کراچی / لاہور / پشاور / کوئٹہ (جیوڈیسک) گڈو سے کوئٹہ آنے والی ٹرانسمیشن لائن ٹرپ کرنے سے نیشنل گرڈ میں فنی خرابی پیدا ہوگئی جس کے باعث ملک بھر میں بجلی کا بڑا بریک ڈاؤن ہوگیا اور کئی شہر تاریکی میں ڈوب گئے۔
گڈو سے کوئٹہ آنے والی 220 کے وی کی ٹرانسمیشن لائن ٹرپ کرگئی ہے جس سے نیشنل گرڈ اسٹیشن میں فنی خرابی پیدا ہوگئی اور اس کے نتیجے میں کراچی، لاہور، کوئٹہ، پشاور اور اسلام آباد سمیت متعدد شہر تاریکی میں ڈوب گئے۔
گڈو سے کوئٹہ آنے والی 220 کے وی کی لائن ٹرپ کرنے سے بلوچستان کو بجلی کی فراہمی معطل ہوگئی ہے جس سے صوبے کے متعدد اضلاع تاریکی میں ڈوب گئے ہیں جبکہ نیشنل گرڈ میں خرابی کے باعث این ٹی ڈی سی کے 220 کے وی کے تین اسٹیشن ٹرپ ہونے سے لاہور،فیصل آباد، ڈیرہ غازی خان، ملتان، مظفر گڑھ اور راولپنڈی سمیت پنجاب کے مختلف شہروں میں بجلی کی سپلائی معطل ہوگئی
ہے جبکہ وفاقی دارالحکومت اسلام آباد بھی بریک ڈاؤن کی زد میں آگیا ہے۔ نیشنل گرڈ میں خرابی سے کراچی کو بھی بجلی کی فراہمی بند ہوگئی ہے، بن قاسم اور دیگر پاور پلانٹ بند ہونے سے شہر قائد میں مکمل طور پر بلیک آؤٹ ہوگیا ہے اور کے الیکٹرک کا سسٹم بری طرح متاثر ہوا ہے جبکہ شہر کو نیشنل گرڈ سے ملنے والی 650 میگا واٹ بجلی کی فراہمی بھی معطل ہوچکی ہے۔
حیدرآباد میں بھی 500 کے وی ٹرانسمیشن لائن ٹرپ کرگئی ہے جس سے جامشورو اور تھرمل پاور اسٹیشن نے بھی کام کرنا چھوڑ دیا ہے اور اس کے نتیجے میں سندھ کے مختلف شہروں کو بھی بجلی کی فراہمی مکمل طور پر بند ہوگئی ہے۔ خیبرپختونخوا میں بھی پشاور سمیت صوبے کے متعدد اضلاع میں بجلی کی فراہمی مکمل طورپر معطل ہوچکی ہے جس کے نتیجے میں صوبے بھر میں بجلی کا بلیک آؤٹ ہوگیا ہے۔
دوسری جانب ترجمان وزارت پانی بجلی کا کہنا ہے کہ نیشنل گرڈ میں خرابی کے باعث ملک میں بجلی کا بریک ڈاؤن ہوا تاہم نیشنل گرڈ میں پیدا ہونے والی خرابی کو دور کیا جارہا ہے اور ملک میں جلد ہی بجلی کی بحالی کی کوشش کی جارہی ہے۔
گستاخانہ خاکے بنانے والے نبیﷺ صلی اللہ علیہ وآلہ وسلم کا مرتبہ نیچا نہیں کرسکتے، الطاف حسین
قومی کرکٹرز کا سینٹرل کنٹریکٹ پر دستخط سے انکار
