جرمنی (اصل میڈیا ڈیسک) جرمنی نے ترقی یافتہ اور ترقی کی دہلیز پر کھڑے ممالک کے گروپ جی ٹوئنٹی کے وزرائے خزانہ کے اجلاس میں دنیا کے غریب ترین ممالک کی مدد کے لیے تین بلین یورو دینے کا وعدہ کیا ہے۔ یہ بات جرمن وزارت خزانہ کی طرف سے بتائی گئی۔
برلن میں وفاقی جرمن وزارت خزانہ کی طرف سے ہفتہ اٹھارہ جولائی کی رات بتایا گا کہ چانسلر انگیلا میرکل کی حکومت نے تین بلین یورو (3.4 بلین ڈالر) کی یہ رقوم بین الاقوامی مالیاتی فنڈ (آئی ایم ایف) کو مہیا کرنے کا وعدہ کیا ہے۔ یہ رقوم آئی ایم ایف کے عالمی سطح پر غربت کے خاتمے اور ترقی میں مدد دینے سے متعلق ٹرسٹ (PRGT) کو مہیا کی جائیں گی، جن کو دنیا کے انتہائی غریب ممالک کو بہت آسان شرائط پر طویل المدتی قرضے دینے کے لیے استعمال کیا جائے گا۔
بین الاقوامی مالیاتی فنڈ کی مینیجنگ ڈائریکٹر کرسٹالینا گیورگیوا نے برلن حکومت کے اس اعلان کے بعد کہا کہ یہ جرمنی کی طرف سے ایک ‘بہت ہی فراخ دلانہ پیش کش‘ ہے، جس کی دیگر ترقی یافتہ ممالک کو تقلید کرنا چاہیے۔
اپریل کے مہینے میں آئی ایم ایف کی طرف سے کہا گیا تھا کہ اس فنڈ کو اس کے رکن ترقی یافتہ ممالک کی طرف سے عالمی سطح پر غربت کے خاتمے اور ترقی میں مدد کے ٹرسٹ کے لیے اربوں ڈالر کی رقوم کی فراہمی کے وعدے کیے گئے ہیں۔ ان رقوم کی مالیت 11.7 بلین ڈالر بتائی گئی تھی، اور ان مالی وسائل کی فراہمی کے وعدے آسٹریلیا، جاپان، کینیڈا، فرانس، برطانیہ اور اسپین کی طرف سے کیے گئے تھے۔
عجیب بات یہ ہے کہ اس پیش رفت میں امریکا نے اب تک حصہ نہیں لیا اور واشنگٹن کا عدم تعاون کئی ترقی یافتہ ممالک نے محسوس کیا ہے۔
جرمنی کے اعلان کے بعد پی آر جی ٹی کو دینے کے لیے اعلان کردہ فنڈز کی مالیت اب 15 بلین ڈلر سے زائد ہو گئی ہے۔
جرمن وزارت خزانہ کی طرف سے اس بارے میں کہا گیا ہے، ”ان رقوم سے بہت کم فی کس اوسط آمدنی والے ممالک کو بہت ہی آسان شرائط پر قرضے فراہم کیے جائیں گے اور یوں سرمایے کی کمی کی وجہ سے ایسی ریاستوں کو درپیش شدید مشکلات میں کمی کی کوشش کی جائے گی۔‘‘
وزارت خزانہ کے مطابق جرمنی 2020ء اور 2021ء میں بین الاقوامی سطح پر امداد کے لیے مجموعی طور پر 8.7 بلین یورو یا تقریباﹰ 10 بلین ڈالر کے برابر رقوم مہیا کرے گا۔
پاکستان کشمیری عوام کے حصول انصاف کی لڑائی میں ان کے ساتھ ہے: وزیراعظم
دنیا میں ایک دن میں کورونا کے سب سے زیادہ کیس: نیا ریکارڈ
