کراچی (اصل میڈیا ڈیسک) سندھ میں کورونا وائرس کے کیسز کی تعداد 155 ہو گئی۔ ٹوئٹر کے ذریعے سندھ حکومت کے ترجمان مرتضیٰ وہاب نے کورونا وائرس کے متاثرین کی تعداد میں اضافے کی تصدیق کی۔
انہوں نے بتایا کہ سکھر میں موجود 234 زائرین کے ٹیسٹ مکمل کرلیے گئے جن میں سے 119 کے کورونا وائرس ٹیسٹ مثبت اور 115 افراد کے ٹیسٹ منفی ہیں۔
مرتضیٰ وہاب نے تصدیق کی کہ سندھ میں کورونا وائرس کے مجموعی کیسز کی تعداد 155 ہوگئی ہے۔
اس سے قبل جیونیوز کے پروگرام جیو پاکستان میں گفتگو کرتے ہوئے مرتضیٰ وہاب نے کہا کہ سندھ میں کورونا وائرس کے تمام مریضوں کی حالت خطرے سے باہر ہے جب کہ 2 مریض صحت یاب ہوچکے ہیں۔ انہوں نے عوام سے اپیل کی کہ کورونا وائرس سے مقابلہ کرنا ہم سب کی ذمہ داری ہے لہٰذا احتیاط برتنے کی ضرورت ہے اور غیر ضروری آمد و رفت نہ کی جائے۔
مرتضیٰ وہاب کا کہنا تھا کہ تفتان میں زائرین کو بہتر طریقے سے قرنطینہ میں نہیں رکھا گیا، ہمارے خدشات درست ثابت ہوئے، جب تفتان سے آئے افراد میں کورونا کی تشخیص ہوئی، قرنطینہ میں یہ مشکلات پیش آرہی ہیں کہ لوگ آپس میں مل رہے ہیں، قرنطینہ میں لوگوں کو سمجھانے کے لیے علما کی مدد لی جارہی ہے۔
انہوں نے مزید کہا کہ افسوس ہوتا ہے کہ لوگوں نے اس صورتحال کا بھی فائدہ اٹھایا۔ سینیٹائزر نہیں مل رہے۔
ترجمان سندھ حکومت کا کہنا تھا کہ آج ریسٹورنٹس کے حوالے سے اہم فیصلہ کریں گے، کل اجلاس میں ریسٹورنٹس کے معاملے پر بحث کی گئی، ریسٹورنٹس دیر تک کھلے رہتے ہیں تو لوگوں کا رش ہوتا ہے، پورا ملک ایک ساتھ مل کر فیصلے کرے گا تو بہتر نتائج آئیں گے۔
مرتضیٰ وہاب نے کہا کہ تعلیمی اداروں سے متعلق 90 فیصد احکامات پر عمل درآمد ہو رہا ہے، کہیں سے کوئی شکایت آتی ہے تو کارروائی کی جاتی ہے، خوش آئند بات ہے کہ علما حکومت کی مدد کر رہے ہیں، مذہبی رہنما بھی خود احتیاط کی تلقین کررہے ہیں، اسکول بند ہوسکتے ہیں تو مدارس یونیورسٹیاں بھی بند ہوسکتی ہیں، اس سلسلے میں علماء تعاون کررہے ہیں۔
عمران خان کا ہر عمل بدنیتی پر مبنی ہے، شاہد خاقان عباسی
کورونا وائرس: کراچی میں لگنے والے تمام بچت بازار بند کرنے کا حکم
