کراچی (جیوڈیسک) کراچی میں سخی حسن چورنگی کے قریب نامعلوم افراد کی فائرنگ سے پاک سر زمین پارٹی (پی ایس پی) کے رہنما اور چیمبر آف کامرس کے رکن عبدالحبیب جاں بحق ہو گئے، آئی جی سندھ نے واقعے کی رپورٹ طلب کر لی۔
سخی حسن چورنگی کے قریب ٹارگٹ کلنگ کا نشانہ بننے والے شخص کی شناخت عبدالحبیب کے نام سے ہوئی ہے۔ پولیس کے مطابق نامعلوم ملزمان نے ان کی گاڑی پر پانچ سے چھ گولیاں فائر کیں جو دو نائن ایم ایم پستولوں سے چلائی گئیں۔
مقتول کے پاس سے کراچی چیمبر آف کامرس کا کارڈ ملا ہے، تفتیشی ذرائع کے مطابق دو موٹر سائیکلوں پر چار ملزمان نے واردات کی، ملزمان پینٹ شرٹ میں ملبوس تھے، دو نے ہیلمٹ پہنے ہوئے تھے۔
فائرنگ کی جگہ سے جیوفینسنگ اور گاڑی کی فرانزک کروائی جائے گی جبکہ جائے وقوع کے اطراف سی سی ٹی وی کیمروں کی فوٹیج بھی حاصل کی جا رہی ہے۔
ترجمان پی ایس پی کے مطابق حبیب پی ایس 122 سے پی ایس پی کے امیدوار تھے جبکہ چیئرمین پی ایس پی مصطفیٰ کمال نے قتل کی مذمت کرتے ہوئے ملزمان اور سہولت کاروں کی جلد گرفتار کا مطالبہ کیا ہے۔
آصف حسنین اور پی ایس پی کے دیگر رہنما بھی اسپتال پہنچے اور مقتول کے اہل خانہ سے تعزیت کی۔
آئی جی سندھ ڈاکٹر کلیم امام نے ایس ایس پی سینٹرل سے تفصیلی انکوائری رپورٹ طلب کر لی ہے جبکہ وزیراعلیٰ سندھ نے بھی ایڈیشنل آئی جی سے رپورٹ طلب کی اور قاتلوں کی جلد گرفتاری کی ہدایت کی ہے۔
یادیو کیس من گھڑت معلومات پر مبنی ہے، بھارتی وکیل کے دلائل
پلوامہ حملہ، سوشل میڈیا پر ’جنگ‘ جاری
