عمر رسیدہ ہونا اور بوڑھا نظر آنا دو الگ الگ باتیں ہیں کیونکہ بعض لوگ وقت سے پہلے ہی بوڑھے دکھائی دینے لگتے ہیں اور ان کی شخصیت کا تاثر بھی کچھ اچھا نہیں پڑتا جب کہ یہ مسئلہ خاص طور پر خواتین کے ساتھ بہت زیادہ ہوتا ہے لیکن چند پھل اور سبزیوں کے استعمال سے اس مسئلے پر قابو پایا جاسکتا ہے۔
لیموں: اس میں وٹامن سی وافر مقدار میں ہوتا ہے جو جلد پر جھریاں پڑنے سے بچانے والے کولاجن نامی مرکبات بناتا ہے۔ روزانہ صرف ایک لیموں کا استعمال (ایک گلاس پانی میں حل کرکے) آپ کی جلد کو جھریوں سے محفوظ رکھ سکتا ہے۔
شکر قندی: اس میں بی ٹا کیروٹین کہلانے والا مادہ ہوتا ہے جو ہمارے جسم کے اندر وٹامن اے میں تبدیل ہوکر جلد کو ہموار اور جاذبِ نظر بناتا ہے۔ دن بھر میں صرف 100 گرام شکر قندی کافی ہے لیکن ذیابیطس کے مریض اسے اپنے معالج سے مشورہ کیے بغیر ہر گز استعمال نہ کریں۔
ٹماٹر: سرخ ٹماٹر ’’لائیکوپین‘‘ نامی مادّے سے بھرپور ہوتا ہے جو جلد کو دھوپ کی تمازت سے پہنچنے والے نقصان سے بچاتا ہے۔ دن بھر میں درمیانی جسامت والا ایک سرخ ٹماٹر اس مقصد کے لیے کافی ہے۔
شلجم اور چقندر: یہ سردیوں کی خاص سبزیاں ہیں اور بہتر ہے کہ انہیں سردیوں ہی میں استعمال کیا جائے۔ ان میں جسم سے زہر ختم کرنے کی قدرتی صلاحیت ہوتی ہے اور روزانہ ایک شلجم یا چقندر (سلاد کے طور پر) کھانے سے چہرے کی رنگت بھی لال سرخ رہتی ہے۔ البتہ وہ لوگ جنہیں غذا میں فولاد (آئرن) سے الرجی ہوتی ہے انہیں شلجم اور چقندر کے علاوہ پالک کھانے میں بھی احتیاط برتنی چاہیے۔
ایواکاڈو: یہ پھل ہمارے یہاں صرف بڑے سپر اسٹورز پر دستیاب ہوتا ہے کیونکہ یہ عموماّ مقامی طور پر کاشت نہیں ہوتا۔ تاہم ایوا کاڈو میں قدرتی طور پر موجود روغن (آئل) جلد کی نمی برقرار رکھتے ہوئے اسے ہموار اور مضبوط بھی رکھتا ہے۔
بلیو بیریز: یہ بھی ہمارے یہاں مقامی طور پر بہت کم کاشت ہوتی ہے لیکن قدرتی اینٹی آکسیڈینٹس سے لبریز ہوتی ہے جن کی بدولت یہ جلد کو نقصان پہنچانے والے فری ریڈیکلز کو ختم کرتی ہے۔
بھنڈی کے وہ فوائد جن سے آپ اب تک لاعلم تھے
دانتوں کے درد سے نجات پانے کیلیے آزمودہ گھریلو نسخے
