کراچی (جیوڈیسک) فنکشنل لیگ کے رہنما اور سندھ اسمبلی میں نامزد اپوزیشن لیڈر شہریار مہر نے کہا ہے کہ سندھ اسمبلی میں تمام اپوزیشن جماعتوں نے مجھے متفقہ طور پر اپوزیشن لیڈر نامزد کردیا ہے اور اپوزیشن لیڈر کے لیے درخواست آج (جمعے کو) سندھ اسمبلی میں جمع کرائی جائے گی۔ میں پیر صاحب پگارا، پیر صدر الدین شاہ راشدی اور پارٹی قیادت کا شکر گزار ہوں کہ انھوں نے مجھے سندھ اسمبلی میں فنکشنل لیگ کی جانب سے اپوزیشن لیڈر نامزد کیا ہے، میں ن لیگ کے سربراہ اور وزیراعظم نواز شریف، تحریک انصاف کے سربراہ عمران خان اور ان پارٹیوں کا بھی تہہ دل سے شکریہ ادا کرتا ہوں جنھوں نے اپوزیشن لیڈر کے حوالے سے فنکشنل لیگ کے فیصلے کی تائید کی، میں اپوزیشن لیڈر کے طور پر پوری کوشش کروں گا کہ سندھ کے عوام کے مفادات اور ان کی بھلائی کے لیے کام کروں اور ان کے حقوق کے لیے سندھ اسمبلی میں آواز اٹھائوں۔
وہ جمعرات کو مسلم لیگ فنکشنل ہائوس میں پریس کانفرنس سے خطاب کر رہے تھے۔ اس موقع پر سندھ اسمبلی میں فنکشنل لیگ کے پارلیمانی لیڈر نند کمار، نصرت سحر عباسی اور کامران ٹیسوری بھی موجود تھے۔ شہریار مہر نے کہا کہ میں حکومت کے اچھے کاموں کی تائید بھی کروں گا اور ہم سندھ اسمبلی میں حقیقی اپوزیشن کا کردار ادا کریں گے، ہم سندھ کے عوام کے مفادات کے تحفظ کے لیے بھرپور آواز اٹھائیں گے، کراچی سمیت سندھ میں سب سے بڑا مسئلہ امن وامان کا ہے، حالات بدترین ہوتے جا رہے ہیں، امن وامان کے لیے سنجیدہ اقدامات کی ضرورت ہے۔
سندھ ہائیکورٹ کا شہریوں کی غیر قانونی حراست پر قانون نافذ کرنیوالے اداروں سے جواب طلب
عوام کو اگلے 3 ماہ تک لوڈ شیڈنگ کا عذاب برداشت کرنا پڑے گا، خواجہ آصف
