تحریر : اختر سردار چودھری، کسووال کچھ دن قوموں کی زندگی میں بڑے خاص ہوتے ہیں جو ہجوم کو قوم بنا دیتے ہیں، انہی دنوں میں سے ایک دن 6 ستمبر ہے جو یوم دفاع کے طور پر منایا جاتا ہے۔ اس دن کو ہر سال منانے کا مقصد اپنی قوم کے ہیروز کی عظیم قربانیوں پر خراج تحسین پیش کرنا ہے۔ 51 سال قبل ہوا یہ تھا کہ 5 اور 6 ستمبر 1965ء کی درمیانی شب بھارت نے پاکستان کے تین علاقوںسیالکوٹ لاہور اور قصور پر بیک وقت شب خون مارا تھا ۔یوم دفاع یاد دلاتا ہے اس لمحے کی جب جوانوں نے اپنے سینوں پر بم باندھ کر بھارتی ٹینک تباہ کیے ،ان مشکل فیصلوں کو سلام کرنے کادن ہے جب ماؤں، بہنوں، بیٹیوں، اور بیویوں نے، اپنے مردوں کو محاذِ جنگ پر روانہ کیا، اپنے زیورات فنڈ میں دیئے۔ یہ اس قوم کی بہادری کو خراج عقیدت پیش کرنے کا جب عوام مورچوں میں نہیں گھروں کی چھتوں پر بھارتی جہازوں کو دیکھ کر لا الہ الا اللہ اور اللہ اکبر کے نعرے لگاتے رہے۔
ایم ایم عالم جیسے عظیم ہیرونے 1965ء کی جنگ میں سرگودھا کے محاذ پر پانچ انڈین ہنٹر جنگی طیاروں کو ایک منٹ کے اندر اندر مار گرائے جن میں سے چار تیس سیکنڈ کے اندر مار گرائے یہ ایک عالمی ریکارڈبنا۔ بعد ازاں سترہ دن جنگ جاری رہی اور23 اور 24 ستمبر کی درمیانی شب رات کے 12 بجے اقوام متحدہ کی مداخلت سے جنگ بندی کا اعلان ہوا تھا۔
اس جنگ میں پاکستان نے اپنے سے دس گنا زیاہ طاقت ور دشمن کی فوج کا مقابلہ کیا ۔لاہور جم خانہ میں جشن کا عزم رکھنے والے جان بچانے کے لیے اسلحہ اور گاڑیاں تک چھوڑ کے بھاگ گئے ۔ ایک غیر ملکی رپورٹ کے مطابق پاک بھارت کی اس جنگ میں نقصان کا تناسب 1:12 تھا ۔یعنی پاکستان کا اگر ایک روپیہ کا نقصان ہوا تو بھارت کا بارہ روپے کا ۔لیکن اب 51 سال کے بعد پھران جذبوں کو ابھارنے کی ضرورت ہے ۔لیکن افسوس کے ساتھ کہنا پڑتا ہے اب یہ دن چند پروگرامز،اخبارات کے ایڈیشنز، شہیدوں کے مزاروں پر پھول چڑھانے،تک رہ گیا ہے ۔اب وہ جذبہ نہیں رہا جو ہمارے بچپن میں تھا۔ جوروح کو تڑپا دے۔ اب رسائل وجرائد میںحب الوطنی پرلکھا بھی کم جاتا ہے ،ہمارے ٹی وی شوز دیکھیں سارا سال کیا پیش کرتے ہیں۔ابھی زیادہ عرصہ نہیں گزرا جب طالب علم اپنی کاپیوں کتابوں کے کور65 کے ہیروز سے سجاتے تھے ۔سنا ہے اب تو نصاب سے بھی وہ مواد خارج کیا جا رہا ہے ۔اور ہماری تعلیمی پالیسی بھی سنا ہے بیرون ملک تیار ہوا کرے گی۔
Major Aziz Bhatti Shaheed
اس وقت پاک افواج کی پشت پر پوری عوام کو کھڑے ہونا چاہیے ۔ بالکل اسی طرح جیسے آج سے اکیاون سال قبل کھڑی تھی ۔آج سے اکیاون سال قبل میجر عزیز بھٹی شہید نے بھارت کے دانت کھٹے کیے تھے، آج اسی خاندان کے جوان جناب راحیل شریف اس وقت آرمی چیف ہیں۔ بالکل ایسے ہی آج پاکستان کے صاحب اقتدار اور عوام کو نظریاتی جنگ کے محافظ بن کر میدان عمل میں آنا چاہیے ۔اور دشمن کے پروپیگنڈے کا بھر پور جواب دینا چاہیے ۔کیونکہ اول تو اب جنگ نہیں ہو گی اگر ہوگی تو دشمن کو بھی علم ہے کہ ایٹمی جنگ ہو گی ،جس میں ان کا اپنابھی نام ونشان مٹ جائے گا۔بھارت کو یہ بات یاد رکھنی چاہیے کہ مودی کی پالیسی سے سوائے تباہی وبربادی کے کچھ حاصل نہیں ہو گا۔
اس وقت بھی ہماری قوم ومصائب و آلام اور مشکلات میں گھری ہوئی ہے ۔ناامیدیوں اورمایوسیوں کے منحوس سائے ہیں ۔دیکھاجائے تو موجودہ وقت میں وہ جذبے عنقا ہیں۔ ہمیں اسی جذبہ اتحاد کی ضرورت ہے، جو پاکستان کو بحرانوں سے نکال سکے ۔ ملک و قوم کو ترقی کے راستے پر ڈالنے ،سمت اور رفتار کے درست کرنے،کھرے کھوٹے کو الگ کرنے،سچ جھوٹ کو عیاں کرنے ، کے لیے ایسے لمحات ضروری ہوتے ہیں ۔جب اسے کسی چیلنج کا سامنا ہوتا ہے اس سے قوم کی صلاحیتیں نکھر کر سامنے آتی ہیں ۔بقول علامہ اقبال
خدا تجھے کسی طوفان سے آشنا کر دے کہ تیرے بحر کی موجوں میں اضطراب نہیں
ستمبر کا مہینہ ہم کو یہ یاد دلاتا ہے کہ فوج ، عوام اور حکومت مل کر مشکل سے مشکل حالات کا بخوبی مقابلہ کر سکتی ہے ۔6 ستمبر 1965 ء کو بھارت نے جب پاکستان پر شب خون مارا تو وہ اس وقت اپنی افرادی قوت ،اسلحہ کے انبار اور عالمی سپر طاقتوں کی سر پرستی کی وجہ سے تکبر ،غرور تھا مگر بھارت کو اس جنگ میں منہ کی کھانی پڑی ۔ پاکستان کی عوام اور افواج نے بھارت کے ناپاک ارادوں کو ناکام بنانے کے لیے سر دھڑ کی بازی لگا دی ۔پاکستانی قوم نے ستمبر 1965ء کی جنگ میں اپنا دفاع کر کے پوری دنیا پر یہ ثابت کر دیا کہ ہم ایک نا قابل تسخیر قوم ہیں پاکستان کے بہادر فضائیہ،بری اور بحری افواج نے بے مثال اور حیرت انگیز کا ر نامے سر انجام دیئے۔بھارت کے مقابلے میں پاکستان کے پاس بہت ہی کم جنگی سازوسامان تھا جبکہ بھارت کے پاس کئی گنا زیادہ افواج اور اعلیٰ جنگی ہتھیار اور سازوسامان تھا۔تاہم ایک طاقت پاکستان کے پاس تھی جو بھارت کے نصیب میں کبھی نہیں ہو سکتی ،وہ ہے ایمانی جذبہ بلا شبہ پاکستان نے یہ جنگ جذبے سے جیت کر غزوہ بدر کی تاریخ دہرادی تھی۔ دس گنا بڑی دشمن کی فضائیہ جذبہ شہادت سے لیس ہوابازوں کے سامنے نہ ٹھہر سکی۔ دشمن طاقت کے زور پہ لڑتا ہے جبکہ مسلمان جذبہ ایمانی اور جذبہ شہادت سے لڑتا۔
کافر ہے تو شمشیر پر کرتا ہے بھروسہ مومن ہے تو بے تیغ لڑتا ہے سپاہی
آج ہمارادشمن بھارت پھر بے قرار ہے اسے ستمبر کی جنگ میں ملنے والی ہار برداشت نہیں ہو رہی ۔ اسے 65 بھولتا نہیں ہے اور ہم بھی یہ ہی کہتے ہیں کہ تم کو 65 تو یاد ہو گا ۔ویسے بھارت کو تو ہر لمحہ یاد ہے اسی لیے وہ اوچھے ہتھکنڈوں پر اتر آیا ہے ۔ہمارے ساتھ جنگ لڑنے کی دھمکی کے ساتھ ثقافتی محاذ پر جنگ لڑ رہا ہے۔ عوام ،حکومت اور افواج کے مابین نفرتیں پھیلانے کے ایجنڈے پر کام کر رہا ہے ،اس کے لیے ان کا اپنا میڈیا اور بدقسمتی سے پاکستانی میڈیا میں سے کچھ عناصر بھی ساتھ دے رہے ہیں۔
Pak Army
ہمارے لیے فخر کی بات یہ ہے کہ پاکستان دنیا کی دس بہترین ائیر فورسزز میں پانچویں ،آرمی میں چوتھے،تعداد کے لحاظ سے ساتویں اور ساتویں ہی ایٹمی طاقت ہے۔اور آئی ایس آئی دنیا میں سب سے بہترین پاکستان کی ہے ۔ایک بات بڑی توجہ طلب ہے ہمارے یہ دو ادارے یعنی فوج اور آئی ایس آئی دشمنانِ پاکستان کی نظروں میںکھٹک رہے ہیں،اب ان دونوں اداروں کے خلاف سازشیں زور و شور سے جاری ہیںان سازشوں میں ان کا ساتھ ہمارے اپنے ملک سے دینے والے بہت سے غدار ہیں ۔اس کے لیے صرف ایک ماضی قریب کا واقعہ امریکا نے پاکستان کی بقاء کی ضمانت آئی ایس آئی کو دوسرے ممالک کیلئے خطرہ قراردیا ۔حکومت نے خارجی دباؤ کے زیر اثر آئی ایس آئی کو وزارت داخلہ کے ماتحت کیا ۔ عوام کے شدید ردِعمل کے بعد یہ فیصلہ واپس لیا۔ 6 ستمبر 1965 ء کو امریکہ نے پاکستان کی امداد بند کر دی تھی ،بھارت کا ساتھ دیا تھا ،آج ہمارا ہر حکمران امریکہ کی غلامی کو پسند کرتا ہے ۔ اس یوم دفاع کے موقع پر ہمیں یاد رکھنا چاہیے کہ امریکہ نے اس وقت ہماری افواج کی امداد بند کر دی تھی اور بھارت کا ساتھ دیاتھا ۔جبکہ آئی ایس آئی (پاکستان)کی وجہ سے ہی امریکہ دنیا کی واحد سپر پاور بنا تھا ۔اب امریکہ اور بھارت کا اتحاد ہے ۔لیکن ہماری سبھی حکومتیں امریکہ کی خوشنودی کی طالب رہیں ہیں۔
کہنا پڑتا ہے کہ قیام پاکستان کے بعد تیسری نسل(موجودہ طالب علم) بانی قوم قائد اعظم محمد علی جناح کے تصور پاکستان سے آشنا نہیں ہے ۔ ان میں وہ حب الوطنی ابھارنے کے لیے ہمارے ذرائع ابلاغ اپنا کردار ادا نہیں کر رہے۔ہمیں سوچنا چاہیے کہ ہمارا ملک کہاں کھڑا ہے ۔موجودہ صورت حال جو ملک کی ہے ہم چومکھی مسائل میں گھرے ہوئے ہیں ۔اہم مسائل کو پس پشت ڈالا جا رہا ہے ۔ڈنگ ٹپائو پالیسی سے ملک چلایا جا رہا ہے ۔ہمارا معاشرہ دو نہیں چار انتہائوں کو چھو رہا ہے غریب اور امیر میں پڑھتا فرق ۔ایک طرف خط غربت سے نیچے سسکتی زندگی ۔دوسری طرف اربوں کے اثاثے ۔اسی طرح ایک طرف فرقہ پرستی کی انتہا اور دوسری طرف مذہب سے کسی حد تک بے زار نسل ۔اسکی وجوہات کا سب کو علم ہے حل کو بھی جانتے ہیں بات صرف عمل کی ہے ۔قانون ہے نفاذنہیں ۔اس قدر نفسا نفسی کا عالم ہے کہ لوگوں کے اس ہجوم میں انسان تلاش کرنا مشکل ہوگیاہے ۔ہمارے ملک کے موجودہ حالات ہمارے سیاست دانوں کے پیدا کردہ ہیں۔ حکمران (سابقہ ،موجودہ) اقتدار کے نشے میں گم ہیں۔
اس کی وجہ صرف ایک ہے ہم نے جس مقصد کی خاطر یہ ملک حاصل کیا تھا یعنی اسلامی قلعہ بنانے کے لیے اسلامی نظام کے نفاذ کے لیے اس سے ہٹ گئے ہیں اس وقت ملک کوجن مسائل کا سامنا ہے ان کو حل کرنے کا صرف ایک ہی راستہ ہے وہ ہے اللہ کابنایا ہوا نظام حکومت اس ملک میں نافذ کر دیا جائے ۔ ضرورت ہے چھوٹے چھوٹے ذاتی مفادات کی بجائے قومی وملکی مفادات کو ترجیح دیں۔ہم پاکستانی ایک قوم ہیں،ہم سب مسلمان ہیں ہم کو الگ الگ کرنے والے ہمارے سیاست داں ہیں ،مذہبی رہنما ہیں یہ ہمارے درمیان تفرقہ پیدا کر کے ہم پر حکومت کر رہے ہیں ۔جس دن عوام نے یہ بات جان لی اس دن ایک نیا پاکستان وجود میں آ جائے گا ۔اس کے لیے ہم سب کو سچائی کا پیمانہ قرآن و حدیث ۖ بنانا ہو گا۔
سرینگر میں آزادی کے نعرے اور راجناتھ کی بے بسی
یوم عظمت و رفعت 6 ستمبر
