عوام کو کہیں بھی اورکسی بھی قسم کا کوئی تحفظ حاصل نہیں ہے محمد رئیس
Posted on May 8, 2013 By Noman Webmaster کراچی
کراچی : مفاد پرستانہ سیاست اور منافق قیادت نے عوام کو مسائل و مصائب کے گہرے غار میں دھکیل دیا ہے عوام ابتری و پریشانی کی ذلت آمیز زندگی گزارنے پر مجبور ہیں انہیں کسی بھی قسم کا تحفظ حاصل نہیں ہے اگر عوام امن و تحفظ کی فراہمی اور زندگی کے مسائل و مصائب سے نجات چاہتے ہیں۔
تو ان تمام سیاسی قیادتوں اور جماعتوں کو مسترد کردیں جو ماضی میں اقتدار پر قابض ہوکر کرپشن اور عوامی مسائل و مصائب کو فروغ دیتی رہیں اور آج کھربوں روپے کے انتخابی اخراجات کے ذریعے عوام کو بے وقوف بنانے کی کوشش کررہی ہیں۔
یہ بات کراچی کے حلقہ پی ایس 128لانڈھی سے آل پاکستان مسلم لیگ کے حمایت یافتہ امیدوار محمد رئیس نے مرزا عتیق بیگ تحقیق احمد خان عرف پیارے بھائی فاروق قریشی محمد ذاکر ارشاد احمد محمد شعیب محمد معراج محمد سبطین اور حنیف وارثی کے ہمراہ اپنے حلقہ انتخاب میں مختلف کارنر میٹنگز کے دوران عوامی اجتماعات سے خطاب کرتے ہوئے کہی۔
انہوں نے کہا کہ عوامی حمایت سے منتخب ہوکر عوام کو امن و تحفظ اور زندگی گزارنے کی تمام بنیادی سہولیات کی فراہمی کیلئے جدوجہد کروں گا اوراپنے حلقے کی عوام کے مسائل کے حل کیلئے اپنا دیانتدارانہ و ذمہ دارانہ کردار پوری فرض شناسی سے اداکرونگا کیونکہ میں یہ وعدہ اپنے حلقے کے عوام سے نہیں بلکہ اپنے اللہ سے کررہاہوں اور اللہ سے کوئی مسلمان وعدہ خلافی نہیں کرسکتا۔
