عراق (اصل میڈیا ڈیسک) امریکی صدر ڈونلڈ ٹرمپ نے شام میں ایک خصوصی امریکی آپریشن میں داعش کے سربراہ ابو بکر البغدادی کی ہلاکت کی تصدیق کر دی ہے۔ متعدد معاملات میں تنقید کے شکار امریکی صدر کی ساکھ، اس پیش رفت سے کافی بہتر ہو گی۔
امریکی صدر ڈونلڈ ٹرمپ نے مشرق وسطی میں سرگرم شدت پسند تنظیم اسلامک اسٹیٹ کے سربراہ ابو بکر البغدادی کی ہلاکت کی تصدیق کر دی ہے۔ ٹرمپ نے اتوار کو اپنے ایک خصوصی خطاب میں بغدادی کی ہلاکت سے متعلق خبروں کی تصدیق کی۔
انہوں نے بتایا کہ داعش کے سربراہ کو خصوصی امریکی دستوں نے گزشتہ روز شمال مغربی شام میں انسداد دہشت گردی کی ایک کارروائی میں ہلاک کیا۔ یہ کارروائی دو گھنٹوں تک جاری رہی اور اس میں امریکی افواج کا کوئی اہلکار ہلاک نہیں ہوا۔ ٹرمپ نے مزید بتایا کہ بغدادی کی ہلاکت کے بعد متعلقہ کمپانڈ سے حساس معلومات و مواد امریکی فورسز نے اپنی تحویل میں لے لیا ہے۔
ابو بکر البغدادی کی ایک امریکی فوجی آپریشن میں ہلاکت کی خبریں آج صبح ہی سے دنیا بھر میں ذرائع ابلاغ کی توجہ کا مرکز بنی ہوئی تھیں۔ اپنی شناخت مخفی رکھنے کی شرط پر ایک امریکی سکیورٹی اہلکار نے بھی بتایا تھا کہ بغدادی کو ہلاک کر دیا گیا ہے۔ ترکی نے بھی عندیہ دیا تھا کہ اس آپریشن میں امریکی دستوں کی معاونت کی گئی۔
صدر ٹرمپ نے اپنے بیان میں کہا کہ بغدادی بزدلوں والی اور ایک کتے کی موت مرا۔ معاونت پر انہوں نے عراقی حکومت کی بھی تعریف کی۔ امریکی صدر نے بالخصوص ان فوجیوں کو خراج تحسین پیش کیا، جنہوں نے اس آپریشن میں حصہ لیا۔ ان کے بقول یہ ایک انتہائی خطرناک آپریشن تھا اور انہوں نے اس آپریشن مناظر براہ راست دیکھے۔
پاکستان کا مودی کو فضائی حدود کے استعمال کی اجازت نہ دینے کا فیصلہ
فرانس میں ہائی الرٹ، البغدادی کی موت کے بعد انتقامی حملے ہو سکتے ہیں: وزیر داخلہ
