کراچی : مجلس وحدت مسلمین پاکستان کے زیراہتمام ملک بھر میں جشن عید امیلادالنبی کے سلسلے میں گلگت بلستان اور آزاد کشمیر سمیت چاروں صوبوں کے تمام اضلاع میں ریلیوں کا انعقاد کیا گیا، اس موقع پر جلوسوں کے راستوں میں استقبالیہ کیمپس لگائے گئے اور عاشقان رسول پر گل پاشی کی گئی۔
ایم ڈبلیو ایم میڈیا سیل سے جاری تفصیلات کے مطابق، مجلس وحدت مسلمین کے سربراہ علامہ ناصر عباس نے سکھر میں جلوس میں شرکت کی، علامہ امین شہیدی نے راولپنڈی میں جبکہ چاروں صوبائی سیکرٹری جنرل نے صوبائی دارالحکومتوں میں شرکت کی اور اتحاد بین المسلمین کا عمل مظاہرہ پیش کیا، اسلام آباد کے سیکٹر جی ٹن سے برآمد ہونے والی ریلی میں علامہ اصغر عسکری نے وفد کے ہمراہ شرکت کی۔
ایم ڈبلیو ایم بلوچستان اسمبلی کے رکن آغا محمد رضا اور شوریٰ عالی کے رکن علامہ ہاشم موسوی نے کوئٹہ میں کندھاری امام بارگاہ سے میزان چوک تک نکالی جانیوالی ریلی کی قیادت کی۔مجلس وحدت مسلمین ضلع راولپنڈی کی جانب سے جامع مسجد روڈ پر استقبالیہ کیمپ لگایا اور نعت خوانی کے مقابلے کرائے گئے۔ اس موقع پر تحریک اسلام کے صدر علامہ حیدر علوی سمیت متعد سنی رہنماوں نے کیمپ کا دورہ کیا اور خطابات کیے۔ کیمپ میں مجلس وحدت مسلمین پنجاب کے ترجمان علامہ محمد اصغر عسکری اور ضلع راولپنڈی کی قیادت دن بھر موجود رہی۔
اس موقع پر اتحاد وحدت کا عظیم الشان مظاہرہ کیا گیا۔ کیمپ میں دن بھر نعت خوانی کے مقابلے کرائے گئے جس میں نعت خوانوں نے گلائے عقیدت کے پھول نچھاور کیے۔ مرکزی جلوس سے خطاب کرتے ہوئے ایم ڈبلیو ایم پنجاب کے ترجمان علامہ اصغر عسکری کا کہنا تھا کہ شیعہ سنی اتحاد ہی پاکستان کا اصل چہرہ ہے ، آج دشمن دیکھ لے کہ ہم ایک ہیں، شیعہ سنی میں کوئی تفریق نہیں چند مٹھی بھر تکفیری ملک کے امن کے درپے ہیں۔
انہوں نے کہا کہ پوری قوم ملٹری کورٹس کے قیام کا خیرمقدم کرتی ہے اور توقع کرتی ہے کہ قومی ایکشن پلان پر جلد عمل کیا جائیگا۔ انہوں نے کہا کہ نام بدل کرکے کام کرنے والی تمام کالعدم جماعتوں کو بین کیا جائے اور ان کی سرگرمیوں پر پابندی عائد کی جائے۔ انہوں نے کہاحضرت رسول خدا کی ذات مرکز وحدت ہے جس پر پوری امت مسلمہ متحد ہے۔
ضرورت اس امر کی ہے کہ ہم اس ہستی کی تعلیمات کو فروغ دیں اور دشمن کی سازشوں کو سمجھیں۔ علامہ حیدر علوی کا کہنا تھا کہ ہم پاک فوج کے ہر اقدام کی تائید کرتے ہیں اور توقع کرتے ہیں کہ دہشتگردوں کو عبرت کا نشان بنا دیا جائیگا۔نعت خوانی میں حصہ لینے والے نعت خوانوں میں ٹرفیاں تقسیم کی گئیں۔
پیرمحل میں بھی جشن عید میلاد النبی صلی اللہ علیہ وآلہ وسلم بھر پور مذہبی جوش و خروش اور عقیدت و احترام کے ساتھ منایا گیا
مصطفی آباد/ للیانی میں عید میلادالنبی صلی اللہ علیہ وآوسلم کے جلوس کی تصویری جھلکیاں، عوام کی بڑی تعداد شریک ہیں۔
