گرتی سرمایہ کاری سے ٹیکسٹائل مشینری کی درآمد 26 فیصد گھٹ گئی

Posted on August 10, 2015 By Majid Khan کاروبار, کراچی

Textile Machine

کراچی (جیوڈیسک) پاکستان کی اہم ترین برآمدی صنعت ٹیکسٹائل کے شعبے میں سرمایہ کاری تیزی سے کم ہورہی ہے مقامی صنعت کو توانائی کے بحران، بلند پیداواری لاگت اور بین الاقوامی سطح پر قیمتوں میں کمی کی وجہ سے سخت مسابقت کا سامنا ہے جس کی وجہ سے ٹیکسٹائل سیکٹر کو نئی ٹیکنالوجی کے ذریعے متوازن، جدید بنانے اور پرانی مشینری کی جگہ جدید مشینری لگانے کا رجحان بھی کم ہورہا ہے۔

اس کے برعکس ملک میں توانائی کے بحران کی وجہ سے پاور جنریٹنگ مشینری جبکہ موبائل فون کی طلب میں اضافے کی وجہ سے موبائل فون کی درآمدات میں تیزی سے اضافہ ہورہا ہے۔

مالی سال 2014-15کے دوران درآمدات کے اعدادوشمار کے مطابق گزشتہ مالی سال ٹیکسٹائل سیکٹر کے لیے مشینری کی درآمد مالی سال 2013-14کے مقابلے میں 26فیصد تک کم رہی۔ مالی سال 2013-14کے دوران 61ارب 57کروڑ روپے کی ٹیکسٹائل مشینری درآمد کی گئی تھی جبکہ مالی سال 2014-15کے دوران 45ارب 50کروڑ روپے کی مشینری درآمد کی گئی ہے۔

اسی عرصے میں پاور جنریٹنگ مشینری کی درآمد میں 25فیصد اضافہ ہوا ہے اور مالی سال 2014-15کے دوران 139ارب روپے کے جنرینٹرز درآمد کیے گئے ہیں مالی سال 2013-14 کے دوران 112ارب روپے کے جنریٹرز درآمد کیے گئے تھے پاکستان کے قیمتی زرمبادلہ کا بڑا حصہ موبائل فون کی درآمد پر خرچ ہورہا ہے جس کی درآمدات میں بھی تیزی سے اضافہ ہورہا ہے مالی سال 2013-14 کے دوران 63ارب روپے کے موبائل فون درآمد کیے گئے تھے جبکہ مالی سال 2014-15کے دوران 73ارب روپے زائد کے موبائل فونز درآمد کیے گئے ہیں۔

زراعت کے شعبے کے لیے مشینری کی درآمد میں ایک سال کے دوران 43فیصد اضافہ ہوا ہے تاہم زرعی مشینری کی درآمد 10ارب روپے تک محدود ہے۔