اسلام آباد (جیوڈیسک) سپریم کورٹ نے سندھ کے 11 اضلاع کے 80 حلقوں میں بلدیاتی انتخابات کرانے کی اجازت دے دی۔
سپریم کورٹ کے جسٹس عظمت سعید کی سربراہی میں 2 رکنی بنچ نے الیکشن کمیشن کی جانب سے سندھ میں حلقہ بندیوں کے حوالے سے دائر درخواست کی سماعت کی۔ اس موقع پر الیکشن کمیشن کے وکیل کا کہنا تھا کہ سندھ ہائی کورٹ کے حکم پر متنازع یونین کونسلز میں نئی حلقہ بندیاں کر دی ہیں اور سندھ کے 11 اضلاع کی 80 یونین کونسلز میں 30 دسمبر کو بلدیاتی انتخابات ہوں گے۔ سپریم کورٹ نے الیکشن کمیشن کی اپیل غیر موثر ہونے پر کیس نمٹا دیا۔
واضح رہے کہ مختلف سیاسی جماعتوں کی جانب سے بلدیاتی انتخابات سے قبل حلقہ بندیوں سے متعلق متفرق درخواستیں دائر کی گئی تھیں جس پر سندھ ہائی کورٹ نے الیکشن کمیشن کی جانب سے حلقہ بندیوں کو کالعدم قرار دیتے ہوئے ایک روز میں نئی حلقہ بندیاں کرا کے الیکشن کرانے کا حکم دیا تھا۔
الیکشن کمیشن نے سندھ ہائی کورٹ کے فیصلے کو سپریم کورٹ میں چیلنج کرتے ہوئے موقف اختیار کیا تھا کہ ایک روز میں حلقہ بندیاں ممکن نہیں اس لئے ان اضلاع میں الیکشن ملتوی کرا دیئے گئے ہیں۔
بلوچستان کے مختلف علاقوں میں ایف سی کی کارروائی، کالعدم تنظیم کے کمانڈر سمیت 6 شرپسند ہلاک
آزاد تجارتی معاہدوں پر نظر ثانی کیلیے پاکستان کے چین و دیگر ممالک سے رابطے
