پشاور (جیوڈیسک) خیبرپختونخوا حکومت نے شمالی وزیرستان سے نقل مکانی کرنے والے متاثرہ خاندانوں میں امدادی رقم کی فراہمی کا عمل شروع کردیا جبکہ پہلے مرحلے میں 113 متاثرہ خاندانوں کو رقم فراہم کر دی گئی۔
ایکسپریس نیوز کے مطابق خیبرپختونخوا حکومت نے شمالی وزیرستان میں جاری آپریشن ضرب عضب کے باعث متاثرہ خیموں میں قیام پذیر رجسٹرڈ متاثرہ خاندانوں میں امدادی رقم کی فراہمی کا عمل شروع کردیا جبکہ امدادی رقوم موبائل فون سمز کے ذریعے کی جارہی ہے۔ صوبائی حکومت کی جانب سے پہلے مرحلے میں 113 متاثرہ خاندانوں کو امدادی رقم دی گئی۔
حکومت کی جانب سے پہلے مرحلے میں متاثرین کو 8،8 ہزار روپے فراہم کئے گئے ہیں جس میں رمضان پیکج کی مد میں 5 ہزار روپے اور مکان کے کرائے کی مد میں 3 ہزار روپے دیئے جارہے ہیں۔ حکام کے مطابق شمالی وزیرستان سے نقل مکانی کرنے والے متاثرین کی تعداد 7 لاکھ 59 ہزار 835 ہوچکی ہیں جن کی دیکھ بھال کے لئے وفاقی و صوبائی حکومتیں کوششیں کر رہی ہیں۔
واضح رہے کہ شمالی وزیرستان سے نقل مکانی کرنے والے متاثرین بنوں ، ڈی آئی خان اور لکی مروت میں قائم خیموں میں قیام پذیر ہیں جن کی امداد کیلئے وفاقی و صوبائی حکومت نے رقم کی فراہمی کا اعلان کیا تھا، صوبائی حکومت کے علاوہ وفاقی حکومت نے متاثرین کو رمضان پیکج کی مد میں 20 ہزار روپے دینے کا اعلان کیا تھا۔
راجن پور: خوشحال خٹک ایکسپریس کو نشانہ بنانے کا منصوبہ ناکام
محمد یعقوب سیٹھی کی پنجاب اسمبلی کی رکنیت منسوخ
