حکومت اپنا مؤقف بھرپور انداز میں پیش کرنے میں ناکام رہی ہے۔ حسن ظفرنقوی

Posted on November 1, 2013 By Majid Khan سٹی نیوز

مجلس وحدت مسلمین کے مرکزی ترجمان علامہ حسن ظفرنقوی نے کہا ہے کہ وزیراعظم نوازشریف کے دورہ امریکہ کے باوجود امریکی ڈرون حملوں کا جاری رہنا اس بات کا ثبوت ہے کہ حکومت اپنا مؤقف بھرپور انداز میں پیش کرنے میں ناکام رہی ہے اور وہ عناصر جو اس دورے کو کامیاب قرار دے دہے تھے ، حالیہ ڈرون حملے نے ان کے دعوؤں کی دھجیاں بکھیر دی ہیں۔ وحدت سیکرٹریٹ اسلام آباد سے جاری بیان میں مرکزی ترجمان نے وزیرداخلہ چودھری نثار علی خان کی جانب سے سینیٹ میں ڈرون حملوں سے متعلق پیش کی گئی جھوٹی رپورٹ کی بھی شدید مذمت کی ہے اور کہا ہے کہ اگر ان حملوں میں فقط دہشتگرد ہی نشانہ بن رہے ہیں تو پھر امریکہ سے نوازحکومت کیوں حملے بندکرنے کا مطالبہ کررہی ہے؟۔ دراصل ڈرون حملوں پر حکومت اور امریکہ ایک پیج پر ہیں یہ فقط عوام کو گمراہ کیا جا رہا ہے۔ مرکزی ترجمان کا کہنا تھا کہ دہشتگردی اور طالبان سے مذاکرات سمیت دیگر ایشوز پر نواز حکومت کنفیوژ ہے جس کے باعث واضح پالیسی اختیار نہیں کی جا رہی۔

اپنے بیان میںعلامہ حسن ظفرنقوی نے پیٹرولیم مصنوعات کی قیمتوں میں معمولی کمی کی بھی شدید مذمت کی ہے اور کہا ہے کہ حکومت عالمی سطح پر پیٹرولیم مصنوعات کے نرخوں میں کمی کا فائدہ عوام کو منتقل نہیں کررہی۔ ان کا کہنا تھا کہ عالمی مارکیٹ میں تیل کی قیمتیں ایک سو دو ڈالر تک پہنچ گئی ہیں جبکہ پاکستان میں فقط چند پیسوں کی کمی کرکے عوام کو لالی پاپ دیا جارہا ہے۔ انہوں نے مطالبہ کیا کہ قیمتوں میں کمی کو عالمی نرخوںکے مطابق کیا جائے تاکہ عوام کو ریلیف مل سکے۔

by Majid Khan

Nasir Mehmood - Chief Editor at GeoURDU.com