اسلام آباد (جیوڈیسک) پٹرولیم مصنوعات کی قیمتوں میں کمی کا نوٹیفیکیشن جاری کر دیا گیا۔
پیٹرول 9 روپے 66 پیسے فی لیٹر جبکہ ہائی سپیڈ ڈیزل 7 روپے 12 پیسے فی لیٹر سستا کر دیا گیا۔ قیمتوں میں کمی کا اطلاق رات 12 بجے سے ہوگا۔
سرکاری نوٹیفکیشن کے مطابق پیٹرول کی قیمت میں 9 روپے 66 پیسے فی لیٹر کمی کی گئی ہے جس کے بعد اس کی نئی قیمت 84 روپے 53 پیسے ہوگی۔ ہائی سپیڈ ڈیزل 7 روپے 12 پیسے فی لیٹر کمی کے ساتھ 94 روپے 9 پیسے پر دستیاب ہوگا۔
لائٹ ڈیزل 5 روپے 39 پیسے فی لیٹر کمی کے ساتھ 77 روپے 98 پیسے فی لیٹر پر فروخت ہوگا۔ ہائی اوکٹین کی قیمت میں بھی 10 روپے 18 پیسے فی لیٹر کمی کی گئی ہے جس کے بعد اس کی نئی قیمت 106 روپے 27 پیسے فی لیٹر ہوگی۔
مٹی کا تیل بھی 4 روپے 34 پیسے فی لیٹر کمی کے ساتھ 83 روپے 18 پیسے فی لیٹر پر دستیاب ہوگا۔ نئی قیمتوں کا اطلاق آج رات 12 بجے سے ہوگا۔
