تحریر:ایم سرور صدیقی کاروباری سلسلہ میں کئی روز گھر سے باہر رہنے کے بعداس نے بیوی بچوں کیلئے کپڑے، چھوٹی کیلئے پیاری سی گڑیا اور دیگر ضروری سامان خریدا شاپنگ کرتے کافی دیر ہوگئی ریل نکلنے کا وقت ہو چلاتھا وہ بھا گم بھاگ ریلوے اسٹیشن پہنچا ٹکٹ خریدا اور سیٹ پر براجمان ہوگیا۔۔ ٹرین چلی تو وہ اپنے گھرانے کے بارے سوچنے لگا چھوٹی کی معصوم باتیں اور پپو کی توتلی زبان سے بولتے بے ربط جملوں کی ذہن میں بازگشت گونجنے لگی وہ بے اختیار مسکرادیا ٹرین کئی مقامات پر رکتی۔۔ پھر بھی چھکا چھک بھاگتی ہی چلی جاتی ۔۔فیصل آباد آنے کو تھا اچانک اسکو کسی نے شانہ پکڑ کر ہلایا وہ یک لخت خیالی دنیا سے نکل کر جیتے جاگتے ماحول میں واپس آیا اسے کسی کی اس حرکت پر بے انتہا غصہ آیا لیکن اپنے سامنے ایک چھوٹے سے پیارے سے بچے کو دیکھ کراس نے پوچھا”کیا بات ہے؟
۔بچے نے جوس کا ایک پیکٹ اس کے سامنے کرتے ہوئے کہا انکل! لے لو میں نے تو صبح سے ناشتہ بھی نہیں کیا۔۔ اسے بچے پر ترس آگیا جیب سے پیسے نکال کر اسے دئیے اور جوس پینے لگاجوں جوں ٹرین۔ فیصل آباد ریلوے اسٹیشن پر رکنے کیلئے آہستہ ہونے لگی اس کے حواس ساتھ چھوڑنے لگے اس نے اٹھنے کی کوشش کی کامیاب نہ ہو سکا ۔۔۔۔اسے ہوش آیا تو معلوم ہوا وہ ہسپتال میں ہے زہریلا مشروب پینے پر اس کی یہ حالت ہوگئی کسی نے ریلوے اسٹیشن کے باہر اسے بے ہوش دیکھ کر ریسکیو 1122 کو اطلاع دی تھی بروقت طبی امداد ملنے پر جان بچ گئی لیکن نوسربازسامان ،نقدی اور قیمتی اشیاء لوٹ چکے تھے۔۔۔۔۔ایک خاتون بیٹی سے مل کر لاہور سے فیصل آبادآئی واپس اپنے گھر جانے کیلئے ویگن کے انتظار میں کھڑی تھی کہ اچانک ایک مرد اور ایک عورت نے نہ جانے وہاں کیا تلاش کرنا شروع کردیا
Women
پھر وہ اس خاتون سے کہنے لگے ہمارے پیسے گم ہوگئے ہیں آپ نے تو نہیں دیکھے خاتون کے انکار پروہ کہنے لگے ہمیں تو آپ پر شک ہے کیونکہ اس جگہ کچھ دیر پہلے ہماری رقم گر گئی ہے اور اب یہاں آپ کھڑی ہیں۔۔۔۔ خاتون نے پھر سختی سے انکار کیا ۔۔۔مردکی ساتھی عورت نے کہا صورت سے تو آپ چور نہیں لگتیں لیکن میرا خاوندبڑا شکی مزاج ہے ماں جی مسجد میں جاکر آپ قسم کھا لیں تو اسے یقین آجائے گا۔۔۔میں کیوں قسم کھائوں؟۔۔ خاتون نے ترکی بہ ترکی جواب دیا۔۔۔۔۔ تم سچی ہو تو قسم کھانے میں کیا حرج ہے ؟ساتھی عورت نے کہا۔۔۔۔اب مجھے یقین ہوگیا ہے مردنے کہا میری رقم تمہارے پاس ہے ۔۔نکالو میرے پیسے۔۔۔۔۔ساتھی عورت کہنے لگی مجھے یقین ہے پیسے تمہارے پاس نہیں شکل سے تو آپ کسی اچھے خاندان کی لگتی ہو میںنے تو پہلے ہی کہا تھا میرا خاوندبڑا شکی مزاج ہے تم اللہ کے گھرمیں قسم کھالو اسے تم پر اعتبار آجائے گا۔۔۔خاتون بادل ِ نخواستہ محض اپنی جان چھڑانے کیلئے مسجد جانے کیلئے ان کے ہمراہ ہو لی موقع پاکر پیچھے سے ان کے ساتھی نے خاتون کوکچھ سونگھا دیا خاتون کے بے ہوش ہوتے ہی وہ اس کے طلائی زیورات اور نقدی لوٹ کر چلتے بنے۔۔۔
لوگ مسجدمیں نماز پڑھنے آئے تو پتہ چلاایک خاتون بے ہوش زمین پر پڑی ہے۔۔۔ اب تازہ ترین ایک اور واقعہ بھی سن لیجئے انجینئرنگ کا ایک طالبعلم اپنے کزن کی شادی پر لاہور سے فیصل آباد آیا سفر کے دوران اس کے ساتھ بیٹھے ہوئے ایک نوسرباز نے اسے کچھ کھلانے کی کوشش کی۔۔ لیکن وہ کامیاب نہ ہو سکا فیصل آباد آنے پر جب لوگ اترنے کیلئے ایک دوسرے سے سبقت لے جانے کی کوشش کررہے تھے انجینئرنگ کے طالبعلم کو نوسرباز نے کچھ سونگھا دیا اور اغواء کرکے رکشہ میں لے گئے آتے جاتے حواس کے ساتھ طالبعلم نے مزاحمت کی تو اسکی نہ صرف پٹائی کی گئی بلکہ اسے زہریلی چیز کھلا کر فائیو ایس موبائل، کپڑے اور ہزاروںکی نقدی لوٹ لی گئی اور اسے نڑ والا چوک کے قریب نیم مردہ پھینک کر فرار ہوگئے ریسکیو 1122 کے عملے نے طالبعلم کو طبی امداد کے لئے DHQ ہسپتال منتقل کیا جہاں کئی گھنٹوں بعد اسے ہوش آیا اور شادی والے گھر میں ایک کہرام مچا رہا۔۔۔۔
اس جیسے ملتے جلتے نہ جانے کتنے واقعات روزانہ ملک میں رونما ہورہے ہیں اور نہ جانے کتنے لوگوں کو نوسرباز لوٹ رہے ہیں پنجاب کے دارالحکومت لاہورمیں مینار ِ پاکستان، داتا دربار ،لاری اڈہ اور ریلوے اسٹیشن۔۔۔پاکستان کے مانچسٹر فیصل آباد میں لاری اڈہ نڑ والا چوک اور ریلوے اسٹیشن۔۔۔ راولپنڈی میں فیض آباد ، راجہ بازار،لاری اڈہ اور ریلوے اسٹیشن نوسربازوں کے خاص مراکز ہیںجہاں روزانہ درجنوں وارداتیں ہورہی ہیں اب تو فراڈئیے بے ہوش کرنے والا محلول بھی سپرے کرنے لگے ہیں مسافر بے ہوش ہو جائے تو اسے طبی امداد کے نام پر ذرا سنسان علاقے سے میں لے جا کر لوٹ لیا جاتا ہے مزاحمت کرنے والوں پر تشدد بھی کیاجاتاہے اور زبردستی زہریلا مشروب پلادیا جاتا ہے ۔۔۔نوسرباز انتہائی مہلک زہر اور بے ہوش کرنے والی دوابھی استعمال کرتے ہیں جس سے ایک تہائی متاثرین کی موت واقع ہو جاتی ہے
Faisalabad Hospital
ایک محتاط اندازے کے مطابق پورے ملک میں فیصل آباد میں سب سے زیادہ نوسربازی کے واقعات ہورہے ہیں صرف DHQ ہسپتال میں روزانہ چار پانچ متاثرین لائے جارہے ہیں اتنی وارداتوں کے باوجود اصلاح ِ احوال کیلئے اقدامات نہ کرنافہم سے بالاتر ہے۔ نوسربازی کے متاثرین میں زیادہ تر تھانے کچہری جانے سے کتراتے ہیں چونکہ زیادہ ترمتاثرین مسافر ہوتے ہیں اس لئے وہ جان بچ جانے پر ہی خدا کا شکر ادا کرتے ہیں عوام میں ایک تاثر یہ بھی ہے کہ نوسربازی کے متاثرین کو محض رپٹ درج کرکے ٹرخا دیا جاتا ہے بیشتر درخواستوںپر سرے سے کوئی کارروائی ہی نہیں ہوتی اور یوں وہ رجسٹروںمیں درج ہو کر ماضی کے قصے کہانیاں بن جاتی ہیں پاکستان میں ملزمان کے خلاف مؤ ثر ایکشن نہ لینے کی وجہ سے بھی جرائم کی رفتار میں مسلسل اضافہ ہو تا جارہا ہے اللہ تعالیٰ کے بعد پولیس ہی عوام کی جان و مال کی محافظ ہے جو جتنا بڑا افسر ہے اس کی ذمہ داری بھی اتنی زیادہ ہے
اس لئے اللہ تعالیٰ کے حضور اتنا ہی زیادہ جوابدہ ہے۔ہر ایس ایس پی اپنے ضلع میں عوام کی جان و مال کا محافظ ہے ہمارے خیال میں نوسرباز ۔۔۔ چور، ڈاکوسے زیادہ خطرناک ہے جو عوام کو لوٹنے کے ساتھ ساتھ اس کی جان کا بھی اس سے زیادہ دشمن ہے سٹریٹ کرائم میں برابر اضافہ،نوسربازی کے بڑھتے ہوئے واقعات اورسماج دشمنوں کو کھلی چھٹی دینے کا مطلب ہے ہر ایس ایس پی سو رہا ہے۔شاید اسی وجہ سے عوام لٹ رہے ہیں نوسربازان کی جان سے کھیل رہے ہیں اورشاید اسی وجہ سے عوام کا مقدر سو گیاہے؟ ہمیں امید ہی نہیں یقین واثق ہے کہ جس روز ایس ایس پی جاگ گئے نوسر بازیہ ان کی حدود چھوڑ کر بھاگ جائیں گے اس دوران الہی سب کی خیر ہو۔۔
ہم بھی خوش، تم بھی خوش
فرصت کے اوقات
