میران شاہ (جیوڈیسک) شمالی وزیرستان میں ایک گھر پر امریکی ڈرون حملے میں ہلاک ہونے والوں کی تعداد 7 ہوگئی ہے۔
مرنے والوں کی شناخت نہیں ہو سکی۔ ذرائع کا کہنا ہے کہ ڈرون حملہ شمالی وزیرستان کی تحصیل دتہ خیل کے علاقے کنڈاسر میں کیا گیا جہاں ایک گھر پر امریکی ڈرون سے دو میزائل داغے گئے۔
حملے سے 4 افراد ہلاک اور گھر تباہ ہوگیا، بعد میں ملبے سے مزید 3افراد کی لاشیں ملیں۔ حملے کے بعد علاقے میں ڈرون کی پروازیں جاری رہیں۔
اس سال شمالی وزیرستان میں یہ سولہواں ڈرون حملہ ہے۔ زیادہ تر حملے تحصیل دتہ خیل کے مختلف علاقوں میں کیے گئے۔
