اسلام آباد (اصل میڈیا ڈیسک) پاکستان تحریک انصاف کے رہنما جہانگیر ترین اور ان کے حامی اراکین اسمبلی نے شوگر اسکینڈل کی تحقیقات کے حوالے سے عید کے بعد اپنا لائحہ عمل طے کرنے کا فیصلہ کیا ہے۔
ذرائع کے مطابق جہانگیر ترین گروپ کے اراکین پارلیمنٹ نے مشاورت کے بعد فیصلہ کیا ہے کہ وزیراعظم عمران خان کے نامزد کردہ سینیٹر علی ظفر ایڈوکیٹ کی تحقیقات کا انتظار کیا جائے گا، عید کے بعد ٹکٹ ہولڈرز اور اراکین پارلیمنٹ سے مشاورت کی جائے گی اور پھر آئندہ کا لائحہ عمل طے کیا جائے گا۔
ذرائع کے مطابق علی ظفر ایڈووکیٹ کی ترین گروپ کے وکلاء اور اکاؤنٹنٹ سے ملاقات بھی ہوئی ہے جس میں انہوں نے کیس سے متعلق جہانگیر ترین کی ٹیم کا مؤقف سن لیا ہے۔
ذرائع کا یہ بھی بتانا ہے کہ علی ظفر ایڈووکیٹ ایف آئی اے اور تفتیشی ٹیم سے بھی ملاقات کر چکے ہیں۔
دوسری جانب ذرائع کا کہنا ہے کہ مزید 4 اراکین قومی اسمبلی نے جہانگیر ترین سے رابطہ کیا ہے۔
خیال رہے کہ جہانگیر ترین اور ان کے بیٹے علی ترین کے خلاف آج کیس کی سماعت کے دوران بھی جہانگیر ترین کے وکیل نے مؤقف اختیار کیا تھا کہ نئی ٹیم کیس کی تحقیقات کر رہی ہے، ہمیں موقع دیا جائے تاکہ ہم تفتیش کا حصہ بنیں۔
موجودہ دور دیگر شعبوں کی طرح میڈیا کیلئے بھی سیاہ ترین ہے: شہباز شریف
’ماڈلنگ سے قیمتوں میں کمی نہیں آتی‘ مریم کی وزیراعظم کے بازار کے دورے پر تنقید
