اسلام آباد (جیوڈیسک) وزیر اعظم میاں محمد نواز شریف نے اے سی بزنس کلاس گرین لائن ٹرین کا افتتاح کر دیا، ان کا کہنا تھا کہ ریلوے ترقی کی راہ پر چل پڑا، پی آئی اے کو بھی خوشحال بنائیں گے۔
افتتاحی تقریب سے خطاب کرتے ہوئے وزیر اعظم میاں محمد نواز شریف نے کہا کہ حکومت مختلف اداروں کے مجموعے کا نام ہے اور ہم اداروں کو فعال کرنے کی کوشش کر رہے ہیں ان اداروں میں ایک ادارہ ریلوے کا بھی ہے جوکہ مدت سے زوال پذیر تھا لیکن خواجہ سعد رفیق کی قیادت میں ریلوے نے صرف دو سال میں ادارے کو ترقی کی راہ پر ڈال دیا اور آمدن میں خاطر خواہ اضافہ ہوا۔
ابھی ہمیں ریلوے کی بحالی میں بہت کام کرنا ہے، گرین لائن ٹرین کا افتتاح قابل ستائش اقدام ہے ، سفری سہولیات کو عالمی معیار کے مطابق بنانے کے لیے گرین لائن ٹرین پہلا قدم ہے جس سے اسلام آباد سے شہر قائد اور لاہور کیلئے سفر کو آرام دہ اور برق رفتار بنایا جا رہا ہے۔ اب ٹرین میں سفر کرنیوالوں کی دس لاکھ روپے کی انشورنس بھی کی جائے گی۔
مجھے پوری امید ہے کہ گوادر سے کاشغر لنک کے بعد آئندہ دور میں ترکی کے لیے بھی ریلوے لائن شروع کریں گے ۔ دریں اثناء وزیر ریلوے خواجہ سعد رفیق نے بتایا کہ وزارت ریلوے میرے لیے بہت بڑا چیلنج تھا جس کو احسن انداز سے نبھا رہا ہوں، میرے دور میں ادارے نے بے پناہ ترقی کی۔
ہم نے ادارے سے رشوت اور سفارش کے کلچر کو جڑ سے اکھاڑ پھینکا ہے اب جیالا ہو یا متوالا سب کو میرٹ پر ملازمت ملتی ہے۔
ملتان: پی ٹی آئی کارکنان کا صحافیوں پر بلا جواز تشدد، آئی جی نے رپورٹ طلب کر لی
دشمن ایجنسیاں پاکستان کو غیر مستحکم کرنا چاہتی ہیں: آرمی چیف
