مکہ (جیوڈیسک) سعودی عرب کے مقدس شہر مکہ میں حج کی مذہبی رسومات کا آغاز نو اگست سے ہو گیا ہے۔ رواں برس حج میں شریک مسلمان افراد کی تعداد بیس لاکھ کے لگ بھگ بتائی گئی ہے۔
رواں برس کے حج کے دوران سعودی حکام ملکی اور غیر ملکی زائرین کو مسلسل متنبہ کر رہے ہیں کہ وہ کسی بھی قسم کی سیاسی بحث یا اجتماع میں شریک ہونے سے اجتناب کریں۔ زائرین کو یہ تاکید بھی کی جا رہی ہے کہ وہ اپنی پوری توجہ حج کی عبادت پر مرکوز رکھیں۔
سعودی وزارت داخلہ کی جانب سے یہ بھی کہا گیا ہے کہ حکومت تمام زائرین کی سلامتی کو یقینی بنانے کو اول ترجیح دیتی ہے تا کہ تمام زائرین پرسکون اندر سے عبادت کر سکیں۔
سعودی عرب کی وزارت حج کے مطابق رواں برس سہولیات کے تناظر میں حج کرنے والوں کی تعداد گزشتہ برس کے مقابلے میں کم ہے۔ یہ امر اہم ہے کہ سن 2019 کا حج ایسے وقت میں ہو رہا ہے جب ایران اور امریکا کے درمیان خلیج فارس میں شدید کشیدگی پائی جاتی ہے۔
مسجد الحرام سے سات کلومیٹر کی مسافت پر واقع مقام منیٰ کی وادی میں بیس لاکھ کے قریب مسلمان جمع ہو چکے ہیں۔ وہ تین روزہ حج کی مذہبی عبادات میں شریک ہوں گے۔ ان زائرین میں اٹھارہ لاکھ غیر ملکی مسلمان ہیں۔ یہ مسلمان پیدل، بسوں اور ذاتی موٹر کاروں کے ذریعے منیٰ پہنچے ہیں۔
مسلمان نو اگست کی رات منیٰ میں قائم عارضی خیموں میں قیام کریں گے۔ اس مقصد کے لیے سعودی حکومت نے منیٰ کے قرب و جوار میں خیموں کا ایک شہر آباد کر رکھا ہے۔ ان خیموں میں بیک وقت چھبیس لاکھ مسلمان قیام کر سکتے ہیں۔ اس خیموں کے شہر کی سکیورٹی کے خصوصی انتظامات بھی کیے گئے ہیں۔
کل ہفتہ دس اگست کی صبح وادی منیٰ سے حج کی عبادت میں شریک مسلمان میدان عرفات کی جانب روانہ ہو جائیں گے۔ یہ امر اہم ہے کہ میدان عرفات میں قیام اور نماز ظہر و عصر کی ادائیگی کے ساتھ ساتھ خطبہ سننا حج کا فرض اکبر تصور کیا جاتا ہے۔ عرفات کا پہاڑ اور میدان مکہ سے بیس کلومیٹر کی مسافت پر ہے۔ اسی مقام پر چودہ صدیاں قبل پیغبر اسلام نے اپنے ساتھیوں سے تاریخی خطاب کیا تھا۔
میدان عرفات میں وقوف کے بعد تمام زائرین کو شام سے پہلے تک ایک اور مقام مزدلفہ پہنچنا ہوتا ہے۔
رواں برس حج کی مذہبی رسومات کا باقاعدہ اختتام منگل کو ہو گا لیکن ابتدائی تین ایام بہت ضروری، لازمی اور قدرے مشکل تصور کیے جاتے ہیں۔ تاہم بقیہ دو ایام کسی حد تک آرام دہ خیال کیے جاتے ہیں۔
بھارت میں مذہبی بنیاد پر ہلاکتیں بڑھتی ہوئیں
کشمیر پر پاکستانی موقف کی تباہی کے ذمہ دار عمران خان ہیں۔ مریم نواز
