اسلام آباد (جیوڈیسک) پیپلز پارٹی کے ترجمان فرحت اللہ بابر نے سابق وزیراعظم یوسف رضا گیلانی کے پرویز مشرف سے معاہدے سے متعلق بیان پر وضاحت دیتے ہوئے کہا ہے کہ پرویز مشرف نے مواخذے کے ڈر سے استعفیٰ دیا تاہم پیپلز پارٹی نے کسی کے ساتھ کوئی ڈیل نہیں کی۔
اپنے ایک بیان میں فرحت اللہ بابر نے کہا کہ سابق صدر آصف زرداری نے پرویز مشرف کے مواخذے کی دستاویز تیار کرنے کے لئے ایک کمیٹی تشکیل دی تھی جس میں مجھ سمیت رضا ربانی اور شیری رحمان جبکہ مسلم لیگ(ن)کی جانب سے اسحاق ڈار اور احسن اقبال شامل تھے جس کے بعد پرویز مشرف کو پیغام بھجوایا گیا کہ ان کے مواخذے کی تیاریاں مکمل کرلی گئی ہیں جبکہ یہ پیغام صوبائی اسمبلیوں کی جانب سے مواخذاے کی قراردادیں منظور ہونے کے بعد بھجوایا گیا تھا۔
فرحت اللہ بابر نے کہا کہ پرویز مشرف نے اس پیغام کے ذریعے نوشتہ دیوار پڑھ لی تھی جس کے بعد انہوں نے اپنے مواخذاے کے ڈر سے استعفیٰ دینے کا فیصلہ کیا تاہم اس سلسلے میں پیپلزپارٹی نے کسی بھی معاملے پر ان سمیت کسی کےساتھ کوئی ڈیل نہیں کی تھی۔
واضح رہے کہ سابق وزیراعظم یوسف رضا گیلانی نے گزشتہ روز بیان دیا تھا کہ نواز شریف پرویز مشرف کے خلاف اقدامات سے گریز کریں کیونکہ پرویز مشرف کے معاملے پر اسٹیبلشمنٹ سے یہ معاہدہ ہوا تھا کہ صدارت سے استعفیٰ کے بعد انہیں محفوظ راستہ دیا جائے گا۔
فلسطینیوں کی حمایت پر پاکستان کے شکر گزار ہیں اور ہمیں اس دوستی پر فخر ہے، فلسطینی سفیر
دہشتگردی کا خطرہ، وزیر داخلہ کی جڑواں شہروں کی پولیس کو رابطے بڑھانے کی ہدایات
