اسلام آباد (اصل میڈیا ڈیسک) اسٹیٹ بینک نے کورونا کے خلاف جنگ کیلئے اسپتالوں اور میڈیکل سینٹرز کو رعایتی قرض کی حد 20کروڑ روپے سے بڑھا کر 50 کروڑ روپے کر دی۔
پہلے بینک اسپتالوں اور میڈیکل سینٹرز کو صرف 20 کروڑ روپے قرض دے سکتے تھے لیکن اب مرکزی بینک نے اس کی حد کو بڑھادیا ہے۔
اسٹیٹ بینک اعلامیے کے مطابق کمرشل بینکوں کو اس مد میں صفر شرح سود پر پیسہ فراہم کیا جائےگا جبکہ بینک زیادہ سے زیادہ 3 فیصد شرح سود پر یہ قرض اسپتالوں اور میڈیکل سینٹرز کو دے سکیں گے۔
بینکوں کے پاس 23 اسپتالوں کی 3 ارب 60 کروڑ روپے کی درخواستیں زیر غور ہیں تاہم مرکزی بینک نے 11 اسپتالوں کیلئے اس مد میں 2 ارب 20 کروڑ روپے منظور کرلیے ہیں۔
خیال رہے کہ اسٹیٹ بینک کی جانب سے ایک ماہ کے دوران شرح سود میں 4 اعشاریہ 25 فیصد کمی کی جاچکی ہے۔
اس کے علاوہ اسٹیٹ بینک نے کورونا وائرس کے حوالے سے جاری لاک ڈاؤن میں ملازمین کو تنخواہوں کی ادائیگی کیلئے قرض اسکیم بھی متعارف کرائی ہے۔
ملک میں کورونا سے اب تک مزید 24 اموات، ہلاکتیں 385 اور مجموعی کیسز 16800 سے تجاوز کر گئے
ٹیسٹنگ بڑھائے بغیر بہتری کا دعوی مناسب نہیں، طبی ماہرین
