مشیر خارجہ سرتاج عزیز نے کہا ہے کہ کنٹرول لائن کشیدگی کا معاملہ وزیراعظم نواز شریف اور ان کے بھارتی ہم منصب منموہن سنگھ کی نیویارک میں ہونے والی ملاقات میں اٹھایا جائے گا۔
اسلام آباد میں سینیٹ کی خارجہ اور دفاعی کمیٹی کے مشترکہ اجلاس کو بریفنگ دیتے ہوئے وزیراعظم کے مشیر برائے امور خارجہ قومی سلامتی سرتاج عزیز نے کہا کہ بھارت کی جانب سے کنٹرول لائن پر مسلسل فائرنگ تشویش ناک ہے۔ انہوں نے کہا کہ کنٹرول لائن پر کشیدگی سے اب تک گیارہ افراد شہید اور تیس سے زائد زخمی ہوچکے ہیں۔ شہید ہونے والوں میں آٹھ فوجی شامل ہیں۔
انہوں نے کہا کہ بھارت میں انتخابی مہم کے دوران پاکستان دشمنی کو استعمال کرنا افسوسناک ہے اور وہاں نئی حکومت کے قیام تک تعلقات میں بہتری کا امکان نہیں۔ سرتاج عزیز نے کمیٹی کو امریکی وزیر خارجہ جان کیری اور افغان صدر حامد کرزئی کے دوروں پر بھی بریفنگ دی۔
انہوں نے کہا کہ جان کیری کے دورے میں پاک امریکا اسٹریٹیجک مذاکرات رواں سال کے آخر میں شروع کرنے پر اتفاق کیا گیا ہے۔ انہوں نے کہا کہ حکومت نے صدر کرزئی کو یقین دہائی کرائی ہے کہ پاکستان افغانستان کے اندرونی معاملات میں مداخلت نہیں کرے گا اور افغانستان میں مفاہمتی عمل کی حمایت کریں گے اور کسی بھی گروہ کی حمایت نہیں کریں گے۔
کراچی کے حالات پر وزیر اعظم اور سیاسی جماعتوں کا اجلاس، اہم فیصلے متوقع
وزیر اعظم کا فاروق ستار سے ون آن ون ملاقات کا فیصلہ
