ڈنگہ کی خبریں 3.10.2013
Posted on October 3, 2013 By Geo Urdu سٹی نیوز
ڈنگہ : چوہدری برادران کی قیادت میں بلدیاتی الیکشن میں کامیابی کے جھنڈے لہرائیں گئے، چوہدری اعجاز رنیاں، چوہدری اخلاق رنیاں
ڈنگہ (محمد بلال احمد بٹ) پاکستان مسلم لیگ (ق) سابق امیدوار صوبائی اسمبلی حلقہ پی پی 113 چوہدری اعجاز احمد رنیاں، چوہدری اخلاق احمد رنیاں نے اپنے ایک بیان میں کہا کہ چوہدری برادران کی قیادت میں بلدیاتی الیکشن میں کامیابی کے جھنڈے لہرائیں گئے۔ حلقہ پی پی 113 اپنے مضبوط پینل کا آغاز کر کے سیاسی مہم شروع کریں گے۔ اس سلسلہ میں ہمارے امیدواروں نے جوق در جوق ووٹ مانگنے کا سلسلہ شروع کردیا ہے۔ انہوں نے کہا کہ پنجاب کے سابق وزیر اعلیٰ چوہدری پرویز الٰہی نے اپنے دور اقتدار میں پنجاب کی عوام کو خوش حال رکھا اور نوجوانوں کو روز گار اور نوکریاں فراہم کیں۔ ان کے دورِ اقتدار میں ہر شخص تین وقت کی روٹی با آسانی کما رہا تھا، جبکہ (ن) لیگ کی حکومت میں عوام ایک وقت کی روٹی کمانے کے چکر میں لگے ہوئے ہیں، حالیہ یوٹیلٹی بل اور پٹرولیم مصنوعات کی وجہ سے ٹرانسپورٹ اور زمیندار سخت پریشان ہیں۔ اب لوگوں میں وہ سکت نہیں رہی کہ وہ بھر پور سڑکوں پر احتجاج کر سکیں۔ انشاء اللہ تعالیٰ آئندہ دور (ق) لیگ کا ہو گا اور پھر خوشحالی کا دور ہو گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محمد بوٹا لائن مین کو بلدیہ کرپشن کیس میں فوری سسپنڈ کر کے اسکے خلاف کاروائی عمل میں لائی جائے، ڈاکٹر محمد عنایت، چوہدری راصف آہیر کی وفاقی وزیر پانی و بجلی، چیف انجینئر گیپکو، چیف ایگزیکٹو گیپکو اور ایس ای گپیکو کو درخواست
ڈنگہ (محمد بلال احمد بٹ) محمد بوٹا لائن مین کو بلدیہ کرپشن کیس فوری سسپنڈ کر کے اسکے خلاف کاروائی عمل میں لائی جائے، اعلیٰ حکام کو تحریری درخواست صدر ڈنگہ پریس کلب ڈنگہ رجسٹرڈ ڈنگہ محمد عنایت اورجنرل سیکرٹری چوہدری راصف آہیر نے وفاقی وزیر پانی و بجلی، چیف انجینئر گیپکو، چیف ایگزیکٹو گیپکو اور ایس ای گیپکو کو ایک تحریری مشترکہ درخواست ارسال کی ہے جس میں موقف اختیار کیا ہے سب دویثرن گیپکو ڈنگہI میں تعینات لائن مین محمد بوٹا نے ٹی ایم او و نان ہیڈ کوارٹر ڈنگہ میں تعینات الیکٹریشن ظہور حمد سے ملی بھگت کر کے ٹی ایم او نان ہیڈکوارٹر ڈنگہ کے بجلی بلوں ماہ اکتوبر و نومبر 2011ء میں دو لاکھ 40 ہزار ایک سو 50 روپے کی کرپشن کی تھی راز فاش ہونے پر ٹی ایم او کھاریاں نے الیکٹریشن ظہور احمد کو سسپنڈ کر دیا ہے جبکہ محمد بوٹا وفاقی ادارہ کا ملازم ہونے کی وجہ سے ٹی ایم او اسکے خلاف کاروائی کرنے سے قاصر ہے، لہذا اسے بھی فوری سسپنڈ کر کے کاروائی عمل میں لائی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : بجلی اور پیٹرول کی قیمتوں میں اضافہ نے تاجروں کی کمر توڑ کے رکھ دی ہے، عبدالرحمن نوجوان تاجر راہنما
ڈنگہ (محمد بلال احمد بٹ) نوجوان سماجی و تاجر راہنما عبدالرحمن نے اپنے ایک بیان کیا ہے کہ کاروباری برادری پہلے ہی بڑی مشکلات کا شکار ہے جبکہ آئے روز بجلی اور پیٹرول کی قیمتوں میں اضافہ نے تاجروں کی کمر توڑ کے رکھ دی ہے،انہوں نے کہا کہ کاروباری برادری پہلے ہی بے تحاشا مہنگائی کی وجہ سے پریشان ہے اور کاروبار ٹھپ ہو رہے ہیں، ان حالات میں حکومت ایسے کالے قوانین کے نفاذ سے باز رہے انہیں بیرونی دوروں سے فرصت نہیں اور عوام کو بجلی و گیس اور پیٹرول کے بل دیکھ کر دورے پڑ رہے ہیں، عبدالرحمن نواز نے مطالبہ کیا ہے کہ اگر حکومت ریٹ میں کمی نہیں کر سکتی تو مزید اضافہ کر کے عوام کو زندہ درگور کرنے کا منصوبہ ترک کرے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : جمشید اقبال بٹ تین ماہ کے دورہ یورپ کے بعد وطن واپس پہنچ گئے
ڈنگہ (محمد بلال احمد بٹ) چیف ایڈیٹر ہم وطن، ممبر ڈنگہ پریس کلب رجسٹرڈ ڈنگہ، ایم ڈی امن ٹریولز ڈنگہ، بیوروچیف سنٹر لائن اسلام آباد جمشید اقبال بٹ تین ماہ کے دورہ یورپ کے بعد وطن واپس پہنچ گئے جمشید اقبال بٹ نے اپنے دورہ کے دوران سوئٹزرلینڈم، ہالینڈ، سپین، اٹلی، ناروے، ڈنمارک آسٹریلیا سمیت چھ ممالک میں تین ماہ قیام کیا،ذرائع کے مطابق انہوں نے یورپ کا دو سال کا مستقل رہائشی ویزہ حاصل کرکے اور ٹورازم آفس کے قیام کے بعد وطن واپس پہنچے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ پریس کلب رجسٹرڈ ڈنگہ کا ایک تعزیتی اجلاس دفتر ڈنگہ پریس کلب رجسٹرڈ ڈنگہ میں منعقد ہوا
ڈنگہ (محمد بلال احمد بٹ) گذشتہ روز ڈنگہ پریس کلب رجسٹرڈ ڈنگہ کا ایک تعزیتی اجلاس دفتر ڈنگہ پریس کلب رجسٹرڈ ڈنگہ میں صدر ڈاکٹر محمد عنایت کی صدارت میں منعقد ہوا،جس میں ڈنگہ پریس کلب رجسٹرڈ ڈنگہ کے سابق صدر اور چیف ایڈیٹر ہفت روزہ نئے حقائق ڈاکٹر غلام مصطفی آذر کے والد حاجی عبدالغفور کی وفات اور DMC کے صدر نثار مغل کی خوشدامن کی وفات پر گہرے رنج و غم کا اظہار کیا گیا، مرحومین کی مغفرت کیلئے فاتحہ خوانی اور لواحقین کیلئے صبروجمیل کی دعا کی گئی، اجلاس میں ریاض احمد بٹ، رانا اطہر رشید، فضل حسین بٹ، چوہدری راصف آہیر، عطاء اللہ بٹ، عبدالمجید، جمشید اقبال بٹ، اور شہباز احمد بٹ نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : حکومت کی جانب سے آئے روز بجلی کی قیمتوں میں اضافہ سے شہری عاجز آگئے، عوامی سروے
ڈنگہ (محمد بلال احمد بٹ) حکومت کی جانب سے آئے روز بجلی کی قیمتوں میں اضافہ سے شہری عاجز آگئے، ڈنگہ اور گردونواح کے سیاسی و سماجی و عوامی شخصیات نے حکومت کی طرف سے بجلی کے نرخوں میں اضافہ کو یکسر مسترد کر دیا ہے سروے میں بتایا گیا کہ حکومت غریب عوام کے مسائل توحل نہیں کر سکتی مگر ان کی مشکلات میں دن بدن اضافہ کر رہی ہے، بجلی کی مسلسل اور غیر اعلانیہ لوڈ شیڈنگ نے تو پہلے ہی عوام کو چڑ چڑے پن کا شکار کر دیا ہے، دوسری طرف حکومت نے یکدم بجلی کی قیمتوں میں اضافہ کر کے عوام کو مشکلات سے دوچار کر دیا ہے۔
ڈنگہ : اے ای او مرکز ڈنگہ مسعود عالم خاکسار پانچ اکتوبر کو ریٹائرڈ ہو جائیں گے
ڈنگہ(محمد بلال احمد بٹ)علاقہ ڈنگہ کے ممتاز ماہر تعلیم مدرس اول گورنمنٹ ای ایس چک جانی اور قائم مقام اے ای او مرکز ڈنگہ مسعود عالم خاکسار پانچ اکتوبر کو ریٹائرڈ ہو جائیں گے وہ یکم جون 1972ء کو محکمہ تعلیم میں بھرتی ہوئے اور ان کی پوسٹنگ پرائمری سکول رندھیر میں ہوئی،وہ عرصہ دراز سے گورنمنٹ ای ایس ڈنگہ میں بطور سینئر مدرس اول تعینات رہے انکے شاگرد آج مختلف محکموں میں اعلیٰ عہدوں پر فائز ہیں، مسعود عالم خاکسارکا علاقہ ڈنگہ کے سینئر فرض شناس اساتذہ میں شمار ہوتا ہے، پانچ اکتوبر عالمی سطح پر اسلام ٹیچرڈے کے طور پر منایا جاتا ہے اور اسی دن وہ ریٹائرڈ ہوں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فتہ بھنڈ، نور جمال روڈ براستہ ڈھلیان عرصہ دراز سے ٹوٹ پھوٹ کا شکار ہے،عوامی سماجی حلقوں کا ارباب اختیار سے درستگی کا مطالبہ
ڈنگہ (محمد بلال احمد بٹ) فتہ بھنڈ،نور جمال روڈ براستہ ڈھلیان عرصہ دراز سے ٹوٹ پھوٹ کا شکار ہے جس کی وجہ سے بالخصوص بارشوں کے دنوں مذکورہ دیہاتوں کے رہائشیوں کو مذکورہ روڈ پر دوران سفر شدید مشکلات کا سامنا ہے، عوامی سماجی حلقوں نے ایم پی اے بالخْصوص ایم این اے چوہدری جعفر اقبال سے پر زور مطالبہ کیا ہے کہ مذکورہ روڈ فی الفور تعمیر کروائی جائے تاکہ مذکورہ دیہات کے افراد بالخصوص مریضوں کو آنے جانے میں پریشانی کا سامنا نہ کرنا پڑے، یاد رہے کہ چوہدری جعفر اقبال ایم این اے کے آبائی گائوں کو بھی مذکورہ روڈ ہی جاتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈنگہ : راجہ لیاقت علی آف ہالینڈ کل چار اکتوبر کو حج بیت اللہ کی سعادت حاصل کرنے کیلئے فیملی کے ہمراہ روانہ ہوں گے
ڈنگہ (محمدبلال احمد بٹ) معروف سیاسی سماجی فلاحی شخصیت راجہ لیاقت علی آف ہالینڈ کل چار اکتوبر کو حج بیت اللہ کی سعادت حاصل کرنے کیلئے فیملی کے ہمراہ روانہ ہوں گے بڑی تعداد میں دوست احباب اور عزیز و اقارب انہیں الوداع کریں گے۔
