لاہور (جیوڈیسک) پاکستان اے نے کینیا کو دوسرے ون ڈے میں بھی 155 رنز سے قابو کرلیا، شرجیل خان نے پہلے میچ میں ناکامی کا غصہ نکالتے ہوئے مہمان بولرز کے پسینے چھڑا دیے، انھوں نے 9 چھکوں کی مدد سے 138 رنز کی طوفانی اننگز کھیلی، بابر اعظم 64 اور کپتان فواد عالم 52 رنز بنانے میں کامیاب رہے۔
تفصیلات کے مطابق قذافی اسٹیڈیم لاہور میں میزبان ٹیم نے ٹاس جیت کر پہلے بیٹنگ کرتے ہوئے مقررہ 45 اوورز میں 4 وکٹ پر 314 کا مجموعہ سجایا، سمیع اسلم اور شرجیل خان نے 77 رنز کا آغاز فراہم کرتے ہوئے فتح کی بنیاد رکھی، سمیع اسلم 19 رنز بنانے کے بعد او لاؤچ کی گیند پر اوبانڈا کو کیچ دے بیٹھے، اگلی ہی بال پر فضل سبحان بغیر کھاتہ کھولے پویلین لوٹ گئے انھیں بھی اولاؤچ نے آؤٹ کیا، اس موقع پر شرجیل نے کپتان فواد عالم کے ساتھ مل کر اسکور کو 205 تک پہنچا دیا،اوپنر کی وکٹ اوٹینو کو ملی، انھوں نے 120 گیندوں کا سامنا کرتے ہوئے 9 چھکوں اور 12 چوکوں کی مدد سے 138 رنز کی دلکش اننگز کھیلی۔ فواد نے 5 چوکوں کی مدد سے 52 رنز بنائے، بابر اعظم 64 اور محمد رضوان 24 رنز پر ناٹ آؤٹ رہے۔
مشکل ہدف کا پیچھا کرتے ہوئے کینین ٹیم نے صرف 159 پر ہی ہمت ہار دی، اوبانڈا اور اوینو نے 36 رنز بنا کر ٹیم کو اچھا آغاز فراہم کیا لیکن 49 کے مجموعی اسکور پراوبانڈا، محمد طلحہٰ کی گیند پررضوان کے ہاتھوں کیچ آؤٹ ہو گئے، دوسری وکٹ 59 کے اسکور پر گردیپ سنگھ کی صورت میں گری، انھیں شاہ زیب نے 4 رنز پر ایل بی ڈبلیو کیا، اسی اسکور پر اوینو (14) کی صورت میں کینیا کو تیسرا نقصان اٹھانا پڑا، مہمان ٹیم ابھی سنبھل ہی نہ پائی تھی کہ 85 پر اوڈمبیو فواد عالم کی گیند پر پویلین لوٹ گئے، صرف ایک رن کے اضافہ سے کمانڈے نے بھی شاہ زیب کے سامنے ہتھیار ڈال دیے، 88 کے مجموعی اسکور پر ناگوچی کو بھی شاہ زیب نے اپنا تیسرا شکار بنایا، ساتویں وکٹ 107 پر گری جب اوما کچھ دیروکٹ پر رکنے کے بعد رضا حسن کی گیند پر بولڈ ہوگئے۔
انھوں نے 26 رنز بنائے 122 پر اولنج 11 رنز بنانے کے بعد محمد طلحہ کا شکار بنے، 145 پر عمران خان نے نگوچی کو آؤٹ کردیا، مہمان ٹیم کی آخری وکٹ 41.3 اوور میں 159 پر گر گئی، آخری آؤٹ ہونے والے بیٹسمین اونٹینو نے 39 رنز بنائے، شاہ زیب حسن نے 3 جبکہ محمد طلحہ اور فواد عالم نے 2،2 وکٹیں حاصل کیں، شرجیل خان کو مین آف دی میچ دیا گیا۔ سیریز کا تیسرا ایک روزہ میچ منگل کو قذافی اسٹیڈیم لاہورمیں ہی کھیلا جائے گا۔
