ممبئی (جیوڈیسک) کرکٹ کے پاک بھارت تلخی کی بھینٹ چڑھنے کا خطرہ بڑھنے لگا، لاہور لائنز کی چیمپئنز لیگ میں شرکت پر غیر یقینی کے بادل چھا گئے ہیں۔
بھارتی کرکٹ بورڈ نے گیند اپنی حکومت کے کورٹ میں ڈال کر ہاتھ جھاڑ لیے، بی سی سی آئی کا کہنا ہے کہ جو حکم ملا اسی پر عمل کریں گے، پی سی بی پر بھی یہ واضح کر دیا۔
تفصیلات کے مطابق چیمپئنز لیگ ٹوئنٹی 20 ٹورنامنٹ کا آغاز 13 ستمبر سے بھارت میں ہونا ہے، بھارتی بورڈ نے پاکستانی چیمپئن سائیڈ لاہور لائنز کو بھی شرکت کی دعوت دی تھی، تاہم بھارت اور پاکستان کے درمیان سیاسی محاذ پر ایک بار پھر کشیدگی سے معاملات بگڑ گئے ہیں۔
اس وقت بھارت میں پاکستان مخالف حکومت قائم ہے جس نے کچھ دنوں قبل سیکریٹری خارجہ سطح کے مذاکرات بھی منسوخ کر دیے تھے، گذشتہ کچھ دنوں سے سرحد پار سے بلاجواز اور اشتعال انگیز فائرنگ کا سلسلہ بھی جاری ہے۔ اس صورتحال میں چیمپئنز لیگ میں لاہور لائنز کی شرکت مشکوک دکھائی دینے لگی۔
حسب سابق اس بار بھی بھارتی کرکٹ بورڈ نے معاملہ اپنی حکومت کے سر ڈال کر ہاتھ جھاڑ لیے ہیں۔ بی سی سی آئی کی جانب سے وزارت داخلہ سے لاہور لائنز کی ایونٹ میں شرکت کے حوالے سے رائے طلب کی گئی تاہم گذشتہ روز تک کوئی جواب موصول نہیں ہوا تھا۔
بورڈ کے ایک ٹاپ آفیشل نے کہا کہ ہم چیمپئنز لیگ میں پاکستانی سائیڈ کی شرکت کے حوالے سے فی الحال ’’دیکھو اور انتظار کرو‘‘ کی پالیسی اختیار کیے ہوئے ہیں، ہمیں اس ہدایت پر عمل کرنا ہے جو حکومت کی جانب سے موصول ہو گی، اس بارے میں ہم نے پاکستان کرکٹ بورڈ کو بھی آگاہ کر دیا ہے۔ یاد رہے۔
کہ بھارت نے سیاسی وجوہات کی بنا پر پاکستانی ٹوئنٹی 20 چیمپئن سائیڈ پر اس ایونٹ کے دروازے کافی عرصے بند رکھے تھے تاہم گذشتہ 2 ایونٹس میں سیالکوٹ اسٹالینز اور پھر فیصل آباد وولفز نے کوالیفائنگ راؤنڈ کھیلا، دونوں ٹیمیں اس سے آگے نہیں بڑھ پائی تھیں۔
دوسرا ون ڈے، سری لنکا نے پاکستان کو 77 رنز سے شکست دیدی
کبڈی ہیروز وقاص گجر اور لالہ عبید بغیر این او سی واہگہ بارڈر پر گرفتار
