تحریر : شہزاد حسین بھٹی پاکستان ریلوے ایک حکومتی ادارہ ہے جو کہ ذرائع آمدورفت میں اہم کردار ادا کر رہا ہے مسافروں کی مسافت ہو یا پھر سامان کی ترسیل پاکستان ریلوے سب سے سستا ترین ذرائع آمدورفت ہے یہ پاکستان کے دوردراز علاقوں کو آپس میں جوڑتاہے اور خوبصورت مقامات کی سیر بھی کراتاہے ۔سر ہنری ایڈورڈ نے کراچی بندرگاہ بنانے کا کام سب سے پہلے تجویز کیا اس نے نہ صرف بندرگاہ بلکہ ریلوے کا راستہ بنانے کی بھی ضرورت محسوس کی ۔یہ 1847 ء کی بات ہے جب سر ہنری ایڈورڈ سند ھ کے کمشنر بن کر آئے اس وقت سند ھ کوبمبی سے ملا دیا گیا ۔سر ہنری نے لارڈ ڈلہوز ی سے اجازت لے کر کراچی سے کوٹری ،کوٹری سے دریائے سند ھ کوپار کرتے ہوئے ملتان اور پھر ملتان سے لاہور تک ریلوے لائن بچھانے کے لیئے سروے 1858ء میں شروع کروا دیا ۔پہلی مرتبہ 13مئی 1861ء کو کراچی سے کوٹری تک عام لوگوں کے لیئے ریلوے لائن کھول دی گئی ۔کراچی سے کیماڑی تک کے لیئے ریلوے لائن 16جون 1889 ء کو شروع کر دی گئی اور پھر کیماڑی سے کوٹری تک 1879 ء میں شروع ہوئی اس طرح کئی دوسری شاخیں پشاور سے کراچی ،پشاور سے لاہور اور لاہورسے ملتان تک انیسویں صدی کے آخر تک اور بیسوی صدی کی پہلی چوتھائی میں بنائی گئیں۔1885ء میں ریلوے کی چار شاخوں کو ملا کر ایک کمپنی سکنڈے “پنجاب اور دہلی ریلویز”بنا دی گئی جسے انڈین سیکرٹری آف سٹیٹ نے خرید لیا ۔1886ء میں اسکا نام “نارتھ ویسٹرن سٹیٹ ریلویز ” رکھا گیا جس کو بعد میں نارتھ ویسٹرن ریلو یزکے نام سے تبدیل کر دیا گیا۔
بر صغیر کی تقسیم کے وقت “نارتھ ویسٹرن ریلویز1847 ء ” ایکٹ میں تبدیلی کر کے ریل پٹری کے راستے کو انڈیا لیونگ روٹ مائل ٹو پاکستان 5048 میل(8122 کلومیٹر)پاکستان میں تبدیل کر دیا گیایعنی ریلوے کی 5048 میل(8122 کلومیٹر) ریلوے پٹری پاکستان کے حوالے کر دی گئی۔1954ء میں ریلوے کو مردان اور چارسدہ تک بڑھا دیا گیا ۔اسی طرح کوٹ ادو سے کشمور تک کی ریلوے لائن کو 1969ء سے 1973ء کے درمیانی عرصے میں تعمیر کیا گیا ۔حال ہی میں حکومت نے ریلوے لائن کو کراچی سے لاہور ڈبل کرنے کا فیصلہ کیا جس کے نتیجے میں اب تک ملتان سے خا نیوال اور خانیوال سے رائیونڈ تک لائن کو ڈبل کر دیا گیا ہے اور باقی پر کام تعطل کا شکا ر ہے۔ پاکستان میں ریلوے دفاعی اہمیت کے پیش نظر لائف لائن کی حیثیت رکھتاہے ۔مگر بد قسمتی سے ہر دور میں ریلوے کی بد حالی میں اضافہ ہوتا رہا اور جمہوری حکومتوں نے ریلوے کو تباہی کے دہانے پر پہنچا دیا تاکہ اسے تبا ہ و برباد کرکے وزرا اور حکومتی عہدے داروں کی پرائیویٹ ٹرانسپورٹ کو فروغ دیا جاسکے۔
پیپلز پارٹی کے گذشتہ دور حکومت میں ریلوے کی زبوہ حالی اس مقام پر پہنچ گئی کہ ریلوے کے پاس ڈیزل اوراپنے روزمرہ اخراجات پورے کرنے کے لیئے بھی پیسے نہیں تھے ۔ملتان سمیت بڑے بڑے ریلوے اسٹیشنوں کی بجلی عدم ادائیگی بل کی بناء پر کاٹ دی گئی ۔ریلوے میں کام کرنے والے پچاسی ہزار سے زائد ملازمین کا مستقبل داؤ پر لگ گیا ۔بجلی نہ ہونے کی وجہ سے ریلوے کواٹروں میں رہنے والے ملازمین کے گھروں میں پانی تک نایاب ہو گیا ۔لیکن ریلوے کے اس وقت کے وزیر غلام احمد بلور کے کا نوں پر جوں تک نہ رینگی ۔ خلاف ضابطہ ریلو ے میں اپنے علاقے کے نا ہل افراد کو پیسے لے کربھرتی کیااوراپنی ذاتی ٹرانسپورٹ کو فروغ دینے کے لیئے ریلوے کے تابوت میں آخری کیل تک ٹھونک دی۔
Khawaja Saad Rafique
وفاقی حکومت کی جانب سے ریلوے کی بحالی کے لیئے سال 2012۔2013میں 22.8 بلین روپے ریلوے کے 37 مختلف پراجیکٹس کومکمل کرنے کے لیئے اد ا کئے گئے تاکہ دفاعی لحاظ سے ریڑھ کی ہڈی کی حیثیت رکھنے والی ریلوے میں سدھار لایا جا سکے۔ موجودہ حکومت کے اقتدار سنبھالنے کے بعدریلوے میں خواجہ سعد رفیق کے بطوروفاقی وزیر چارج سنبھانے کے بعدریلوے میں بڑے پیمانے پر انتظامی تبدیلیاں کی گئیںجس کے نتیجے میں کرپٹ عناصر کو ہٹانے اور اہل افسران کو لگانے سے ریلوے کی حالت میں سدھار آیا۔ وفاقی حکومت کی امداد اور خصوصی توجہ سے ریلوے کی آمدن میں اضافہ ہونا شروع ہو ا ہے اور ریلوے خسارے سے نکل کر آمدن کی طرف رواں دواں ہے ۔ ریلوے کا سفر دیگر ذرائع نقل و حمل کے کافی محفوظ تصور کیا جا تا ہے مگر اس کے باوجود پاکستان ریلوے کی تاریخ میں کئی بڑے حادثات رونما ہوئے ہیں جن میں بھاری نقصانات کے ساتھ قیمتی جانوں کا ضیاع بھی ہوا ۔4 جنوری 1990ء کو ریلوے کی تاریخ کا بھیانک حادثہ سکھرکے قریب گاؤںسنگی کے قریب پیش آیا ۔جہاں بہاؤ الدین ذکریا ایکسپریس ملتان سے کراچی جاتے ہوئے غلط کانٹا ملنے کے باعث دوسرے ٹریک پر کھڑی 67 بوگیوں پر مشتمل فریٹ کار سے 35 کلومیڑ پر آور کی رفتار سے جا ٹکرائی جس کے نتیجے میںکم از کم تین سو سات مسافر لقمہ اجل بن گئے ۔
13جولائی 2005 ء کو کراچی ایکپسریس گھوٹکی اسٹیشن پر پہلے سے کھڑی کوئٹہ ایکسپریس سے جا ٹکرائی جس سے ٹرین کی 13بوگیا ں پٹری سے اتر گئیں جبکہ مخالف سمت سے آنے والی تیز گام ایکسپریس حادثے کا شکار ڈی ریل بوگیوں سے ٹکرائی جس کے نتیجے میں ایک سو بیس افراد جان سے گئے ۔21اگست 2005ء کو سپرپارسل ایکسپریس کی لانڈھی کے قریب ملیر برج پر اورلوڈنگ کی وجہ سے ایکسل ٹوٹنے سے آٹھ بوگیاں پٹری سے اتر گئیں جس کے نتیجے میں ریلوے گاڑیوں کی آمد ورفت چوبیس گھنٹے تک معطل رہی۔ 19دسمبر 2007ء کو کراچی سے لاہور چلنے والی کراچی ایکسپریس گاوںمہاراب پور سند ھ میں پٹری سے اتر گئی جس کے نتیجے میںٹرین کی سولہ میں سے چودہ بوگیاں پٹری سے اتر گئیں جسے دہشتگردی کا شاخسانہ قرار دیا گیا تاہم سرکاری طور پر اس حادثے کو ریلوے ٹریک کی کمزوری قرار دیا گیا ۔02 جولائی 2015ء کو پنوں عاقل سے کھاریاں جانے والی خصوصی ٹرین کی چھ بوگیاں اور انجن وزیر آباد کے قریب ریلوے پل ٹوٹنے سے نہر میں گر گیئں جس کے نتیجے میں فوج کے تین اعلیٰ افسران سمیت انیس افراد ہلاک ہو گئے ہیں۔فوج کے شعبہ تعلقات عامہ کی جانب سے جاری ہونے والے بیان میں کہا گیا تھا کہ واقع جمعرات کی دوپہر جامکے چھٹہ میں نہر چھناواں پر پیش آیا ۔سرکاری ٹی وی کے مطابق جمعہ کو چودہ افراد کی لاشیں نکال لی گئیں ۔جبکہ لاپتہ افراد کی تلاش کا کام جاری ہے۔
Railway Train Accident
حادثے کے بعد فوری طورپر امدادی کاروائیاں شروع کر دی گیئں جن میں فوج کے غوطہ خور اور آرمی ایوی ایشن کے ہیلی کاپٹروں نے حصہ لیا ۔پاکستان ریلوے کے شعبہ عامہ کے ڈائریکٹر جنرل رؤف خان کا کہناہے کہ کچھ عرصہ پہلے ہی نہروں اور دریاؤں پر ریلوے ٹریک کا معائنہ کیا گیا تھا ۔ جس میں اس ٹریک کو بھی کلیر قرار دیا گیا تھا۔جبکہ سابق وزیر ریلوے شیخ رشید احمد کا کہنا ہے کہ ریلوے انتظامیہ جھوٹ بول رہی ہے کیونکہ ریلوے کے پاس اتنا بجٹ ہی نہیں ہے کہ وہ ریلوے ٹریک اور پلوں کا سروے کروا سکے کیونکہ اس پر بھاری اخراجات آتے ہیں۔ ملک بھر میں ریلوے روٹس پر 13,841چھوٹے بڑے پل ہیںجن میں سے 55%اپنی طبعی عمر پوری کر چکے ہیں۔2911پل ایک سو بیس سال پرانے ہیں۔ سو سے ایک سو بیس سال پرانے پلوںکی تعداد 1352ہے ۔ 1243پل اسی سے سو سال پرانے ہیں جبکہ ساٹھ سے اسی سال پرانے پلوں کی تعداد640ہے۔ بدقسمتی سے پاکستان کی کسی حکومت نے ان پلوں کی مرمت اور تعمیر پر توجہ نہیں دی۔ ضرورت اس امر کی ہے کہ انگریز دور کے ان بوسیدہ پلوںکو نئے سرے سے تعمیر کیا جائے کیونکہ اب ان حادثات کے بعد ممکنہ طور پرساٹھ سے ستر فیصد پل دوبارہ تعمیر کے قابل ہیں۔
موجودہ حکومت نے پینتالیس ارب روپے سے میٹرو کے بجائے اگرریلوے کی بحالی پر توجہ دیتی تو اس سے ایک شہر کے بجائے پورے ملک میں ٹرانسپورٹیشن میں انقلاب آجاتا۔ ریلوے ٹریکس کی طرح ریلوے کالونیوں کے کوارٹر بھی اسی سے سو سال پرانے ہونے کی وجہ سے انتہائی بوسیدہ ہو چکے ہیں جن سے کسی بھی قدرتی آفات، زلزلے اور بارشوں سے وسیع پیمانے پر انسانی جانوں کا ضیاں کا احتمال ہے۔حکومت کو چاہیے کہ وہ اس جانب بھی توجہ دے تاکہ ریلوے ملازمین کی زندگیوں میں آسانیاں پیدا کی جا سکیں۔ ابتدائی تحقیقات کے مطابق٢ جولائی کوپیش آنے والا ریلوے حادثہ بظاہر دہشت گردی کا واقعہ دیکھائی دیتا ہے۔ریلوے اور پاک آرمی کی تحقیقاتی ٹیموں نے اپنی تحقیقات کا آغاز کر دیا ہے۔اگر کوئی محکمانہ طور پر اپنے فرائض سے غفلت اور لاپرواہی کا مرتکب ہوا ہے اسے قرار واقعی سزا دی جائے تاکہ آیندہ ایسے واقعات کو رونما ہونے سے روکا جا سکے۔جہاں تک دہشت گردی کا تعلق ہے تو یہ امکان بھی رد نہیں کیا جا سکتا۔ملک اس وقت حالت جنگ میں ہے اور دشمن ہمارے ملک اور دفاع کو غیرمحفوظ بنانے کے لیے آئے روز نت نئے ہتھکنڈے استعمال کرتاآ رہا ہے لیکن ہمیںبحثیت قوم اپنے عزم، حوصلے اور ارادوں کو متزلزل نہیں ہونے دینا۔ہمیں اپنی پاک افواج کے ساتھ ملکرملک دشمن عناصر کو قرار واقعی سزا دینا ہو گی تاکہ ہم اپنی آنے والی نسلوں کو ایک بہتر مستقبل دے سکیں
اہلِ قلم بھی کرتے ہیں کیا کیا
دھرنے کیوں ناکام ہوئے؟
