تعلیم عام کیے بغیر ترقی کا خواب بھی نہ دیکھا جائے، جیدہ خان
Posted on August 30, 2013 By Geo Urdu لاہور
لاہور پاکستان مسلم لیگ پنجاب کی رکن صوبائی اسمبلی جیدہ خان نے کہا ہے کہ تعلیم عام کیے بغیر ترقی کا خواب بھی نہ دیکھا جائے مفت اور لازمی تعلیم کی فراہمی کے لیے قانون سازی کیے جانے کے حوالے سے اپوزیشن کی بات نہیں سنی جارہی آئین کے آرٹیکل 125 A کی روشنی میں گورنر پنجاب حکومت کو بل اسمبلی میں لانے کے لیے قائل کریں۔
انہوں نے اپوزیشن چیمبر میں اخبار نویسوں سے گفتگو کرتے ہوئے کہا کہ 5 سے 16 سال کی عمر کے بچوں کو مفت اور لازمی تعلیم فراہم کرنا ریاست کی ذمہ داری ہے، انہوں نے کہا کہ پاکستان مسلم لیگ پنجاب کے دور حکومت میں پڑھا لکھا پنجاب کے کامیاب پروگرام کے ذریعے میٹرک تک مفت تعلیم اور کتابیں فراہم کرکے شرح خواندگی میں ریکارڈ اضافہ کیا گیا۔
مگر افسوس 2008 ء کے بعد تعلیمی شعبہ میں نت نئے تجربات کرکے قیمتی وقت ضائع کرنے کے ساتھ ساتھ معیار تعلیم کو بھی گرا دیا گیا، انہوں نے کہا کہ تعلیمی ایمرجنسی کے فوائد تبھی ظاہر ہونگے جب آئین کے تحت قانون سازی بھی کی جائے گی، انہوں نے کہا کہ تعلیم کوعام کرنے کے لیے حکومت اور اپوزیشن کو مل کر کام کرنا چاہئیے کیونکہ یہ ہمارے ملک کے مستقبل کا معاملہ ہے اس پر کوئی سیاست نہیں ہونی چاہئیے۔
