گمبیلا (جیوڈیسک) ایتھوپیا کی مغربی سرحد کے قریب مسلح ملزمان کی فائرنگ سے خواتین اور بچوں سمیت 160 افراد ہلاک اور درجنوں زخمی ہو گئے۔
غیر ملکی خبر رساں اداروں کے مطابق ایتھوپیا کی مغربی سرحد کے قریب گیمبیلا ریجن کے علاقے جاکاوا میں مسلح افراد نے دھاوا بول کر اندھا دھند فائرنگ کردی جس کے نتیجے میں خواتین اور بچوں سمیت 160 افراد ہلاک اور درجنوں زخمی ہو گئے۔ حملے میں زخمی ہونے والوں کو طبی امداد کے لئے قریبی اسپتالوں میں منتقل کردیا گیا تاہم متعدد افراد کی حالت تشویشناک ہونے کے باعث ہلاکتوں میں اضافے کا خدشہ ہے۔
ایتھوپیا کے وزیر برائے کمیونیکیشن کا کہنا ہے کہ جنوبی سوڈان کے مرلی قبائل سے تعلق رکھنے والے دہشت گردوں نے حملہ کیا تاہم فورسز کی جوابی کارروائی میں 60 حملہ آور بھی ہلاک ہوئے۔ ان کا کہنا تھا کہ حملہ آور متعدد بچوں کو اغوا کر کے اپنے ساتھ بھی لے گئے ہیں، حملہ آوروں کے تعاقب میں ایتھوپین فورسز جنوبی سوڈان میں بھی داخل ہو سکتی ہیں۔
اس حوالے سے ایتھوپیا میں تعینات سابق امریکی سفیر ڈیوڈ شن کا کہنا ہے کہ جنوبی سوڈان کے ساتھ واقع گمبیلا ریجن میں لسانی فسادات کی تاریخ بہت پرانی ہے اور اس سرحدی پٹی پر دونوں جانب مختلف تحریکیں معمول کی بات ہے۔ ان کا کہنا تھا کہ جنوبی سوڈان میں فسادات کی وجہ سے بڑی تعداد میں لوگ ایتھوپیا کی طرف ہجرت کرتے ہیں جب کہ باغی گروپ بھی گمبیلا کی جانب ہجرت کر سکتے ہیں۔ اس علاقے میں اکثر و بیشتر خونریز لڑائیوں کا ہونا بھی کوئی حیران کن بات نہیں ہے۔
سعودی عرب نے نائن الیون حملوں سے متعلق الزام کی صورت میں امریکا کو خبردار کردیا
افغانستان کے صدر اشرف غنی نے 120 ججوں کو برطرف کر دیا
