قصور (محمد عمران سلفی سے) ڈی پی او قصور سید علی ناصر رضوی نے کہاانصاف ہر شہری کا حق ہے جو شہریوں کو ہر صورت میں ملنا چاہیے ہم نے انصاف کی فراہمی کو یقینی بنانے کا بالکل تہیہ کر رکھا ہے اور انشاء اللہ انصاف ہوتا ہوا نظر بھی آئے گا وہ گزشتہ روز اپنے آفس میں کھلی کچری کے دوران سائلین سے خطاب کر رہے تھے ۔انہوں نے کہا کہ وزیر اعلیٰ پنجاب کے ویژن کے مطابق اب تھانوں میں شہریوں کو عزت بھی ملے گی، انصاف بھی ملے گااور مقدمات کی تفتیش سو فیصد میرٹ پر ہو گی۔کھلی کچہری کے دوران 71سائلین نے درخواستیں گزاری جن پر ڈی پی او قصور نے موقع پر ہی احکامات جاری کیے۔انہوں نے کھلی کچہری کے دوران فرائض سے غفلت برتنے پر کئی ایک افسران کی سرزنش بھی کی۔
قصور (محمد عمران سلفی سے) ڈائریکٹر جنرل فشریز ڈاکٹر محمد ایوب نے کہا ہے کہ تیزی سے بڑھتی ہوئی شہری آبادیوں ، فیکٹریوں سے کثیر مقدار میں آلودہ پانی کے اخراج اورزرعی مقاصد کیلئے استعمال ہونے والی جراثیم کش ادویات کے باعث ہونے والی آبی آلودگی ، آبی حیات پر بری طرح اثر انداز ہورہی ہے ‘دریاؤں و قدرتی آبی گذرگاہوں پر بیراجوں اور ان کے کناروں پر بندوں کی تعمیر سے مچھلی کی قدرتی افزائش گاہیں تقریبا معدوم ہوگئی ہیں جس سے ان کی قدرتی طور پر ہونے والی افزائش میں تیزی سے کمی واقع ہورہی ہے ۔ان خیالات کا اظہار انہوں نے گزشتہ روز دریائے راوی میں ہیڈ بلوکی کے مقام پرمنعقدہ بچہ مچھلی چھوڑنے کی افتتاحی تقریب سے خطاب کرتے ہوئے کیا۔اس موقع پر محکمہ کے افسران ، میڈیا کے نمائندوں، فش فارمرز اور زندگی کے مختلف شعبوں سے تعلق رکھنے والے لوگوں نے کثیر تعداد میں شرکت کی۔ ڈاکٹر محمد ایوب نے دریائے راوی ہیڈ بلو کی میں 10 ہزار سے زائد بچہ مچھلی چھوڑ کر اس مہم کا باقاعدہ افتتاح کرتے ہوئے کہا آج کی یہ تقریب سرکاری پیداواری مراکز پر مصنوعی نسل کشی سے حاصل شدہ بچہ مچھلی کی قدرتی پانیوں میں سٹاکنگ پروگرام کے تسلسل کا حصہ ہے۔
انہوں نے کہاکہ محکمہ کی ماہی پروری کے فروغ کی پالیسیوں کے نتیجے میں سال 2014-15 میں مچھلی کی سالانہ پیداوار 92000 میٹرک ٹن اور جاری کردہ لائسنسوں کی تعداد 36426 جبکہ آمدن 212.580 ملین روپے ہو گئی ہے جس پر حکومت پنجاب نے محکمہ کی کارکردگی کو دیکھتے ہوئے اس کے ترقیاتی فنڈز کو380 ملین سے بڑھا کر 600 ملین روپے کر دیا ہے۔ انہوں نے محکمہ کی جاری ترقیاتی سکیموں بارے بتایا کہ لاہور میں ماہی پروری کے معلوماتی سنٹر اور دیگر دفاتر کا قیام عمل میں لایا گیا ہے اور پوٹھوہار ریجن میں واقع سمال ڈیمزاورجنوبی پنجا ب کے کھارے پانیوں میں ماہی پروری کا فروغ پر تیزی سے کام جاری ہے۔
انہوں نے بتایا کہ محکمہ ماہی پرور ی میں انسانی وسائل کی ترقی بذریعہ تحقیق و تربیت اور ایکوا کلچر ایکسپورٹ پراسیسنگ زون کے قیام کے منصوبے تیزی سے مکمل کیے جا رہے ہیںاور ان ترقیاتی منصوبوں کی تکمیل صوبہ میں فشریز سیکٹر میں انقلاب کا پیش خیمہ ثابت ہو گی ۔ڈائریکٹر جنرل فشریز نے کہا کہ محکمہ ماہی پروری آبی حیات کے تحفظ اور اس کی معدوم ہوتی ہوئی نسلوں کی افزائش کے لئے ہر ممکن اقدامات کررہا ہے اور اس ضمن میں محکمہ کے زیر انتظام ہیچریوں اور نرسریوں سے اعلی معیار کا 9کروڑ30لاکھ فش سیڈ مناسب افزائش کے بعد نجی شعبہ میں قائم فش فارمز کو مناسب نرخوں پر مہیا کررہا ہے ۔ ا نہوں نے کہا کہ محکمہ ہر سال دریاؤں ، جھیلوں اور دیگر پانیوں میں مربوط پروگرام کے تحت بچہ مچھلی چھوڑ نے کی مہم شروع کرتا ہے تاکہ مقامی طور پر پائی جانے والی مچھلیاں جیسے روہو ، موری، تھیلہ، سول، سنگھاڑی اور قومی مچھلی مہاشیر کی نسل کو بچایا جاسکے اور صوبہ میں مچھلی کے گوشت کی بڑھتی ہوئی مانگ کو پورا کیا جاسکےـانہوں نے کہا کہ فش فارمز کی سہولت کے لئے ہر سال فش میلوں کا انعقاد کیا جاتا ہے اور رواں سال کے پروگرام میں بیس میلوں کا انعقاد شامل ہے۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مصطفی آباد/للیانی (نامہ نگار) انتظامیہ کی مجرمانہ غفلت، اپیل برائے مالی امداد وزیر اعلی پنجاب کے فارموں کی خریدو فروخت جاری، سلسلہ نواحی دیہات تک پہنچ گیا، اب تک ہزاروں خواتین سے لاکھوں روپے ہتھیائے جا چکے ہیں، انتظامیہ کی پر اسرار خاموشی،قومی اخبارات میں خبروں کی اشاعت کے باوجود ڈی سی او قصور و پولیس کے کان پر جوںتک نہ رینگی، وزیر اعلی پنجاب سے فوری کاروائی کا مطالبہ، تفصیلات کے مطابق مصطفی آباد میں گزشتہ چھ روز سے اپیل برائے مالی امداد وزیر اعلی پنجاب کے بوگس فارموں کی خریدوں فروخت کا سلسلہ عروج پکڑ گیا، انتظامیہ کی مجرمانہ غفلت کے باعث فارموں کی خریدوفروخت کا سلسلہ نواحی دیہات تک پہنچ گیا، دیہات سے فارم پر کرنے اور رجسٹری کروانے کی مد میں دو سو روپے سے لیکر پانچ سو روپے تک وصول کئے جا رہے ہیں، گزشتہ چھ روز سے مصطفی آباد میں وزیر اعلی پنجاب سے مالی امداد کے جعلی فارم تیار کرکے اس کی فوٹو کاپیاں فروخت کرنے کا سلسلہ جاری ہے، فارم 10روپے سے لیکر 50روپے تک فروخت کیا جا رہا ہے ، پر کرنے والے افراد فی فارم 10روپے سے 20روپے تک وصول کر رہے ہیں جبکہ ڈاکخانہ مصطفی آباد کا عملہ فی فارم رجسٹری کرنے کیلئے اس پر 40روپے کے ٹکٹ لگا کر خواتین سے 50روپے وصول کئے جا رہے ہیں،انتظامیہ کی مجرمانہ غفلت کے باعث سلسلہ نواحی دیہات تک پہنچ گیا ہے۔
دیہات میں فی فارم دو سو روپے سے لیکر پانچ سو روپے تک وصول کئے جا رہے ہیں، اپنی درخواست وزیر اعلی پنجاب تک پہنچانے کیلے روزانہ صبح سے لیکر شام تک ڈاکخانہ کے باہرخواتین کا رش رہتا ہے، مالی امداد کے ہر فارم میں سائلہ کی طرف سے لکھا گیا ہے کہ سائل کے دو بچے زیر تعلیم ہیں، سائلہ لوگوں کے گھروں میں محنت مزدوری کرکے اپنا اور اپنے بچوں کا پیٹ پال رہی ہے، اس کے علاوہ کوئی ذریعہ معاش نہ ہے، مہنگائی کا دور ہے مالی امداد دی جائے میں اور میرا خاندان تا حیات آپ کی درازی عمر کی دعا کرتا رہے گا، ایک منظم گروہ مصطفی آباد اور اس کے نواحی دیہات میں سادہ لوح غریب خواتین کو لوٹنے میں مصروف ہے،وزیر اعلی پنجاب کی طرف سے واقع کا فوری نوٹس لیتے ہوئے ملوث افراد اورمجرمانہ غفلت کے مرتکب افسران کے خلاف کاروائی کا مطالبہ۔
مصطفی آباد/للیانی (نامہ نگار) جمشید عالم کی ہمشیرہ کی وفات پر سیاسی و سماجی جماعتوں کے نمائندوں کی طرف سے اظہار افسوس، تفصیلات کے مطابق نواحی گائوں کھارا کے رہائشی جمشید عالم کی ہمشیرہ گزشتہ روز طویل علالت کے بعد انتقال کر گئی، نماز جنازہ میں سیاسی و سماجی جماعتوں کے نمائندوں اور صحافیوں کی بڑی تعداد نے شرکت کی، ایم پی اے مسلم لیگ ن محمد یعقوب ندیم سیٹھی، صدر پریس کلب مصطفی آباد للیانی(رجسٹرڈ) محمد عمران سلفی، جزل سیکرٹری مسلم لیگ ن MYOلاہور ڈویژن سعید احمد بھٹی، رہنما مسلم لیگ ن چوہدری طارق سعید خاں و سیاسی و سماجی جماعتوں کے نمائندوں اور صحافیوں کی بڑی تعداد نے مرحومہ کی مغفرت اور لواحقین کیلئے صبر کی دعا کی۔
مصطفی آباد/للیانی (نامہ نگار) ایم اے جوزف کی طرف سے معروف سکالر ڈاکٹر ایل سروش کی شہادت پر گہرے دکھ کا اظہار، تفصیلات کے مطابق نیشنل ڈائریکٹر کلاس ایم اے جوزف فرانس نے معروف سکالر ڈاکٹر حزقی ایل سروش کی شہادت پر گہرے دکھ اور افسوس کا اظہار کیا، ایف جی رے کے سنیئرممبران سہیل ہابل اور یعقوب سرویا نے کہا کہ معروف سکالر ڈاکٹر ایل سروش کی شہادت سے جو خلا پیدا ہوا ہے وہ شاید کبھی پر نہ ہو سکے گا۔
ملکہ: نومنتخب چیئرمین کو مبارکباد
پائی خیل کی خبریں 12/11/2015
