دبئی (جیوڈیسک) آئی سی سی کی ایک روزہ میچوں کی نئی جاری ہونے والی رینکنگ میں آسٹریلیا کے مچل اسٹارک 6 درجے ترقی کے بعد پہلی پوزیشن پر آگئے ہیں جب کہ پاکستان کے جادوگر اسپنر سعید اجمل تیسری پوزیشن پر موجود ہیں۔
نئی عالمی درجہ بندی کے مطابق ایک روزہ میچوں کی بولنگ کیٹیگری میں 22 وکٹیں لے کر آسٹریلیا کو ورلڈ کپ جتوانے میں اہم کردار ادا کرنے والے مچل اسٹارک نے ڈیڑھ سال تک پہلی پوزیشن پر براجمان اور متنازع ایکشن کے باعث گزشتہ 6 ماہ سے عالمی کرکٹ سے دور قومی ٹیم کے جادوگر سعید اجمل سے یہ پوزیشن چھین لی۔
بولرز کی فہرست میں دوسری پوزیشن جنوبی افریقا کے آف اسپنر عمران طاہر نے حاصل کی جن کی درجہ بندی میں 9 درجے کی بہتری آئی ہے اور وہ 734 پوائنٹس کے ساتھ دنیا کے 11ویں بہترین بولر سے دوسرے بہترین بولر بن گئے ہیں، فہرست میں تیسری پوزیشن 718 پوائنٹس کے ساتھ سعید اجمل کی ہے جب کہ جنوبی افریقا کے ڈیل اسٹین 717 پوائنٹس کے ساتھ چوتھی پوزیشن پر ہیں۔
بیٹنگ کے شعبے میں جنوبی افریقا کے اے بی ڈیویلئرز 902 پوائنٹس کے ساتھ پہلی پوزیشن پر براجمان ہے، سری لنکا کے کمار سنگارا 860 پوائنٹس کے ساتھ دوسری اور جنوبی افریقا کے ہاشم آملہ 828 پوائنٹس کے ساتھ اس فہرست میں چوتھے نمبر ہیں۔
ٹیم رینکنگ میں پانچویں بار کرکٹ کے عالمی چیمپئن بننے کا اعزاز حاصل کرنے والی آسٹریلیا کی ٹیم 122 ریٹنگ پوائنٹس کے سرفہرست ہے، بھارت 116 پوائنٹس کے ساتھ دوسری اور جنوبی افریقا 112 پوائنٹس کے ساتھ تیسری پوزیشن پر ہے جب کہ ورلڈ کپ میں کوارٹر فائنل راؤنڈ سے باہر ہونے والی پاکستان کرکٹ ٹیم 95 پوائنٹس کے ساتھ ساتویں پوزیشن پر موجود ہے۔
امریکا کے سابق عالمی نمبر ون ٹائیگر ووڈز ٹاپ کے 100 کھلاڑیوں کی لسٹ سے باہر
کرکٹ ورلڈ کپ کے بعد ون ڈے شیلڈ بھی آسٹریلیا کے نام
