ڈنگہ کی خبریں 16.06.2013
Posted on June 17, 2013 By Geo Urdu سٹی نیوز
ڈنگہ (محمد بلال احمد بٹ) دنیا بھر کی طرح آج پاکستان میں ضلع گجرات سمیت ڈنگہ میں فادر ڈے بڑے جوش و جذبے سے منایا گیا آج کے دن بچوں نے اپنے والد کے لئے نیک تمنائوں اور خواہشات کا اظہار کیاگھر گھر تقریبات کا انعقاد کیا گیا۔ تقریبات میں بچوں نے اپنے اپنے والد کو تحفے تحائف اور پھول پیش کئے اور والدین کی درازی عمر کے لئے دعائیں بھی کیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : مرکزی راہنما آل پاکستان مسلم لیگ ن،سابق امیدوار حلقہ این اے106چوہدری اسلم وسن کی برمنگھم میں معروف کالم نگار عطاء الحق قاسمی سے اہم ملاقات
ڈنگہ(محمد بلال احمد بٹ)مرکزی راہنما آل پاکستان مسلم لیگ ن،سابق امیدوار حلقہ این اے 106 چوہدری اسلم وسن کی برمنگھم میں معروف کالم نگار عطاء الحق قاسمی سے اہم ملاقات۔عطاء الحق قاسمی پاکستان سے برمنگھم میں سلطان باہو ٹرسٹ کانفرنس میں شرکت کے لئے آئے تھے انہوں نے کانفرنس سے خطاب کرتے ہوئے کہا کہ صوفی ازم دہشت گردی کو ختم کرنے میں اہم کردار ادا کر رہا ہے، صوفیا نے ہمیشہ پیاور اور محبت کا درس دیا ہے، انہوں نے کہا کہ برصغیر میں اسلام پھیلانے میں صوفیا نے اہم کردار ادا کیا ہے،کانفرنس میں پیر نیا الحسن،ایم پی خالد محمود، چوہدری اسلم وسن، ہائی کمشنر واجد شمس الحسن، سائمن شان، کونسلر محمد اخلاق، کونسلر ٹونی کینڈی اور انٹرنیشنل شاعر شاہ عزیر احمد کے علاوہ دیگر نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : وفاقی حکومت نے معاشی بدحالی کو مدنظر رکھتے ہوئے متوازن بجٹ پیش کیا، چوہدری جعفر اقبال ایم این اے
ڈنگہ(محمد بلال احمد بٹ)ایم این اے حلقہ این اے 106 چوہدری جعفر اقبال نے اپنے بیان میں کہا ہے کہ حکومت نے معاشی بدحالی کو مدنظر رکھتے ہوئے متوازن بجٹ پیش کیا، انہوں نے کہا کہ مخالفین کی تنقید کا جواب پہلے سے زیادہ کام کر کے دیں گے، انہوں نے ایک سوال کے جواب میں کہا کہ آسانیاں پیدا کرنا پہلی ترجیح ہے،مسلم لیگ ن کی حکومت عوامی توقعات کو پورا کرنے کیلئے تمام دستیاب وسائل پوری دیانتداری کے ساتھ عوام پر خرچ کرنے کا پختہ عزم رکھتی ہے اور پنجاب میں مسلم لیگ نے گڈ گورننس کی جو اعلیٰ روایت پچھلے پانچ سال میں قائم کی تھی اس کا سلسلہ پنجاب و بلوچستان سمیت اب وفاق تک بڑھایا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : بجٹ کی منظوری سے قبل پٹرولیم مصنوعات پر جی ایس ٹی میں اضافہ غیر آئینی ہے، چوہدری اعجاز احمد رنیاں
ڈنگہ (محمد بلال احمد بٹ) سابق امیدوار حلقہ پی پی113راہنما پاکستان مسلم لیگ ق چوہدری اعجاز احمد رنیاں نے اپنے بیان میں کہا ہے کہ بجٹ کی منظوری سے قبل پٹرولیم مصنوعات پر جی ایس ٹی میں اضافہ غیر آئینی ہے۔ انہوں نے کہا کہ قیمتیں بڑھانے سے عام صارف متاثر ہوگا۔ انہوں نے کہا کہ کھانے پینے کی اشیاء سے لے کر ہر چیز پر ٹیکس لاگو کر دیا گیا ہے جو کہ عوام دشمنی ہے۔ انہوں نے کہا کہ عوام اس وقت جن مسائل سے دوچار ہیں ان میں مہنگائی بڑا اہم ایشو ہے پہلے ہی عوام غربت کی چکی میں پس رہے ہیں اوپر سے مزید ٹیکسوں کا بوجھ سراسر زیادتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : وزیراعظم نے بجلی کے نرخوں میں اضافے کی منظوری دیدی
ڈنگہ(محمد بلال احمد بٹ)وزیراعظم نے بجلی کے نرخوں میں اضافے کی منظوری دیدی۔ میڈیا رپورٹ کے مطابق وزیراعظم نواز شریف کی صدارت میں ہونے والے اجلاس میں لوڈ شیڈنگ میں کمی لانے اور نئی انرجی پالیسی پر بھی غور کیا گیا۔ وزارت پانی و بجلی کے حکام نے شرکاء کو بتایا کہ بجلی کے نادہندگان سے وصولی کے لیے جامع حکمت عملی تیار کر لی گئی ہے۔ ماہرین نے وزیراعظم کو بریفنگ دی کہ نئی انرجی پالیسی رواں ماہ کے آخر تک تیار کر لی جائیگی۔ وزیراعظم کی زیر صدارت اجلاس کے حوالے سے جاری اعلامیہ میں کہا گیا ہے کہ وزیراعظم نے بجلی کی قیمتوں کو حقیقت پسندانہ بنانے کی اجازت دے دی ہے جس کے تحت بجلی کی قیمتیں بڑھائی جائیں گی تاہم وزارت خزانہ اور پانی و بجلی سے کہا ہے کہ قیمتوں میں اضافے کے دوران عام آدمی کا مکمل خیال رکھا جائے اور غریب آدمی اور لائف لائن کنزیومر پر کوئی اضافی بوجھ نہ ڈالا جائے۔ جس کے بعد امکان ہے کہ یکم جولائی سے بجلی کی قیمتوں میں اضافہ کردیا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : یکم جولائی سے سرکاری ملازمین کی تنخواہوں میں اضافہ کیے جانے کا امکان ہے
ڈنگہ (محمد بلال احمد بٹ) حال ہی میں اقتدار سنبھالنے والی مسلم لیگ ن کی حکومت نے سرکاری ملازمین کی تنخواہوں میں اضافے کیلئے بنائی گئی کمیٹی سے 6 روز میں رپورٹ طلب کرلی ہے، کمیٹی کی تجاویز کی روشنی میں یکم جولائی سے تنخواہوں میں اضافہ کیے جانے کا امکان ہے۔وزیرخزانہ نے ایڈیشنل سیکرٹری خزانہ کی سربراہی میں فوری کمیٹی تشکیل دیتے ہوئے کمیٹی کو ہدایت کی ہے کہ بجٹ کے اندر رہتے ہوئے تجاویز پیش کی جائیں۔ کمیٹی 20 جون تک وزیر خزانہ کو اپنی رپورٹ پیش کردیگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
