پلوامہ (جیوڈیسک) بھارتی زیر انتظام کشمیر میں تازہ احتجاجی مظاہروں کے دوران سکیورٹی فورسز کی فائرنگ سے کم از کم سات شہری ہلاک ہو گئے ہیں۔ قبل ازیں دو طرفہ فائرنگ میں ایک بھارتی فوجی اور تین مشتبہ جنگجو مارے گئے تھے۔
بھارتی پولیس کی جانب سے جاری کردہ ایک بیان کے مطابق فائرنگ کا سلسلہ اس وقت شروع ہوا، جب سکیورٹی فورسز نے پلوامہ کے علاقے میں ایک گھر کا محاصرہ کیا۔ بھارتی سکیورٹی اداروں کے مطابق انہیں خفیہ اطلاعات موصول ہوئی تھیں کہ ایک گھر میں مشتبہ علیحدگی پسند چھپے ہوئے ہیں۔ بتایا گیا ہے کہ اس دوران تینوں علیحدگی پسندوں کو ہلاک کر دیا گیا۔ ان میں ایک ایسا جنگجو بھی شامل تھا، جو پہلے فوج میں ملازم تھا۔
سینئر پولیس افسر سویم پرکاش پانی کا نیوز ایجنسی اے ایف پی سے گفتگو کرتے ہوئے کہنا تھا کہ دو طرفہ فائرنگ کے نتیجے میں سکیورٹی فورسز کا ایک اہلکار بھی مارا گیا ہے۔ عینی شاہدین کے مطابق جس وقت یہ لڑائی جاری تھی، اس وقت سخت سردی کے باوجود سینکڑوں کشمیری احتجاجاﹰ سڑکوں پر نکل آئے اور انہوں نے متاثرہ گھر کی جانب پیش قدمی شروع کر دی۔ اس دوران مظاہرین نے بھارت مخالف نعرے بھی بلند کیے اور وہ فوجیوں کی جانب پتھر بھی پھینکتے رہے۔
ایک پولیس افسر کا نام ظاہر نہ کرنے کی شرط پر کہنا تھا، ’’یہ شدید ردعمل تھا۔ فوجیوں کی جانب سے کی جانے والی فائرنگ میں چھ مظاہرین ہلاک ہوئے۔‘‘ طبی ذرائع کا کہنا ہے کہ ساتواں شہری گولیوں کے زخموں کی تاب نہ لاتے ہوئے ہسپتال میں دم توڑ گیا۔ نیوز ایجنسی اے پی کے مطابق بھارتی فوجیوں کی فائرنگ کے نتیجے میں کم از کم چوبیس مظاہرین زخمی بھی ہوئے ہیں۔
ہفتے کے روز پیش آنے والے ان پرتشدد واقعات کے بعد رواں برس بھارتی زیر انتظام کشمیر میں ہلاکتوں کی تعداد 550 تک پہنچ گئی ہے۔ مانیٹرنگ گروپوں کے مطابق سن دو ہزار نو کے بعد یہ سب سے ہلاکت خیز سال تھا۔
بھارتی سکیورٹی فورسز کے مطابق رواں برس تقریبا دو سو تیس ایسے مشتبہ عسکریت پسندوں کو ہلاک کیا جا چکا ہے، جن کا تعلق کشمیر ہی سے تھا۔ دوسری جانب باغی گروپوں کی صفوں میں شامل ہونے والے مقامی نوجوانوں کی تعداد میں اضافہ ہوتا جا رہا ہے۔
انیس عامری ایک ’دہشت گرد سیل‘ کا حصہ تھا، جرمن میڈیا
راحیل شریف کی بیرون ملک ملازمت کا این او سی درست نہیں: سپریم کورٹ
