بوسٹن(جیوڈیسک)میراتھن بم دھماکے کے ملزم کو دفنانا مسئلہ بن گیا، لاش مردہ خانہ کے حوالے، مظاہرین نے مردہ خانے کو گھیر لیا۔امریکی شہر بوسٹن میں میراتھن بم دھماکوں کے ملزم تیمرلان سارنائیف کی لاش کو دفنانے کے لیے قبرستان کی تلاش میں مشکل کو سامنا ہے۔
امریکی ریاست میساچوسٹس کے علاقے ورسیسٹر میں واقع میت خانے میں ان کی لاش رکھی گئی ہے اور اس میت خانے کا مظاہرین نے گھیرائو کر رکھا ہے۔ میت خانے کو تیمرلان سارنائیف کی لاش کو دفنانے کی ذمہ داری دی گئی تھی۔ ان کی لاش جمعرات کو طبی معائنے کے بعد میت خانے کے حوالے کی گئی۔
میت خانے کے ڈائریکٹر پیٹر سٹیفن کو تیمرلان کی موت کی جو سند دی گئی ہے اس کے مطابق ان کی موت کی وجہ گولیاں لگنے اور گہرے زخم بیان کی گئی ہے۔ پیٹر سٹیفن نے کہا کہ ہر کسی کو دفن ہونے کا حق حاصل ہے۔ یہ معنی نہیں رکھتا کہ یہ کون ہے۔ میں کسی کا انتخاب نہیں کر سکتا۔
اس سے پہلے انہوں نے کہا کہ میرا مسئلہ یہ ہے کہ میں قبر کی جگہ تلاش کر رہا ہوں۔ بہت سارے لوگ چاہتے ہیں کہ یہ نہیں کیا جائے اور وہ اس میں شامل نہیں ہونا چاہتے ہیں۔ انہوں نے کہا کہ ہر کسی کو پروقار طریقے سے دفنائے جانے کا حق حاصل ہے۔ اس میت خانے کے باہر لوگ جمع ہیں اور احتجاجی مظاہرے کر رہے ہیں۔
اطلاعات کے مطابق تیمرلان سارنائیف کو جب پولیس نے گولی ماری تو اس وقت ان کے بھائی جوہر ان کو روندتے ہوئے ایک گاڑی میں فرار ہو گئے تھے۔ ابھی تک یہ واضح نہیں ہے کہ میراتھن کو بم دھماکوں میں نشانہ بنائے جانے کا مقصد کیا تھا۔ تیمرلان سارنائیف کا تعلق روس کے علاقے چیچنیا کے ایک مسلمان گھرانے سے ہے۔
گزشتہ ایک دہائی سے امریکہ میں رہائش پذیر تھے۔ بعد میں تیمرلان سارنائیف انتہا پسندی کی جانب راغب ہو گئے۔ تیمرلان سارنائیف کی بیوی رسل کیتھرین نے طبی معائنے کے دفتر سے ان کی لاش موصول کرنے سے انکار کرتے ہوئے تیمرلان سارنائیف کے رشتہ داروں سے کہا تھا کہ وہ لاش پر دعوی اور ان کو دفنانے کی انتطامات کر سکتے ہیں۔
گزشتہ ماہ بوسٹن میراتھن میں ہونے والے دو دھماکوں میں تین افراد ہلاک اور ایک سو اسی کے قریب زخمی ہو گئے تھے۔ تیمرلان سارنائیف کے بھائی جوہر سارنائیف ہسپتال میں پولیس کی تحویل میں ہیں اور ان پر بڑی تباہی پھیلانے والا ہتھیار استعمال کرکے لوگوں کو قتل کرنے کا فردِ جرم عائد کیا گیا ہے۔ جرم ثابت ہونے پر انہیں سزائے موت ہو سکتی ہے۔
ملائشیا میں عام انتخابات کے لیے ووٹنگ کا آغاز ہو گیا
ہنگری : عالمی یہودی کا نگریس کی مخالفت میں مظاہرہ
