برسبین (جیوڈیسک) سرفراز احمد پر آخرکار قومی ٹیم مینجمنٹ کی نظرکرم پڑ ہی گئی اور نیٹ سیشن میں انھیں وکٹ کیپنگ اور بیٹنگ کی بھرپور مشقیں کرائی گئیں اس سے یہ امکان دکھائی دینے لگاکہ شاید زمبابوے کیخلاف انہیں صلاحیتوں کے اظہار کا موقع مل جائے گا۔
تفصیلات کے مطابق پاکستانی کرکٹ ٹیم نے گذشتہ روز بھی ایلن بورڈر فیلڈ میں پریکٹس کا سلسلہ جاری رکھا، اس دوران سرفراز احمد وکٹ کیپنگ اور بیٹنگ کی بھرپور مشقیں کرتے دکھائی دیے، فیلڈنگ کوچ گرانٹ لیوڈن نے انھیں ڈائیو لگا کر کیچ تھامنے کی بھی پریکٹس کرائی، اس سے قبل نیٹ سیشنز پر عمر اکمل پر زیادہ توجہ دی جا رہی تھی، جنھوں نے بھارت اور ویسٹ انڈیز سے میچز میں وکٹوں کے عقب میں فرائض انجام دیے مگر کئی کیچ ڈراپ کیے تھے۔
چیف کوچ وقار یونس نے تقریباً سوا گھنٹے تک پلیئرز کو فیلڈنگ پریکٹس کرائی، انھوں نے کیچنگ پر زیادہ زور دیا، واضح رہے کہ بھارت سے میچ میں6ڈراپ کیچز کا شکست میں اہم کردار رہا تھا، گذشتہ دن کھلاڑیوں نے بیٹنگ اور بولنگ کی مشق یا فزیکل ایکسرسائز پر زیادہ زور نہ دیا، کپتان مصباح الحق اور سینئر بیٹسمین یونس خان نے بمشکل چند ہی منٹ نیٹ پر گذارے، ناصر جمشید نے بھی زیادہ بیٹنگ نہ کی۔
البتہ حارث سہیل دیر تک صلاحیتیں آزماتے رہے، عمر اکمل اور احمد شہزادکو بیٹنگ کوچ گرانٹ فلاورنے کھیل میں بہتری کیلیے پریکٹس کرائی، بلو شرٹس سے میچ میں 5 پلیئرزکو آؤٹ کرنے والے پیسر سہیل خان نے گذشتہ روز بولنگ پریکٹس نہیں کی، وقار یونس نے فاسٹ بولرز وہاب ریاض اور محمد عرفان کو ’’ٹارگٹ پریکٹس‘‘ کرائی، اس میں دونوں کو رنز بچانے کا طریقہ سکھایا گیا اور فیلڈ سیٹنگ کے مطابق بولنگ کی ہدایت دی گئی، اس دوران مصباح الحق جارحانہ شاٹس کھیلتے رہے۔
سری لنکا کا بھارتی کھلاڑی کیخلاف میچ فکسنگ تحقیقات کرانے کا مطالبہ
ڈومیسٹک کرکٹ میں پیسے لینے کا نیا پنڈورا بکس کھل گیا
