کراچی (جیوڈیسک) کئی گھنٹے گزرنے کے باوجود کراچی کے پرانا حاجی کیمپ میں ٹمبر مارکیٹ میں لگنے والی آگ پر تاحال قابو نہیں پایا جاسکا، نہ ہی آگ کی شدت میں کمی آئی ہے، آگ نے قریبی عمارتوں کوبھی لپیٹ میں لے لیا ہے، آگ پر قابو پانے کے لیے شہر بھر کے فائر ٹینڈرز طلب کرلیے گئے جو کہ آگ بجھانے مصروف ہیں لیکن گاڑیوں میں پانی ختم ہوجانے کے باعث آگ بجھانے میں مشکلات کا سامنا ہے۔ کراچی کے پرانا حاجی کیمپ میں لکڑیوں کے ایک گودام میں رات ایک بجے کے بعد اچانک آگ بھڑک اٹھی، جس نے قریبی عمارتوں کو بھی اپنی لپیٹ میں لے لیا، قریبی رہائشی عمارتوں میں موجود لوگوں نے بمشکل اپنی جان بجائی، آگ سے متاثرہ گودام کے قریب ایک عمارت میں دو بزرگ افراد کافی دیر تک محصور رہے
جنہیں اہل علاقہ نے اپنی مدد آپ کے تحت نکالا، تنگ گلیوں کے باعث بھی فائر بریگیڈ کے عملے کو آگ بجھانے میں مشکلات کا سامنا رہا، ایسی صورت حال میں اسنارکل بھی کارگر ثابت نہ ہوسکی، فائر بریگیڈ کی گاڑیوں میں پانی ختم ہونے کے باعث ایک موقع پر امدادی کارروائی میں تعطل بھی آیا، آگ لگنے کےکچھ دیر بعد علاقے کی بجلی بھی بند ہوگئی جس سے امدادی کاموں میں مشکلات کا سامنا رہا۔
چیف فائر آفیسر احتشام الدین نے جیو نیوز سے گفتگو میں کہاکہ ٹمبر مارکیٹ کی تنگ گلیوں اورتیز ہوا کی وجہ سے آگ بجھانے میں مشکلات ہیں لیکن آگ کو محدود کردیا گیا ہے، جلد قابو پالیں گے۔ آگ کے نتیجے میں اب تک کسی جانی نقصان کی اطلاع نہیں ملی تاہم متاثرہ گوداموں میں موجود لاکھوں روپے مالیت کی لکڑی جل کر راکھ ہوگئی۔ علاقے میں لکڑیوں کے متعدد گودام ہیں، آگ پھیلتے ہی دیگر افراد نے اپنے گوداموں سے لکڑی اور دیگر سامان نکال کر محفوظ مقام پر منتقل کرنا شروع کردیا ہے۔
کراچی: مومن آباد میں مبینہ پولیس مقابلہ، 2 دہشت گرد ہلاک
شہر جل رہا اور حکومت امن کی بانسری بجا رہی ہے، خالد مقبول صدیقی
