بھارت (اصل میڈیا ڈیسک) بھارتی فلم انڈسٹری میں اقرباء پروری پر آواز بلند کرنے والی نڈر اداکارہ کنگنا رناوت نے اداکار سشانت سنگھ راجپوت کی خود کشی کی وجہ فلم انڈسٹری میں ہونے والی اقرباء پروری کو قرار دے دیا۔
گزشتہ روز 34 سالہ اداکار سشانت سنگگ راجپوت نے مبینہ طور پر اپنے گھر میں پنکھے سے لٹک کر خود کشی کرلی تھی جب کہ ان کے حوالے سے کہا گیا کہ وہ ڈپریشن کا علاج کرارہے تھے۔
سشانت سنگھ کی خودکشی کے بعد بھارت میں ڈپریشن پر ایک نئی بحث چھڑگئی ہے جب کہ پولیس اداکار کی خودکشی کی وجہ جاننے کے لیے تحقیقات کررہی ہے۔
سشانت کی خودکشی کے حوالے سے اداکارہ کنگنا رناوت کا کہنا ہے کہ سشانت کی موت نے ہم سب کو جھنجھوڑ کر رکھ دیا ہے، لیکن کچھ لوگ کہہ رہے ہیں کہ جن کا دماغ کمزور ہوتا ہے وہ ڈپریشن میں آکر خودکشی کرلیتے ہیں۔
انہوں نے کہا کہ سشانت سنگھ پوزیشن ہولڈر تھے اور اسکالر شپ بھی لی تھی تو ان کا دماغ کیسے کمزور ہوسکتا ہے۔
کنگنا کا مزید کہنا تھا کہ سشانت اپنی آخری پوسٹوں اور انٹرویوز میں لوگوں کو کہہ رہے تھے کہ میری فلمیں دیکھو، میرا کوئی گاڈ فادر نہیں ہے، مجھے انڈسٹری سے نکال دیا جائے گا اور انڈسٹری مجھے اپنا ہی نہیں رہی۔
انڈسٹری کے رویے پر کنگنا نے مزید کہا کہ آنجہانی اداکار کو ڈیبیو فلم پر بھی کوئی ایوارڈ نہیں دیا گیا، ’کیدرناتھ‘، ’دھونی‘ اور ’چھچھوڑے‘ جیسی فلموں پر بھی نہیں سراہا گیا بلکہ ’گلی بوائے‘ جیسی واہیات فلم کو سارے ایوارڈ مل جاتے ہیں لیکن ’چھچھوڑے‘ جیسی بہترین فلم کو کوئی ایوارڈ نہیں ملتا۔
خیال رہے کہ ’چھچھوڑے‘ فلم گزشتہ سال ریلیز ہوئی تھی جس میں سشانت سنگھ نے مرکزی کردار کیا تھا جبکہ ’گلی بوائے‘ بھی گزشتہ سال ہی نمائش کے لیے پیش کی گئی تھی جس میں رنویر سنگھ اور عالیہ بھٹ نے مرکزی کردار کیا ہے۔
کنگنا رناوت کا مزید کہنا تھا کہ میں خود فلموں کی ہدایت کاری کرتی ہوں تو یہ ان سپر ہٹ فلموں کو ناکام قرار دیتے ہیں، چند لوگ مجھے بولتے ہیں کہ برے وقت میں غلط اسکرپٹ نہ اٹھاؤں۔
انہوں نے مزید کہا کہ سشانت کی موت خودکشی نہیں بلکہ منصوبہ بندی سے کیا گیا قتل تھا جس میں سسشانت کی غلطی یہ تھی کہ وہ لوگوں کی باتوں میں آگیا اور لوگوں نے کہا کہ فلم انڈسٹری میں کام نہیں ملے گا تو وہ مان گیا۔
واضح رہے کہ اداکار سُشانت سنگھ نے اپنے کیرئیر کا آغاز ڈرامہ ‘کس دیش میں ہے میرا دل’ سے کیا تھا بعد ازاں انہوں نے فلم ‘پی کے’ میں سرفراز کا کردار ادا کیا تھا جس سے وہ کافی مقبول ہوئے۔
علاوہ ازیں سُشانت سنگھ نے ’ایم ایس دھونی’، ‘کیدارناتھ’ اور ‘رابطہ’ جیسی فلموں میں اداکاری کی۔
شان شاہد کی ایک بار پھر ’’ارطغرل غازی ‘‘ پر چڑھائی
کورونا کے پیشِ نظر آسکرز کی تقریب 2 ماہ کیلئے موخر
