اسلام آباد (جیوڈیسک) وزیر اعظم نواز شریف اور بھارتی وزیر خارجہ کے درمیان ملاقات ہوئی ہے جس میں تصفیہ طلب معاملات اور کرکٹ سیریز کی بحالی پر تبادلہ خیال کیا گیا۔
وزیراعظم ہاؤس آمد پر وزیراعظم نوازشریف نے سشما سوراج کااستقبال کیا جب کہ دونوں کے درمیان ملاقات ایک گھنٹے تک جاری رہی جس میں مشیرخارجہ سرتاج عزیز، سیکرٹری خارجہ اعزازچوہدری، وزیر اعظم کے معاون خصوصی طارق فاطمی اور قومی سلامتی کے مشیر ناصر جنجوعہ شریک تھے اور بھارت کی جانب سے سشما سوراج کے ہمراہ بھارتی سیکرٹری خارجہ اوربھارتی ہائی کمشنر سمیت دیگر حکام نے شرکت کی۔
وزیراعظم اور بھارتی وزیر خارجہ کے درمیان ملاقات میں دونوں ممالک کے درمیان تصفیہ طلب معاملات کے حل، پاک بھارت کرکٹ سیریز اور دہشت گردی کے خاتمے پر امور پر بات چیت ہوئی جب کہ اس دوران دونوں ممالک کے درمیان مذاکرات کی بحالی پر بھی زور دیا گیا۔ ذرائع کے مطابق اس اہم ملاقات میں مسائل کے حل کے لیے باہمی رابطوں کو بڑھانے پر بھی اتفاق کیا گیا۔
ذرائع کا کہنا ہے کہ سشما سوراج نے وزیر اعظم نواز شریف کو بھارتی وزیراعظم کی جانب سے خیرسگالی کا پیغام پہنچایا جب کہ اس موقع پر وزیراعظم نوازشریف نے کہا کہ پاکستان بھارت سمیت تمام ہمسایہ ملکوں کےساتھ خوشگوارتعلقات چاہتا ہے، کسی بھی مسئلے کا حل بات چیت ہے اس لیے دونوں ممالک کوتمام تصفیہ طلب مسائل بات چیت سےحل کرنے چاہئیں۔
افغان طالبان کو مذاکرات کی میز پر لایاجائے، ہارٹ آف ایشیا کانفرنس کا مشترکہ اعلامیہ
پی آئی اے کو کارپوریشن میں تبدیل کرنے سے متعلق آرڈیننس قومی اسمبلی میں پیش
