اسلام آباد (جیوڈیسک) وزیر اعظم نواز شریف نے کہا ہے کہ سعودی عرب کو عدم استحکام سے دوچار کرنے کی تمام کوششیں ناکام بنائی جائیں گی اور اس کی داخلی سلامتی اور خودمختاری پر کوئی آنچ نہیں آنے دیں گے۔
دفتر خارجہ سے وزیر اعظم نواز شریف کے دورہ سعودی عرب کی جاری تفصیلات کے مطابق وزیر اعظم نے سعودی فرمانروا شاہ سلمان بن عبدالعزیز السعود سے تفصیلی ون آن ون ملاقات کی جب کہ دونوں ممالک کے درمیان وفود کی سطح پر مذاکرات بھی ہوئے جس میں وزیر اعظم کے ہمراہ آرمی چیف جنرل راحیل شریف، وزیر دفاع خواجہ آصف، معاون خصوصی طارق فاطمی اور سیکریٹری خارجہ اعزاز چوہدری بھی شریک تھے، ملاقات میں یمن کی صورتحال کے ساتھ دونوں ممالک کے درمیان موجودہ دفاعی، سیکیورٹی اور انٹیلی جنس تعاون بڑھانے پر اتفاق کیا گیا جب کہ نواز شریف نے مشرق وسطیٰ بحران سے خطے کی سلامتی کو شدید خطرات پر تشویش کا اظہار کیا۔
اس موقع پر وزیر اعظم نے کہا کہ پاکستان یمن مسئلے کے حل اور آئینی حکومت کی بحالی کے لئے اقوام متحدہ کی قرارداد کی مکمل حمایت کرتا ہے اور یمن بحران کے پر امن حل کے لئے مثبت کردار ادا کرنے کو تیار ہے، دہشت گرد گروپوں اور غیر ریاستی عناصر کو خطے کو غیر مستحکم نہیں کرنے دیا جائے گا اور حوثی باغیوں کو فوری طور پر یمنی دارالحکومت سے نکلنا ہوگا۔
انہوں نے کہا کہ سعودی عرب کی علاقائی سالمیت اور خود مختاری کا تحفظ پاکستان کا پالیسی ہے، سعودی عرب کو عدم استحکام سے دوچار کرنے کی تمام کوششیں ناکام بنائی جائیں گی اور اس کی سلامتی اور خودمختاری پر کوئی آنچ نہیں آنے دیں گے۔
کنور نوید جمیل کی کامیابی سے ایم کیو ایم پر لگے داغ دھل گئے : الطاف حسین
پوری قوم نے فورسز کے ساتھ ملکر ملک سے دہشت گردی کی لعنت کا خاتمہ کرنا ہے، چوہدری نثار
