بکرا بولا

Posted on September 29, 2014 By Majid Khan کالم

Bakra

تحریر:امتیاز علی شاکر: لاہور
تنگیِ حالات نے سوچنے پر مجبور کر دیا کہ اس سال قربانی نہ کی جائے لیکن مولوی صاحب کے بیان نے قربانی ابراہیم علیہ السلام کی یاد تازہ کی تو دل سے آواز آئی کہ ساراسال تیرے معاملات چل سکتے ہیں تو پھر سنت ابراہیمی کیوں پوری نہیں ہو سکتی؟ بچوں کی عیدی، کپڑوں اور جوتوں کا بجٹ لے کر بکرا خریدنے بکرا منڈی پہنچے جہاں ہزاروں کی تعداد میں بکروں کو دیکھ کر دل میں تمنا پیدا ہوئی کہ سارے بکرے خرید کر اللہ تعالیٰ کی راہ میں قربان کر دوں۔جیب نے فوری طور پر دل کی خواہش کو رد کرتے ہوئے صدا دی تیرے پاس اتنی رقم نہیں ہے اس لئے صرف ایک بکرا خریدنے کی کوشش کرو سو ہم نے باقی تمام خواہش کے قبرستان میں ایک اور خواہش دفن کردی اور ایک بکرا خریدنے کی کوشش کرنے میں مصروف ہو گئے۔مولوں صاحب نے فرمایا تھا کہ قربانی کیلئے صحت مند، بے داغ اور سب سے خوبصورت جانور کا انتخاب کرنا چاہئے۔

منڈی میں موجود بکروں میں سب سے زیادہ خوبصورت بکرے کی قیمت 3لاکھ سے اُوپرنکلی جبکہ اپنی جیب میں تو بامشکل 15ہزارتھے سو ہم نے سب سے زیادہ خوبصورت بکرا خریدنے کی تمنا بھی وہیں دفن کردی جہاں سارے بکرے خریدنے کی تھی اوراپنے بجٹ کے مطابق بکرا خریدنے کا ارادہ کرتے ہوئے تلاش شروع کردی ۔تقریبا ساری منڈی گھومنے کے بعد ایک ایسا بکرا ملا جو بجٹ کے قریب تھا ۔وہ بھی قریب تھا بجٹ میں نہ تھا ۔بکرے کے مالک کو منانے کی بہت کوشش کی وہ بکرا 15ہزار میں دے دے پروہ اپنے بکرے کو 18ہزار سے کم فروخت کرنے پر آمادہ نہ ہوا میرے بہت اسراپر بولا بھائی آپ بکرے سے پوچھ لو اگر وہ 15ہزار میں قربان ہونے پر تیار ہے تو لے جائو ورنہ میں آپ کے ساتھ مزید بحث نہیں کرسکتا ۔میں نے بکرے والے سے سوال کیا جب آپ انسان ہوکر میری بات نہیں سمجھ سکتے تو بے چارہ بے زبان بکرا کہاں سے سمجھے گا؟وہ بولا بھائی قربان تو بکرے نے ہی ہونا ہے پھر بھی اُسے بولنے کا کوئی حق نہیںاتنی دیر میںبکرا یوں بولا جیسے مجھے مخاطب کرکے کہہ رہا ہو۔بکرابولا ابھی عید میںکچھ دن باقی ہیں اگر میں 15ہزار میں قربان ہونے کی حامی بھر بھی لو تب بھی تیرے لئے مشکل ہوجائے گی کیونکہ تیرے پاس صرف 15ہزار ہیں جومیرے مالک کودینے کے بعد تو کنگال ہوجائے گا جبکہ میرا ایک دن کا معمولی سا چارہ بھی آج کل چار،پانچ سو روپے کا ملے گا۔اور تم اپنی حالت دیکھو،تمہیں دیکھ کرتو لگتا ہے کہ یہ 15ہزار بھی کسی سے مانگ کرلائے ہو۔بکرے کی بات سن کراپنی حالت پر غور کیاتو واقع ہی حالت بہت بُری ہوچکی تھی جانور منڈی میں دھکے کھاتے تین چار گھنٹے گزر چکے تھے ۔کپڑوں جوتوں پر بے حد گرد جم چکی تھی سر میں ہاتھ پھیرا تو بالوں میں سے گرد دھویں کی مانند اُڑنے لگی۔

میں نے بکرے سے التجاء کی اورکہا بکرا بھائی مجھے سنت ابراہیمی پر عمل کرنا ہے اور میرے پاس صرف 15ہزار ہیں ساری منڈی گھوم لی تیری قیمت سے کم قیمت والا کوئی بکرا نہیں ملااس لئے تیری بڑی بڑی مہربانی ہوگی اگر تو 15ہزار میں مان جائے،بکرا بولا پہلے تو میں تیرا بھائی نہیں ہوں۔ تو اپنے بھائی کی قربانی کرنے کی ہمت رکھتا ہے تو بکرا منڈی کیالینے آیا ہےَ؟جااپنے گھر عید پر اپنے بھائی کی قربانی کرکے سنت ابراہیمی پر عمل کر،میں منڈی میں سب سے کم قیمت بکرا ہوں اس لئے مجھے غریب سمجھ کر قربان کرنا چاہتے ہو؟جائو جائو اب تم چاہئے 18کی بجائے 20ہزار بھی دو تب بھی میں تیرے ساتھ نہیں جائوں گا،جاکسی اور بکرے سے بات کر اور ہاں سن آئندہ کسی بکرے کو بھائی مت کہنا ورنہ سارے بکرے میری طرح شریف نہیں ہوتے۔

Bakra Eid Qurbani

میں نے بکرے سے معذرت کرتے ہوئے کہا ٹھیک ہے اب بھائی نہیں کہوں گا تم مان جائو۔بکرا بولا معاف کیا لیکن تم ایک بار مجھے بھائی کہہ چکے ہو اس لئے میں تمہارے ساتھ نہیں جائوں گا ،تم انسان اپنے بھائیوں کے ساتھ بکروں سے بھی زیادہ بُرا سلوک کرتے ہو،انسانوں کی دنیا میں انسان کی کوئی قیمت نہیں لیکن میں بکرا ہوں اور میری ایک قیمت ہے ،دیکھواپنے آپ کو کیا تم نے کبھی اتنے اخلاق کے ساتھ اپنے ماں باپ اور بہن بھائیوں سے بات کی ہے جتنا میرے مالک اور میرے ساتھ کررہے ہو؟بکرے کی حقائق پر مبنی باتیں سن کر میرے اندر سکت نہ رہی کہ میں مزید بکرا تلاش کرتا سو چُپکے سے گھر چلا آیا اور گائے کی اجتمائی قربانی میں حصہ ڈال دیا ۔مولوی صاحب کے بیان کو مدنظر رکھتے ہوئے سنت ابراہیمی تو ادا ہوجائے گی پر بکرے کی سچی باتیں سن کر پیدا ہونے والا احساس شرمندگی شاید کبھی ختم نہ ہوپائے کیوں کہ یہ حقیقت ہے کہ ہم انسان ایک دوسرے کی قدر نہیں کرتے اور اپنے بھائیوں کو گاجر مولی کی طرح کاٹ رہے ہیں۔پہلے قربانی عید پر چاروں طرف جانوروں کاخون دیکھ کرہم خوش ہواکرتے تھے کہ مسلمانوں نے بڑی قربانیاں کی ہیں۔

اب تو سارا سال ہی خون کی ندیاں بہتی رہتی ہیں وہ بھی انسانی خون کی۔ہم نے کبھی نہیں سوچا کہ جس کیلئے اللہ تعالیٰ نے کائنات میں بے شمار نعمتیں پیدا فرمائی جس کو ساری مخلوقات سے افضل بناکر دنیا میں بھیجا اور اشرالمخلوقات کا شرف بخشا وہ انسان اپنی اصلیت کو بھول کر جانوروں کی طرح زندگی بسر کررہا ہے یہاں تک کہ اب تو بکرے بھی انسان کو طعنہ دیتے ہیں کہ وہ بکرے ہیں انسان نہیں۔افضل ہونے کے باوجود انسان کی کوئی قدروقیمت نہیں اور بکروں کی قیمتیں آسمان کو چھو رہی ہیں ۔بکروں کی قدر وقیمت دیکھ کر دل کرتا ہے کہ کاش میں بھی بکرا ہوتا تو میری بھی کوئی قیمت ہوتی ،قربانی عید پر مجھے بھی کوئی خریدنے آتا۔

انسان کا تو فروخت ہونا بھی ممکن نہیں ،عمرگزری گلے میں برائے فروخت کا کارڈ لٹکائے پھرتے ہیں پربجائے قیمت ملنے کہ لوگ پوچھتے ہیں ،تمہیں خریدنے کا کیا فائدہ ؟پہلے اپنی روٹی پوری نہیں ہورہی تو تمہیں کہاں سے کھلائیں گے؟اس دعا کے ساتھ کہ اللہ تعالیٰ ہمیں قربانی عید کی خوشیاں حقیقی طور پر منانے کی توفیق و طاقت عطا فرماے،اہل وطن کو راقم کی طرف سے دل کی گہرائیوں سے عید مبارک۔