بھٹکا ہوا قسمت کا ستارا تھا ہمارا

Destiny

بھٹکا ہوا قسمت کا ستارا تھا ہمارا
ورنہ تو کبھی شہر یہ سارا تھا ہمارا

تھے فائدے جو کار ِ محبت میں تھے ان کے
اور عشق میں جتنا تھا خسارا تھا ہمارا

اب کیسے کہیں اس کو برا اپنی زباں سے
اِک عمر وہی ایک تو پیارا تھا ہمارا

تھا بیچ میں پھیلا ہوا گردان ِ بلا خیز
اور اس سے پرے دور کنارا تھا ہمارا

گندم بھی تھی نمکین تو کڑوے تھے ثمر بھی
گاؤں میں ادھر گاؤں میں کھارا تھا ہمارا

جو چھوڑ گیا دیدۂ پر نم میں اندھیرے
وہ شخص کبھی آنکھ کا تارا تھا ہمارا

جس خون کی سرخی سے گلابی ہے شفَق بھی
وہ خُوں تو سر ِ دار ہمارا تھا ہمارا

پھر یاد کرو تم نے بتایا تھا کہ راجا
تھا خواب کوئی جس میں اِشارَا تھا ہمارا

احمد رضا راجا

Nasir Mehmood - Chief Editor at GeoURDU.com