت سیاسی سیاسی بصیرت اور اثر کے مالک تھے،ان کی وفات1967ء میں ہوئی تھی اور انہیں ڈنگہ میں کشمیریاں والے قبرستان قبرستان میں مدفون کیا گیامرحوم ڈاکٹر راجہ اللہ دتہ خاں بلدیہ کے چیئر مین اور راجہ بازار ڈنگہ کے مالک بھی تھے۔مرحوم کی زندگی آئینے کی طرح شفاف تھی مرحوم بہت زیادہ سخی دل مشہور تھے اور سائل کو کبھی بھی خالی ہاتھ نہ لوٹاتے تھے۔مرحوم 25سال سے زیادہ عرصہ ڈنگہ میونسپل کمیٹی کے چیئر مین اور وائس چیئر مین کے عہدوں پر فائز رہے، مرحوم ایڈیٹر ڈیلی جلا وطن ڈاٹ کام رانا قاسم حسنین علی کے والد محترم مہر خاں صراف کے دوستوں میں سے تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : عید الاضحی پر جانور قربان کرنا سنت ابراہیمی ہے لیکن اس قربانی کا مفہوم شاید نوجوان ہی نہیں بڑے بھی بھول چکے ہیں،چوہدری اعجاز رنیاں
ڈنگہ (محمد بلال احمد بٹ) پاکستان مسلم لیگ ق کے سابق امیدوار صوبائی اسمبلی حلقہ پی پی 113 حاجی چوہدری اعجاز احمد رنیاں نے صحافیوں سے گفتگو کرتے ہوئے
کہا کہ عید الاضحی پر جانور قربان کرنا سنت ابراہیمی ہے لیکن اس قربانی کا مفہوم شاید نوجوان ہی نہیں بڑے بھی بھول چکے ہیں ۔ عیدالاضحی مسلمانوں کو اللہ سے قریب کرنے کے لئے منائی جاتی ہے ۔ مگر ہم تو ریاکاری ، جھوٹ ، فریب اور دکھاوے کے زیادہ قریب ہو گئے ہیں۔ ہم قربانی اللہ کی رضا کے لئے نہیں بلکہ محلے داروں اور عزیز و اقارب کو اپنی حیثیت بتانے کے لئے کرنے لگے ہیں اور اس کے لئے ہم مہنگے سے مہنگا جانور خریدنے کو ترجیح دیتے ہیں ۔ وہ گوشت جس پر مستحق افراد کا حق ہوتا ہے وہ ہمارے ڈیپ فریزر کی زینت بنتا ہے ۔ کیا یہی سبق ہمیں سنت ابراہمی سے ملتا ہے ؟عیدالاضحی عالم اسلام کا ایک بہت بڑا مذہبی تہوار ہے جو ہمیں اپنے پیدا کرنے والے کی رضا کے لئے اپنا سب کچھ یہاں تک کہ اولاد بھی قربان کردینے کا درس دیتا ہے مگر افسوس کہ آج ہم اس کی محبت دل سے نکال کر دنیاوی جال میں اس قدر پھنسے ہوئے ہیں کہ باپ کو بیٹے کی خبر نہیں، بھائی کو بہن کا پتہ نہیں اور ماں کو بیٹی کا ہوش نہیں ۔ ہر ایک کو مال و زر کی ہوس نے اندھا کر رکھا ہے ۔ زیادہ عرصہ کی بات نہیں کہ امت مسلمہ عید الاضحی انتہائی مذہبی عقیدت و احترام سے منایا کرتی تھی ۔ لوگوں میں اپنے خدا کو راضی کرنے کا جنون کی حد تک جذبہ پایا جاتا تھا۔ مگر آج کیا ہورہا ہے؟ عید کا چاند نظر آنے سے پہلے چھریاں ٹوکے تیز کر لئے جاتے ہیں اور گوشت سے فریجیں بھر لی جاتی ہے ۔ غریب لوگ انتظار ہی کرتے رہ جاتے ہیں ۔ خدارا اپنی روش بدلیں ، تاکہ اللہ کی رحمت ہمارا مقدر بنے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ میں مہنگائی عروج پر قربانی کے جانوروں کا رش ، خریدار غائب مہنگائی سے قربانی بھی خواب بن گئی
ڈنگہ (محمد بلال احمد بٹ) ڈنگہ میں مہنگائی عروج پر قربانی کے جانوروں کا رش ، خریدار غائب مہنگائی سے قربانی بھی خواب بن گئی ، شہری، گاہک نہ ہونے سے پریشان ہیں : بیوپاری۔ مہنگائی نے قربانی کے جانوروں کے بیوپاریوں اور خریداروں کو امتحان میں ڈال دیا ہے ، ڈنگہ میں رش کی کیفیت میں تو اضافہ دیکھنے میں آ رہا ہے مگر خریدار نہ ہونے کے برابر ہیں ۔ شہریوں کا کہنا ہے کہ ایک طرف حکومت نے عوام کو قربانی کا بکرا بنایا ہوا ہے دوسری طرف شہریوں کے لئے قربانی کے جانور کی قیمت بھی سکت سے باہر ہوتی جا رہی ہے ۔ خریداروں کا کہنا تھا کہ مہنگائی کے باعث بکروں ، چھتروں اور گائے بیل کی قیمت میں ناقابل برداشت اضافہ ہوچکا ہے ، دوسری طرف بیوپاریوں نے بھی مہنگائی کا رونا روتے ہوئے بتایا ہے کہ ان کی خریداری بھی مہنگی ہے اور جانوروں کی دیکھ بھال کرنے پر ان کے کافی اخراجات ہوئے ہیں ، مناسب منافع کی غرض سے جانوروں کو فروخت کے لئے لائے ہیں لیکن مہنگائی کے باعث خریداروں کی تعداد کافی کم ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ اور نواحی علاقوں میں لوڈ شیڈنگ جاری ، 10 سے 12 گھنٹے بجلی بند
ڈنگہ (محمد بلال احمد بٹ) ڈنگہ اور نواحی علاقوں میں لوڈ شیڈنگ جاری ، 10 سے 12 گھنٹے بجلی بند ڈنگہ شہر اور نواحی علاقوں میں بجلی کی بد ترین لوڈ شیڈنگ کا سلسلہ جاری ہے ۔ لاکھوں صارفین کو مشکلات کا سامنا ، تفصیلات کے مطابق ڈنگہ شہر اور اس سے ملحقہ علاقوں میں ہفتہ کے روز بھی بجلی کی لوڈ شیڈنگ کا سلسلہ جاری رہا اور ڈنگہ شہر کے کئی حصوں سمیت بعض نواحی علاقوں میں 24 گھنٹوں کے دوران 10 سے 12 گھنٹے تک بجلی بند رہی جس سے لوگوں کو شدید مشکلات کا سامنا کرنا پڑا اور روز مرہ کے معمولات زندگی اور کاروباری سرگرمیاں بھی بری طرح متاثر ، اور سر شام ہی دوکانیں بند ہونے سے عید کی خریداری متاثر ہوتی رہی جس سے دوکانداروں اور کاروباری طبقہ پریشانی کا شکار ہے ، دوکانداروں اور صارفین نے شدید احتجاج کرتے ہوئے حکومت اور واپڈا حکام سے بجلی کی لوڈ شیڈنگ فوری ختم کرنے کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ :مہنگائی سے جرائم ، خود کشیاں بڑھ گئیں موجودہ حکمرانوں نے تمام وعدے بھلا دیئے،چوہدری اخلاق احمد رنیاں
ڈنگہ (محمد بلال احمد بٹ) پاکستان مسلم لیگ ق حلقہ پی پی 113 کے رہنما سابق ناظم چوہدری اخلاق احمد رنیاں نے ْصحافیوںسے گفتگو کرتے ہوئے کہا مہنگائی سے جرائم ، خود کشیاں بڑھ گئیں موجودہ حکمرانوں نے تمام وعدے بھلا دیئے ۔ بجلی اور پٹرولیم مصنوعات میں اضافہ کی شدید الفاظ میں مذمت کرتے ہوئے کہا ہے کہ اس سے منگائی کا نیا طوفان آ گیا ہے جسے برداشت کرنا اب عوام کے بس سے باہر ہے ۔ جرائم اور خود کشیوں میں بے تحاشا اضافہ ہوگیا ہے ۔ حکمران الیکشن کے دوران کئے گئے وعدوں پر عمل کی بجائے آئی ایم ایف اور امریکی شرائط پر عمل پیرا ہے ۔ قوم نے جو توقعات مسلم لیگ ن سے وابستہ کی تھیں وہ صرف تین ماہ میں ہی دم توڑتی نظر آرہی ہیں ۔ آئے روز پٹرولیم مصنوعات و بجلی کی قیمتوں میں اضافہ کے سبب انڈسٹری بند، کاروبار ختم اور مہنگائی کا سونامی آ رہے ہیں جو کہ غریب اور سفید پوش عوام کو اب تنکوں کی طرح اپنے ساتھ بہا کر لے جا رہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ :حکومت ترقیاتی کاموں کے لئے کوشاں ہے موجودہ حکومت عوام کو درپیش سنگین مسائل مہنگائی ، بے روز گاری اور دہشت گردی سے بخوبی آگاہ ہے،چوہدری جعفر اقبال
ڈنگہ (محمد بلال احمد بٹ) پاکستان مسلم لیگ ن کے مرکزی رہنما حلقہ این اے 106 ایم این اے چوہدری جعفر اقبال نے گزشتہ روز صحافیوں سے ٹیلیفون پر گفتگو کرتے ہوئے کہا کہ حکومت ترقیاتی کاموں کے لئے کوشاں ہے موجودہ حکومت عوام کو درپیش سنگین مسائل مہنگائی ، بے روز گاری اور دہشت گردی سے بخوبی آگاہ ہے اور تمام تر توجہ انہیں حل کرنے اور عوام کو ریلیف دینے پر دے رہی ہے ۔ سابق حکومت کی بری گورننس کا سارا بوجھ مسلم لیگ کی حکومت پر پڑا ہے جسے درست کرنے کے لئے تمام صلاحیتیں بروئے کار لائی جا رہی ہیں اور انشاء اللہ عوامی طاقت سے مسائل پر قابو پا کر ملک کو دوبارہ ترقی کی راہ پر گامزن کیا جائے گا۔ حلقہ این اے 106 میں ترقیاتی کاموں کے لئے فنڈز کی فراہمی کے لئے بھرپور کوشش کی جا رہی ہے ۔ میاں برادران ملک و قوم کی تقدیر بدلنے کے لئے تمام تر کوششیں کر رہے ہیں ۔ سابق حکمرانوں نے قومی دولت کو بے دریغ لوٹا خزانہ خالی ہونے کے باعث حکومت کو شدید چیلنجز کا سامنا ہے پاکستان مسلم لیگ ن کے قائد وزیر اعظم پاکستان میاں نواز شریف اور وزیر اعلیٰ پنجاب میاں شہباز شریف ایسی پالیسیاں بنا رہے ہیں جس سے مستقبل میں بہتر نتائج برآمد ہونگے ۔ جو بہتر مستقبل کی ضمانت بن جائینگے ہم پاکستان کو عظیم مملکت بنانے کی پالیسیوں پر عمل پیرا ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ :دکاندار پھلوں سبزیوں اور گوشت کے من مانے نرخ وصول کرنے لگے
ڈنگہ (محمد بلال احمد بٹ) دوکاندار پھلوں سبزیوں اور گوشت کے من مانے نرخ وصول کرنے لگے ۔ ڈنگہ کے دوکانداروں نے عوام کو دونوں ہاتھوں سے لوٹنا شروع کر دیا ہے مارکیٹ کمیٹی کی ریٹ لسٹوں کو پس پشت ڈال کر ناقص غذائی اشیاء پھلوں ، سبزیوں اور گوشت وغیرہ کے من مانے دام وصول کر رہے ہیں ۔ ریڑھی اور ٹھیلے والوں نے تجاوزات کی بھرمار کر رکھی ہے جس سے بازار سکڑ گئے ہیں اور ٹریفک کے علاوہ پیدل چلنے والوں کا گزرنا محال ہو گیا ہے جبکہ ریڑھی بان بازاروں میں آئی خواتین کو دیکھ کر آوازیں کستے ہیں جس سے گھریلو خواتین سخت پریشان ، بازار میں انتظامیہ نہ ہونے کے برابر۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ :عید قریب آتے ہیں ٹریفک اہلکاروں نے عیدی مہم شروع کر دی
ڈنگہ (محمد بلال احمد بٹ) عید قریب آتے ہیں ٹریفک اہلکاروں نے عیدی مہم شروع کر دی ۔ مختلف چوکوں ، چوراہوں پر اہلکاروں کے ڈیرے ، مہنگائی کے ہاتھوں مجبور عوام کا حکام سے نوٹس لینے کا مطالبہ ،عید قریب آتے ہی پنجاب پولیس کے نوجوانوں اور ٹریفک پولیس کے اہلکاروں نے چوکوں ، چوراہوں پر موٹر سائیکل ، ویگن ، کوچز ، ٹریکٹر ٹرالی اور ڈالے والوں کی شامت آ گئی عیدی وصولی مہم زوروں پر مہنگائی کی ماری عوام کی چیخ و پکار حکام بالا سے نوٹس لینے کا مطالبہ ہے ۔ ٹریفک پولیس نے حسب
روایت عیدالاضحی کے دن قریب آتے ہی چوکوں اور چوراہوں پر ڈیرے ۔ جبکہ ٹریفک کا نظام درہم برہم ہو کر رہ گیا ہے ، کاغذات مکمل رکھنے والوں سے کئی طرح کے سوالات کئے جا تے ہیں ۔ کاغذات مکمل نہ ہونے کی صورت میں اپلائیڈ فار موٹر سائیکلوں کے بے تحاشہ چالان کئے جاتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ :یونین کونسل وڑائچانوالہ سے بلدیاتی الیکشن میں چیئر مین کے عہدے پر الیکشن لڑنے کا فیصلہ کر لیا،چوہدری سلیمان الیاس آ ف وڑائچانوالہ
ڈنگہ (محمد بلال احمد بٹ) ناروے میں مقیم ممتاز زمیندار چوہدری سلیمان الیاس آف وڑائچانوالہ نے صحافیوںسے ٹیلیفون پر گفتگو کرتے ہوئے کہا کہ یونین کونسل وڑائچانوالہ سے بلدیاتی الیکشن میں چیئر مین کے عہدے پر الیکشن لڑنے کا فیصلہ کر لیا انہوں نے کہا کہ عرصہ دراز سے ہمارا خاندان سیاست کے میدان میں چلا آ رہا ہے ۔ ہم سیاست کے میدان میں آ کر یونین کونسل وڑائچانوالہ اور علاقہ کی بھرپور خدمت کرنا چاہتے ہیں اگر یونین کونسل وڑائچانوالہ کی عوام نے خدمت کا موقع دیا تو یونین کونسل کی تقدیر بدل دیں گے ۔ انہوں نے کہا مقامی ایم پی اے میاں طارق محمود اور سید نورالحسن شاہ کے ساتھ سیاسی مشاورت جاری ہے۔
