اک بار دیکھ لوں تو ستاتا ہے آئینہ

Posted on December 23, 2013 By Majid Khan آپکی شاعری

Mohammad Kaleem Zia

اک بار دیکھ لوں تو ستاتا ہے آئینہ
بیتے دِنوں کی یاد دلاتا ہے آئینہ

گر وقت ہو برا تو گراتا ہے آئینہ
ورنہ گرے ہوؤں کو اٹھاتا ہے آئینہ

بد صورتی پہ اپنی ترس کیوں نہ آئے گا
جب بار بار کوئی دکھاتا ہے آئینہ

انساں کی صحبتوں نے اُسے بھی سِکھا دیا
چہروں پہ خوب چہرے چڑھاتا ہے آئینہ
اُس وقت کائنات کا عالم نہ پو چھیے
جب پتھروں سے آنکھ ملاتا ہے آئینہ

باطن کو کچھ خبر ہے نہ ظاہر پہ کچھ عیاں
کچھ راز اس طرح بھی چُھپاتا ہے آئینہ

جو داغ میرے چہرے پہ تھے ہی نہیں کبھی
اکثر وہ داغ مجھ کو دِکھاتا ہے آئینہ

سچ پو چھیے تو چہروں پہ لکّھا نہیں ہے کچھ
اپنے ہی دل کی بات بتاتا ہے آئینہ

ہر کو ئی اس ہنر سے تو واقف نہیں مگر
بد صورتوں کا بوجھ اُٹھاتا ہے آئینہ

محفل میں سب سے آنکھیں چُراتا ہے گو ضیا
تنہائیوں میں ساتھ نبھاتا ہے آئینہ

شاعر : ڈاکٹر کلیم ضیا

Nasir Mehmood - Chief Editor at GeoURDU.com