اسلام آباد (جیوڈیسک) چیرمین تحریک انصاف عمران خان نے کہا ہے کہ حکومت نے شمالی وزیرستان آپریشن پر اعتماد میں نہیں لیا لیکن تحریک انصاف پاک فوج کے شانہ بشانہ کھڑی ہے اگرہمیں اعتماد میں لے لیا جاتا تو بجٹ میں متاثرین کے لئے رقم رکھتے۔
پارلیمنٹ ہاؤس کے باہر عمران خان کا کہنا تھا کہ شمالی وزیرستان میں آپریشن کے حوالے سے وزیراعظم کو کچھ علم نہیں تھا اور فوجی ترجمان کے ذریعے آپریشن کا علم ہوا جبکہ آپریشن کے نتیجے میں جو صوبہ سب سے زیادہ متاثر ہوگا اس کے وزیراعلی کو بھی ٹی وی کے ذریعے آپریشن کا علم ہوا۔
انہوں نے کہا کہ آپریشن کے حوالے سے کچھ نہیں بتایا گیا اور اب حمایت مانگی جارہی ہے، اگر حکومت کی جانب سے آپریشن کی پیشگی اطلاع دی جاتی تو خیبرپختونخوا کی حکومت نقل مکانی کرنے والوں کے لئے بجٹ میں خطیر رقم رکھتی تاہم ایسا نہیں کیا گیا۔
چیرمین تحریک انصاف نے کہا کہ جو لوگ بات چیت کرنا چاہتے ہیں آپریشن کے دوران ان کے ساتھ کیا ہوگا حکومت نے اس حوالے سے کوئی بات واضح نہیں کی، حکومت سے مطالبہ ہے کہ تمام سیاسی قیادت کو شمالی وزیرستان آپریشن پر آن بورڈ لے، اگر حکومت کی جانب سے اعتماد میں لیا جاتا تو اچھا مشورہ دے سکتے تھے لیکن بدقسمتی سے ایسا نہیں کیا گیا۔
انہوں نے کہا کہ ملک کا سب سے بڑا مسئل امن وامان کا ہے، اگرامن ہوگا تو سرمایہ کاری ہو گی، وزیراعظم سرمایہ کاری کے لئے گھوم پھر رہے تھے لیکن دہشت گردی اس سے بڑا مسئلہ تھا لیکن وزیراعظم نے سنجیدہ مذاکرات کے بجائے بیرون ملک دوروں پر زیادہ توجہ دی۔
پاک فوج کے سربراہ جنرل راحیل شریف 58 برس کے ہو گئے
اپوزیشن جماعتوں نے شمالی وزیرستان آپریشن کی حمایت کر دی
