کراچی (جیوڈیسک) ملیر کینٹ کے قریب مبینہ پولیس مقابلے میں دو ملزمان مارے گئے، پولیس نے دعویٰ کیا ہے کہ ہلاک ملزمان کے قبضے سے اسلحہ اور موٹر سائیکل برآمد ہوئی ہے۔ تفصیلات کے مطابق ملیر کینٹ کے علاقے سعدی ٹاؤن ،پیر احمد زمان ٹاؤن میں دو ملزمان لوٹ مار کررہے تھے۔ ایس ایچ او ارشاد گبول کے مطابق پولیس موبائل معمول کے مطابق علاقے میں گشت کررہی تھی کہ شہریوں نے پولیس کو اطلاع دی کہ موٹر سائیکل سوار دو مسلح افراد لوٹ مار کر رہے ہیں۔
اطلاع ملتے ہی پولیس موقع پر پہنچ گئی جس پر ملزمان نے فائرنگ کردی ، پولیس کی جوابی فائرنگ سے دونوں ملزمان موقع پر ہی ہلاک ہوگئے، پولیس نے دونوں کی لاشوں کو تحویل میں لے کر کارروائی کیلئے جناح اسپتال پہنچایا۔ ملزمان کی عمریں 30 سے 35 سال کے درمیان ہیں، پولیس نے کارروائی کے بعد لاشیں شناخت کیلئے ایدھی سرد خانے میں رکھوادی ہیں۔
