مقبوضہ بیت القدس (جیوڈیسک) بھارتی وزیر اعظم نریندر مودی نے آزاد فلسطینی ریاست کی حمایت کا اعادہ کرتے ہوئے کہا ہے کہ بھارت مذاکرات کے ذریعے فلسطین کو خود مختار ریاست دیکھنا چاہتا ہے۔
بین الاقوامی میڈیا رپورٹس کے مطابق بھارتی وزیر اعظم نریندر مودی تاریخی دورے پر فلسطین پہنچ گئے جہاں انہوں نے مقبوضہ مغربی کنارے کے شہر راملہ میں فلسطینی حکام سے ملاقاتیں کیں۔ فلسطینی صدر محمود عباس سے ملاقات میں مسئلہ فلسطین کے پرامن حل پر زور دیا جب کہ دوطرفہ تعلقات میں توسیع سمیت باہمی دلچسپی کے امور پر تبادلہ خیال کیا۔
فلسطینی صدر سے ملاقات میں نریندر مودی نے آزاد فلسطینی ریاست کی حمایت کرتے ہوئے کہا کہ بھارت چاہتا ہے کہ فلسطین بات چیت کے ذریعے ایک آزاد اور خودمختار ریاست بنے۔
اپنے ٹوئٹر پیغام میں بھارتی وزیر اعظم نے کہا کہ مشکل حالات میں بھی فلسطین اور بھارت کی دوستی قائم رہی، فلسطینی عوام نے بہت سے چیلنجز کا دلیری اور بہادری سے ڈٹ کرمقابلہ کیا جب کہ بھارت مستقبل میں بھی ہمیشہ فلسطین کی ترقی کے سفر کی حمایت کرتا رہے گا۔
قبل ازیں نریندر مودی نے فلسطینی وزیراعظم رمی حمداللہ سے ملاقات کی اور ان کے ہمراہ یاسر عرفات عجائب گھر کا دورہ بھی کیا۔
واضح رہے کہ نریندر مودی پہلے بھارتی وزیراعظم ہیں جنہوں نے مقبوضہ فلسطینی علاقوں کا دورہ کیا ہے۔
اتنا سیاسی یتیم نہیں کہ جونیئر کو سر یا میڈم کہوں: نثار کا مریم کے ماتحت کام کرنے سے انکار
محسود قبائل کا دھرنا ختم، حکومت کی 1 ماہ میں مطالبات پورے کرنیکی یقین دہانی
