اسلام آباد (جیوڈیسک) قومی اسمبلی میں قائد حزب اختلاف خورشید شاہ، جے یو آئی (ف) کے سربراہ مولانا فضل الرحمان اور امیر جماعت اسلامی سراج الحق نے وزیراعظم نوازشریف کی جانب سے تحریک انصاف کے عام انتخابات میں دھاندلی کے الزام پر سپریم کورٹ کا کمیشن بنانے کے اعلان کا خیر مقدم کیا ہے۔
قومی اسمبلی میں قائد حزب اختلاف خوشید شاہ نے کہا کہ پیپلزپارٹی وزیراعظم کی جانب سے عدالتی کمیشن بنانے کے اعلان کا خیر مقدم کرتی ہے کیونکہ اب عدلیہ آزاد ہے، اس پر افتخار چوہدری کا سایہ نہیں ہے۔
اور اس آزاد عدلیہ پر ہم سب کو اعتماد ہے۔ ان کا کہنا تھا کہ عمران خان کے مطالبے کی وجہ سے کمیشن بنانے کااعلان ہوا ہے اب ہمیں امید ہےکہ عمران خان بھی اس تجویز کو مانیں گے اور اگر انہوں نے حکومت کی تجویز نہ مانی تو ان کا کیس کمزور ہوجائے گا۔
دوسری جانب جمعیت علمائے اسلام (ف) کے سربراہ مولانا فضل الرحمان نے اپنے بیان میں کہا کہ وزیراعظم کی جانب سے عدالتی کمیشن کا اعلان ایک اچھا اقدام ہے۔
کمیشن کے ذریعے تحقیقات سے دودھ کا دودھ اور پانی کا پانی ہوجائے گا جبکہ جماعت اسلامی کے امیر سراج الحق کا کہنا تھا کہ ہم پر امید ہیں کہ تمام مسائل حل ہوجائیں گے، عوام 14 اگست سے متعلق بہت پریشان ہیں اور ہمیں پوری امید ہے کہ اب خطرہ ٹل جائے گا۔
کراچی آپریشن کا طریقہ بتایا جائے، وفاق سے حراستی مراکز اور قیدیوں کی فہرست طلب
ملک میں پولیو کے پانچ نئے کیس سامنے آگئے، مجموعی تعداد 115 ہوگئی
