کراچی (جیوڈیسک) شہر میں انسانی لاشے ملنے کا سلسلہ تھم نہیں سکا۔ ایک گھنٹے میں چار افراد کو موت کے گھاٹ اتار دیا گیا۔ قائد آباد مدینہ ٹاؤن سے 2 تشدد زدہ لاشیں ملی ہیں۔ پولیس کے مطابق مقتولین کو اغواء کے بعد تشدد اور فائرنگ کر کے ہلاک کیا گیا۔
دونوں افراد کی شناخت نہیں ہو سکی۔ سرجانی ٹاؤن تھانے کے علاقے یارو گوٹھ کے قریب ایک گاڑی میں سے دو افراد کی ہاتھ پاؤں بندھی لاشیں ملی ہیں جس میں سے ایک لاش کی شناخت نیو کراچی کے دانش کی نام سے ہو گئی ہے۔ اورنگی ٹاؤن پاکستان بازار میں نامعلوم افراد کی فائرنگ سے ایک شخص جان کی بازی ہار گیا۔
اورنگی ٹاون ہی کی رئیس امروہوی کالونی میں فائرنگ سے بس کنڈکٹرصابر جاں بحق ہو گیا۔ لیاری کے علاقے کلری میں پولیس اور گینگ وار ملزموں کے درمیان مبینہ مقابلے میں گینگ وار کے دو کارندے مارے گئے۔ پولیس مقابلے کے بعد ایک ملزم کو گرفتار بھی کر لیا گیا ۔ ملزموں کے قبضے سے اسلحہ برآمد ہوا ہے۔ دوسری جانب کرائم برانچ 2 نے مزار قائد کے قریب سے گینگ وار کے دو کارندوں کو گرفتار کر لیا۔
پولیس کے مطابق ملزمان قتل سمیت دیگر مقدمات میں مطلوب تھے۔ ادھر جرائم پیشہ افراد کی سر کوبی کے لئے منگھو پیر کنواری کالونی میں رینجرز نے سرچ آپریشن کیا۔ رینجرز نے علاقے کے داخلی اور خارجی راستوں کو سیل کر کے گھر گھر تلاشی لی خواتین سمیت 300 اہلکاروں نے آپریشن میں حصہ لیا۔ دوران تلاشی متعدد مشتبہ افراد کو حراست میں لے لیا گیا ہے۔
مہمند ایجنسی : بارودی سرنگ دھماکے میں شہید اہلکاروں کی تعداد 6 ہوگئی
کوئٹہ اور پشین سمیت بلوچستان کے مختلف علاقوں میں زلزلے کے جھٹکے
