ڈاکٹر طاہر القادری کی پشاور قصہ خوانی بازار میں بم دھماکوں کی شدید مذمت
Posted on September 30, 2013 By Geo Urdu سٹی نیوز
پاکستان : عوامی تحریک کے قائد ڈاکٹر محمد طاہر القادری نے پشاور قصہ خوانی بازار میں ہونیوالے بم دھماکوں کی شدید ترین مذمت کی ہے۔ انہوں نے کہا کہ دہشت گردی کا خاتمہ بیانات سے قیامت تک نہ ہو گا اس کیلئے سخت ترین اقدامات کرنا ہونگے کیونکہ ملکی تشخص اور سلامتی سے بڑھ کر کچھ نہیں ہے۔
انہوں نے کہا کہ پاکستان گذشتہ ایک دھائی سے دہشت گردی کی بد ترین لپیٹ میں ہے مگر ابھی تک اس کے خاتمے کا نہ عزم دکھائی دیتا ہے اور نہ ہی اقدامات۔ مقتدر طبقہ یاد رکھے عوام کو دہشت گردوں کے رحم و کرم پر چھوڑنے والے عناصر عوامی غیض و غضب سے نہ بچ سکیں گے۔
انہوں نے کہا کہ کرپٹ اور استحصالی نظام انتخاب عوام کو تحفظ دینے میں مکمل طور پر ناکام ہو چکا ہے۔ مصلحت کی زنجیروں سے آزاد ہو کر آ ہنی ہاتھوں سے دہشت گردی کے فتنے کا سر کچلنے کی ضرورت ہے۔ دہشت گردی پاکستان کے ماتھے کا بدنما داغ ہے اسکا خاتمہ ناگزیر ہے۔ انہوں نے بم دھماکوں میں جاں بحق ہونیوالوں کیلئے دعائے مغفرت اور زخمیوں کی جلد صحتیابی کیلئے دعا بھی کی۔
