ممبئی (اصل میڈیا ڈیسک) بھارت میں سوشل میڈیا پر شائع کی گئی ایک میوزک ویڈیو میں یوٹیوب کے لاکھوں بھارتی صارفین کو پیغام دیا جا رہا ہے کہ وہ بھارت کے زیر انتظام کشمیر کے مسلم اکثریتی علاقوں میں زمینیں خریدیں اور کشمیری خواتین سے شادیاں بھی کریں۔
بھارت میں رواں ماہ کے آغاز میں ہندو قوم پرست حکومت کے کشمیر کی خصوصی آئینی حیثیت کو منسوخ کرنے کے اعلان کے فوراﹰ بعد ہی سوشل میڈیا پر ایسی متعدد میوزک ویڈیوز سامنے آنا شروع ہوگئیں، جس میں ہندوؤں کو جموں و کشمیر میں زمین خریدنے کی ہدایت کی جا رہی ہے۔ ‘پیٹروئٹزم پاپ‘ یعنی حب الوطنی کے جذبات سے بھرے ان گیتوں میں تیزی سے اضافہ ہو رہا ہے۔ کہا جا رہا ہے کہ ایسے گیت قوم پرستی اور دائیں بازو کے قدامت پسند رویے کو فروغ دے رہے ہیں۔
یہ گیت زیادہ تر فیس بک، ٹوئٹر اور تیزی سے مقبول ہوتی ایپ ٹِک ٹاک جیسے پلیٹ فارم پر شیئر کیے جاتے ہیں۔ ناقص معیار کی ویڈیو پروڈکشن کے باوجود ایسے ویڈیوز نے YouTube پر لاکھوں کلکس حاصل کیے ہیں۔
بھارت کے شمالی اور مشرقی علاقوں سے تعلق رکھنے والے نوجوان میں یہ گانے زیادہ پسند کیے جاتے ہیں۔ ان گانوں کی پراڈکشن میں مسلسل اضافہ دیکھا جا رہا ہے۔ بھارتی ریاست بہار میں رنگ میوزک اسٹوڈیو کے نتیش سنگھ نرمل کا دعوی ہے کہ انہوں نے کشمیر کی خصوصی آئینی حیثیت کی ضمانت دینے والے آرٹیکل 370 کی منسوخی کے تین گھنٹے بعد پہلا گیت تیار کیا تھا۔ ‘دھرنا 370‘ اور ‘آرٹیکل 370‘ کے نام سے بنائے گئے ان نغموں کو یوٹیوب پر 1.6 ملین ہٹس مل چکی ہیں۔ نرمل سنگھ کے بقول، ”میں قوم کی خدمت کر رہا ہوں، لوگ ان گانوں پر رقص کرتے ہیں۔‘‘
قبل ازیں چھ اگست کو بھارتیہ جنتا پارٹی کے رکن وکرم سینی نے کشمیری خواتین کے ساتھ شادی کے حوالے سے بیان دیا تھا جس کے بعد ان کو شدید تنقید کا نشانہ بھی بنایا گیا۔ ناقدین کے مطابق، کشمیری خواتین کے خلاف ایسے بیانات روایتی پدرانہ سوچ کی عکاسی کرتے ہیں۔
اتر پردیش میں تعلیم حاصل کرنے والے بیس سالہ سلمان صدیقی نے نرمل کے ساتھ مل کر ایک ایسے شخص کے بارے میں گیت تیار کیا جو رشتے کی تلاش میں بھارتی زیر انتظام کشمیر کا سفر کرتا ہے۔ نرمل اور صدیقی کے مطابق یہ گیت کسی صنف کے خلاف نہیں ہیں بلکہ بہت سارے بھارتی مرد کشمیری خواتین سے شادی کرنے کی خواہش رکھتے ہیں۔
ماضی میں اس نوعیت کی ‘ موسیقی‘ کو بھارت میں ہندوتوا کے پرچار اور پاکستان مخالفت کے علاوہ گھر گھر بھارتی پرچم لگانے کو عام کرنے کے لیے استعمال کیا جاتا تھا۔ لیکن اب، یہ گیت خصوصی طور پر بھارتی زیر انتظام کشمیر کے حوالے سے تیار کیے جا رہے ہیں۔
کشمیر میں بھارتی فوجیوں کا قبرستان بنا دیں گے، صدر آزاد کشمیر
شامی دستوں کے حملے، جرمن امداد سے بنے طبی مراکز بھی زد میں
